ଥୁଆମୂଳ ରାମପୁର,୧୨ା୮(ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକରେ ଦାଦନ ସମସ୍ୟା ଗମ୍ଭୀର ରୂପ ନେଇଛି। ପରିବାର ଚଳାଇବା ପାଇଁ ଭିଟାମାଟି ଛାଡ଼ି ବାହାର ରାଜ୍ୟକୁ ଯାଉଥିବା ଲୋକଙ୍କ ଭାଗ୍ୟରେ କେତେବେଳେ ନିଖୋଜ ତ ଆଉ କେତେବେଳେ ମୃତଦେହ ହୋଇ ଫେରିବା ସାର ହେଉଛି। ସରକାର ବଦଳୁଥିଲେ ବି ଗରିବଙ୍କ ଦୁଃଖ ବଦଳୁ ନ ଥିବା ବେଳେ ବେକାରୀ ସମସ୍ୟା ରୋକିବାରେ ପ୍ରଶାସନ ବିଫଳ ହୋଇଥିବା ଅଞ୍ଚଳବାସୀ ଅଭିଯୋଗ କରିଛନ୍ତି।
ଏହିପରି ଏକ ହୃଦୟବିଦାରକ ଘଟଣା ସାମ୍ନାକୁ ଆସିଛି ପାଡେପଦର ପଞ୍ଚାୟତ ସ୍ଥିତ ଭାଟିଫାସ ଗ୍ରାମରୁ। ଗ୍ରାମର ୩୫ ବର୍ଷୀୟ ଯୁବକ ଶିବା ମାଝୀଙ୍କର ହାଇଦ୍ରାବାଦରେ ଦାଦନ ଖଟୁଥିବା ବେଳେ ଅକାଳ ବିୟୋଗ ଘଟିଛି। ଏହି ଖବର ପ୍ରଚାରିତ ହେବା ପରେ ଭାଟିଫାସ ଓ ଖମାରପଦର ଅଞ୍ଚଳରେ ଶୋକର ଛାୟା ଖେଳିଯାଇଛି।
ସୂଚନା ଅନୁସାରେ, ଶିବା ନିଜ ଗାଁ ଭାଟିଫାସ ଛାଡ଼ି ଖମାରପଦର ସ୍ଥିତ ଶ୍ୱଶୁର ଘରେ ସ୍ତ୍ରୀ ରଶ୍ମି(୩୦)ଙ୍କ ସହ ରହୁଥିଲେ। ଗରିବ ପରିବାର, ବୃଦ୍ଧା ମା’ ଏବଂ ପାରାଲିସିସ୍ ଆକ୍ରାନ୍ତ ଶ୍ୱଶୁରଙ୍କ ଚିକିତ୍ସା ଓ ପରିବାରର ଆର୍ଥିକ ବୋଝ ସମ୍ଭାଳିବା ପାଇଁ ସେ ପ୍ରାୟ ଏକ ବର୍ଷ ହେଲା ହାଇଦ୍ରାବାଦର ଏକ କମ୍ପାନୀରେ ଶ୍ରମିକ ଭାବେ କାମ କରୁଥିଲେ। ମୃତ୍ୟୁ ଦିନ ସକାଳେ ଶିବା ଫୋନ ଯୋଗେ ସ୍ତ୍ରୀ ରଶ୍ମି ଓ ପରିବାରବର୍ଗଙ୍କ ସହ ସାଧାରଣ ଭାବେ କଥାବାର୍ତ୍ତା କରିଥିଲେ। ହେଲେ ସେହି ଦିନ ରାତି ପ୍ରାୟ ୧୧ଟାରେ ହଠାତ୍ ତାଙ୍କର ମୃତ୍ୟୁ ଘଟିଥିବା ନେଇ ସାଥୀ ଶ୍ରମିକମାନେ ଫୋନ କରି ରଶ୍ମିଙ୍କୁ ଜଣାଇଥିଲେ। ସକାଳେ ସ୍ବାମୀଙ୍କ ସହ କଥା ହୋଇ ରାତିରେ ତାଙ୍କ ବିୟୋଗ ଖବର ପାଇବା ରଶ୍ମିଙ୍କ ପାଇଁ ବଡ଼ ଆଘାତ ସାଜିଛି। ତେବେ ତାଙ୍କ ମୃତ୍ୟୁର ପ୍ରକୃତ କାରଣ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ଗ୍ରାମବାସୀ ଓ ପ୍ରଶାସନିକ ସହଯୋଗ ଦାବି ମଧ୍ୟରେ ଶିବା କାମ କରୁଥିବା କମ୍ପାନୀ ପକ୍ଷରୁ ଏକ ବେସରକାରୀ ଆମ୍ବୁଲାନ୍ସ ଯୋଗେ ବୁଧବାର ସକାଳ ୩ଟାରେ ମୃତଦେହ ଗାଁରେ ପହଞ୍ଚିଥିଲା। ପରେ ଗାଁ ଶ୍ମଶାନରେ ତାଙ୍କର ଶେଷକୃତ୍ୟ ସମ୍ପନ୍ନ କରାଯାଇଛି। ନିଃସନ୍ତାନ ଶିବାଙ୍କ ମୃତ୍ୟୁ ପରେ ଦୁଇଟି ପରିବାର ସମ୍ପୂର୍ଣ୍ଣ ଅସହାୟ ହୋଇପଡ଼ିଛନ୍ତି। ପରିବାରର ସ୍ଥିତି ଦେଖିଲେ ସରକାରୀ ଯୋଜନାର ପ୍ରକୃତ ରୂପ ପଦାରେ ପଡୁଛି। ଶିବାଙ୍କ ପରିବାର ନିକଟରେ ନା ଅଛି ନିଜସ୍ବ ଜମିବାଡ଼ି, ନା ଅଛି ରାଶନ କାର୍ଡ। ଏପରିକି ଶିବାଙ୍କ ନିଜର ଆଧାର କାର୍ଡ ମଧ୍ୟ ନ ଥିବା କୁହାଯାଉଛି। ଘରେ ଥିବା ବୃଦ୍ଧା ମା’ ଯମୁନା ମାଝୀଙ୍କୁ ଆଜି ଯାଏ ସାମାଜିକ ସୁରକ୍ଷା ଭତ୍ତା ମିଳି ନ ଥିବା ବେଳେ ପାରାଲିସିସ୍ରେ ଆକ୍ରାନ୍ତ ଶ୍ୱଶୁର ମଧ୍ୟ ସରକାରୀ ସହାୟତାରୁ ବଞ୍ଚିତ ହୋଇ ରହିଛନ୍ତି। ଦୁଇଟି ପରିବାରର ଏକମାତ୍ର ରୋଜଗାରିଆ ବ୍ୟକ୍ତିଙ୍କୁ ହରାଇବା ପରେ ଏବେ ୩୦ ବର୍ଷୀୟା ରଶ୍ମିଙ୍କ ମୁଣ୍ଡରେ ବୃଦ୍ଧା ଶାଶୁ ଓ ଆକ୍ରାନ୍ତ ବାପାଙ୍କ ପ୍ରତିପୋଷଣ ଭାର ପଡ଼ିଛି। ନିଜେ କେମିତି ଚଳିବେ ଏବଂ ଅସହାୟ ଗୁରୁଜନଙ୍କୁ କେମିତି ସମ୍ଭାଳିବେ, ସେହି ଚିନ୍ତା ତାଙ୍କୁ ଘାରିଛି। ଶିବାଙ୍କ ଏହି ଅକାଳ ବିୟୋଗ ଦୁର୍ଗମ ଅଞ୍ଚଳର ଦାରିଦ୍ର୍ୟ ଓ ଜୀବିକା ସଂକଟକୁ ପୁଣିଥରେ ସାମ୍ନାକୁ ଆଣିଛି। ସରକାରୀ ଯୋଜନାରୁ ବଞ୍ଚିତ ଏହି ଅସହାୟ ପରିବାର ନିକଟରେ ପ୍ରଶାସନ କେବେ ପହଞ୍ଚି ତୁରନ୍ତ ଆର୍ଥିକ ସହାୟତା ଯୋଗାଇଦେଉଛି, ତାହା ଏବେ ବଡ଼ ପ୍ରଶ୍ନ।
