ରାଜକନିକା,୮ା୨(ସଞ୍ଜୟ କୁମାର ଦାଶ)ଜନସାଧାରଣଙ୍କ ମୌଳିକ ସମସ୍ୟା ମଧ୍ୟରୁ ସ୍ବାସ୍ଥ୍ୟସେବା ପ୍ରମୁଖ । ଏହାକୁ ନଜରରେ ରଖି ରାଜ୍ୟ ସରକାର ସ୍ବାସ୍ଥ୍ୟ ସେବାର ଉନ୍ନତି ପାଇଁ ବିଭିନ୍ନ ଯୋଜନା କାର୍ଯ୍ୟକାରୀ କରିଛନ୍ତି। ମାଗଣା ଔଷଧ ସହ ଜନସଂଖ୍ୟା ନିୟନ୍ତ୍ରଣ ପାଇଁ ମହିଳା ବାକରଣ ପାଇଁ ବିଭିନ୍ନ ସ୍ବାସ୍ଥ୍ୟକେନ୍ଦ୍ରରେ ଅସ୍ତ୍ରୋପଚାର ଶିବର ଚାଲିଛି। ଏଥିସହ ସ୍ବାସ୍ଥ୍ୟକେନ୍ଦ୍ରର ଭିତ୍ତିଭୂମିର ଉନ୍ନତି ଓ ବାହ୍ୟ ରଙ୍ଗ ପାଇଁ ୫-ଟି ଅଧୀନରେ ଅନେକ କୋଟି ଟଙ୍କା ଖର୍ଚ୍ଚ କରାଯାଉଛି। ହେଲେ କେନ୍ଦ୍ରାପଡ଼ା ଜିଲା ରାଜକନିକା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଏଥିରେ ବ୍ୟତିକ୍ରମ ଦେଖାଦେଇଛି। ଉକ୍ତ ସ୍ବାସ୍ଥ୍ୟକେନ୍ଦ୍ର ଉପରେ ୨୯ ପଞ୍ଚାୟତର ମହିଳାମାନେ ନିର୍ଭର କରୁଛନ୍ତି। ଏହି ପରିପ୍ରେକ୍ଷୀରେ ରାଜକନିକା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ବାକରଣ ଅସ୍ତ୍ରୋପଚାର ପାଇଁ ଏକ ଶିବିରର ଆୟୋଜନ ବୁଧବାର କରାଯାଇଥିଲା । ଏହି ଶିବିରରେ ଅସ୍ତ୍ରୋପଚାର କରାଯାଇଥିବା ମହିଳାମାନଙ୍କ ପାଇଁ କୌଣସି ବେଡ୍ର ବ୍ୟବସ୍ଥା ନ ଥିଲା। ଫଳରେ ସେହି ମହିଳାମାନଙ୍କୁ ସ୍ବାସ୍ଥ୍ୟକେନ୍ଦ୍ର ଚଟଣାରେ ଏକ ପଲିଥିନ୍ ପକାଇ ଶୁଆଇ ଦିଆଯାଇଥିବା ଦେଖିବାକୁ ମିଳିଥିଲା। ଏହି ଶିବିରକୁ ଦୂର ଦୁରାନ୍ତରୁ ମହିଳାମାନେ ଆଶାକର୍ମୀମାନଙ୍କ ସହ ଅସ୍ତ୍ରୋପଚାର ପାଇଁ ଆସିଥିଲେ । ହେଲେ ଅସ୍ତ୍ରୋପଚାର ପରେ ସ୍ବାସ୍ଥ୍ୟକେନ୍ଦ୍ରର କର୍ମଚାରୀମାନେ ଚେତାଶୂନ୍ୟ ଅବସ୍ଥାରେ ଥିବା ପ୍ରାୟ ୨୭ଜଣ ମହିଳାଙ୍କୁ ଅସ୍ବାସ୍ଥ୍ୟକର ପରିବେଶରେ ଡାକ୍ତରଖାନାର ଚଟାଣରେ ଏକ ପଲଥିନ ପକାଇ ଶୁଆଇ ଦେଇଥିବା ଘଟଣା ସାଧାରଣରେ ଅସନ୍ତୋଷ ସୃଷ୍ଟି କରିଥିଲା। କେତେଜଣ ମହିଳା ପଲିଥିନ୍ ତଳକୁ ଖସି ଚଟାଣରେ ବି ପଡି ରହିଥିଲେ। ସ୍ବାସ୍ଥ୍ୟକର୍ମୀମାନେ ଚପଲ, ଜୋତା ପିନ୍ଧି ସେହି ପଲିଥିନ୍ ଉପରେ ଯାତାୟତ କରିବା ସହିତ ସମ୍ପୃକ୍ତା ମହିଳମାନଙ୍କୁ ଇଞ୍ଜେକଶନ ଦେଉଥିବା ଦେଖିବାକୁ ମିଳିଥିଲା। ପାଖରେ ସ୍ବାସ୍ଥ୍ୟକେନ୍ଦ୍ରର ଆବର୍ଜନା ବି ସେଠାରେ ପଡି ରହିଥିଲା। ଡାକ୍ତରଖାନାକୁ ଆସୁଥିବା ଲୋକମାନେ ସେହି ପଲିଥିନ୍ ଉପରେ ଚଢ଼ି ଯାତାୟତ ବି କରୁଥିଲେ।
ସଂକ୍ରାନ୍ତରେ ସେଠାରେ ଥିବା କେତେଜଣ ମହିଳା କହିଛନ୍ତି, ଅପରେଶନ ପରେ ଜଣକ ପରେ ଜଣେ ମହିଳାଙ୍କୁ ଏଠାରେ ଆଣି ଶୁଆଇ ଦିଆଗଲା । ଆମେ ବେଡ୍ କଥା କହିଥିଲୁ, ହେଲେ ସ୍ବାସ୍ଥ୍ୟକେନ୍ଦ୍ରରେ କର୍ମଚାରୀମାନେ ଶୁଣି ନ ଶୁଣିବାର ଅଭିନୟ କରିଥିଲେ । ଦୁଃଖର କଥା ଅସ୍ତ୍ରୋପଚାର ପରେ ମହିଳମାନଙ୍କୁ ସ୍ବାସ୍ଥ୍ୟକର ପରିବେଶରେ ତଥା ବେଡ୍ ଉପରେ ରଖିବା କଥା । ଆମେ ଏଠାକୁ ଅସ୍ତ୍ରୋପଚାର କରାଇବାକୁ ଆସିଛୁ ନା ରୋଗ କିଣିବାକୁ ଆସିଛୁ ବୋଲି ମହିଳାଙ୍କ ସମ୍ପର୍କୀୟ ମାନେ ଅଭିଯୋଗ କରିଥିଲେ। ଏ ସଂକ୍ରାନ୍ତରେ ରାଜକନିକା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ଦାୟିତ୍ୱରେ ଥିବା ଡାକ୍ତର ବାଦଲ କୁମାର ମହାନ୍ତି କହିଛନ୍ତି, ଏଭଳି ମହିଳାମାନେ ଚଟାଣରେ ପଡିଥିବା ପାଲ ଉପରେ ଶୋଇବା କଥା ନୁହେଁ । ଆମର ୫-ଟି ଅଧୀନ କାମ ଚାଲୁଥିବାରୁ ଘର ଓ ବେଡ୍ ନ ଥିବାରୁ ତଳେ ଶୁଆଇବାକୁ ବାଧ୍ୟ ହେଉଛୁ ବୋଲି ସଫେଇ ଦେଇଥିଲେ ।
