ଭୋପାଳ,୬।୨: ମଧ୍ୟପ୍ରଦେଶର ବରଓ୍ବାନି ଜିଲାର ଭାରତୀୟ ସେନାରେ ୨୧ ବର୍ଷ ସେବା ପୂରଣ ପରିବା ପରେ ଘରକୁ ଫେରିଥିବା ସୈନିକଙ୍କୁ ଗ୍ରାମବାସୀ ଅଦ୍ଭୁତପୂର୍ବ ସ୍ବାଗତ ଜଣାଇଛନ୍ତି। ଗ୍ରାମବାସୀ ମାଟିର ପୁଅଙ୍କୁ ସ୍ବାଗତ କରିବା ପାଇଁ ଜମିରେ ନିଜର ହାତ ରଖିଛନ୍ତି। ଏଥିସହିତ ଲୋକେ ଡିଜେ, ଢୋଲ ବଜାଇ ନାଚ ଗୀତରେ ତାଙ୍କୁ ସ୍ବାଗତ ମଧ୍ୟ କରିଛନ୍ତି। ଖାଲି ଏତିକି ନୁହେଁ, ଘୋଡ଼ା ଗାଡ଼ିରେ ବସାଇ ଗାଁ ସାରା ବୁଲାଇଛନ୍ତି।
ମଧ୍ୟପ୍ରଦେଶର ବରଓ୍ବାନି ଜିଲାର ଠିକିରୀରେ ରହୁଥିବା ନିର୍ଭୟ ସିଂହ ଚୌହାନ ଭାରତୀୟ ସେନାରେ ନିଜର ୨୧ ବର୍ଷ ଚାକିରି ପୂରା କରି ଗାଁକୁ ଫେରିଥିଲେ। ଫଳରେ ଗ୍ରାମବାସୀ ତାଙ୍କୁ ସ୍ବାଗତ ଜଣାଇବା ପାଇଁ ନିଜର ହାତ ପାପୁଲିକୁ ଜମିରେ ବିଛାଇ ଦେଇଥିଲେ। ଗ୍ରାମବାସୀ ଏବଂ ବନ୍ଧୁ ପରିଜନମାନେ ପ୍ରାୟ ଦେଢ଼ କିଲୋମିଟର ପର୍ଯ୍ୟନ୍ତ ଡିଜେ ଢୋଲ ବଜାଇ ନାଚି ନାଚି ନିର୍ଭୟଙ୍କୁ ସ୍ବାଗତ କରିଥିଲେ।
ସେନାର ମୁଖ୍ୟ କନଷ୍ଟେବଳ ନିର୍ଭୟ କୁହନ୍ତି, ଏପରି ସମ୍ମାନ ପାଇବି ବୋଲି ମୁଁ କେବେ କଳ୍ପନା କରି ନ ଥିଲି। ଲୋକଙ୍କ ହାତ ଉପରେ ମୁଁ ପାଦ ରଖି ରଖି ଘର ପର୍ଯ୍ୟନ୍ତ ଆସିଥିଲି। ଏହା ମୋ’ ପାଇଁ ସବୁଠୁ ବଡ଼ ସମ୍ମାନର କଥା। ମୁଁ ଏଥିପାଇଁ ଚିର କୃତଜ୍ଞ।
ସେ କହିଛନ୍ତି, ମୋତେ ଏପରି ସ୍ବାଗତ କରାଯିବା ନିଶ୍ଚିତ ଆନନ୍ଦର କଥା। ମୁଁ ଏବେ ବୟସର ତୃତୀୟ ପାହାଚରେ। ଯଦି ମୋତେ ସୁଯୋଗ ମିଳେ ତେବେ ମୁଁ ନିଶ୍ଚିତ ଭାବେ ସମାଜସେବାରେ ନିଜକୁ ନିୟୋଜିତ କରିବି।
