ଅମ୍ମାନ,୧୦।୧୨: ସିରିଆର ରାଷ୍ଟ୍ରପତି ବାଶାର ଅଲ-ଅସାଦ ଦେଶ ଛାଡି ପଳାଇବା ପରେ ଇସ୍ରାଏଲ ସିରିଆ ଉପରେ ଏକ ବଡ଼ ଆକ୍ରମଣ କରିଥିଲା। ସୂଚନାନୁସାରେ, ଏୟାର ଷ୍ଟ୍ରାଇକରେ ସିରିଆ ସେନାର ତିନୋଟି ପ୍ରମୁଖ ଏୟାରବେସକୁ ଇସ୍ରାଏଲ ଟାର୍ଗେଟ କରିଛି। ଏହି ବିସ୍ଫୋରଣରେ ଡଜନେ ହେଲିକପ୍ଟର ଏବଂ ଜେଟ ବିମାନ କ୍ଷତିଗ୍ରସ୍ତ ହୋଇଛି।
ସୂତ୍ର ଆଧାରରେ ରଏଟର୍ସ କହିଛି ଯେ ଉତ୍ତର-ପୂର୍ବ ସିରିଆର କାମିଶଲି ବିମାନବନ୍ଦର, ହୋମସର ଗ୍ରାମାଞ୍ଚଳର ସିନ୍ଧର ବିମାନବନ୍ଦର ଏବଂ ରାଜଧାନୀ ଦମିସ୍କର ଦକ୍ଷିଣ-ପଶ୍ଚିମ ଆକ୍ରବା ଏୟାରବେସକୁ ଟାର୍ଗେଟ କରାଯାଇଛି। ଏହା ବ୍ୟତୀତ ରାଜଧାନୀ ଦମିସ୍କର ବାହାରେ ଏକ ଅନୁସନ୍ଧାନ କେନ୍ଦ୍ର ଏବଂ ସୟିଦା ଜୈନାବ ଅଞ୍ଚଳରେ ଥିବା ଏକ ବୈଦ୍ୟୁତିକ ଯୁଦ୍ଧ କେନ୍ଦ୍ର ଉପରେ ମଧ୍ୟ ଆକ୍ରମଣ କରାଯାଇଛି।
ଇସ୍ରାଏଲର ଅଧିକାରୀମାନେ ସୋମବାର କହିଛନ୍ତି ଯେ ଇସ୍ରାଏଲ ସିରିଆର ଉନ୍ନତ ଅସ୍ତ୍ରଶସ୍ତ୍ର ଭଣ୍ଡାର ଉପରେ ଏୟାର ଷ୍ଟ୍ରାଇକ ବୃଦ୍ଧି କରିବ ଏବଂ ବାଶର ଅଲ-ଅସାଦଙ୍କ ପରାଜୟ ପରେ କୌଣସି ବିପଦକୁ ରୋକିବା ପାଇଁ ଭୂମିରେ ସୀମିତ ସାମରିକ ଉପସ୍ଥିତି ବଜାୟ ରଖିବ।
ଇସ୍ରାଏଲର ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ତାଙ୍କ କାର୍ଯ୍ୟାଳୟରେ ବିଳମ୍ବିତ ରାତିରେ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ ସିରିଆର ନୂତନ ପରିସ୍ଥିତି ପରେ ଆମର ସୁରକ୍ଷା ନିଶ୍ଚିତ କରିବାକୁ ଆମେ ସମସ୍ତ ଆବଶ୍ୟକ ପଦକ୍ଷେପ ଗ୍ରହଣ କରିବୁ।
ଇସ୍ରାଏଲର ପ୍ରତିରକ୍ଷା ମନ୍ତ୍ରୀ ଇସ୍ରାଏଲ କାଟଜ କହିଛନ୍ତି ଯେ ସେନା ସମଗ୍ର ସିରିଆରେ ଭାରି ରଣନୀତିକ ଅସ୍ତ୍ର ନଷ୍ଟ କରିବ। ଭୂପୃଷ୍ଠରୁ ବାୟୁ କ୍ଷେପଣାସ୍ତ୍ର, ବାୟୁ ପ୍ରତିରକ୍ଷା ପ୍ରଣାଳୀ, ଭୂପୃଷ୍ଠରୁ ଭୂପୃଷ୍ଠ କ୍ଷେପଣାସ୍ତ୍ର, କ୍ରୁଜ କ୍ଷେପଣାସ୍ତ୍ର, ଦୂର ଦୂରଗାମୀ ରକେଟ ଏବଂ ଉପକୂଳ କ୍ଷେପଣାସ୍ତ୍ର ମଧ୍ୟ ନଷ୍ଟ ହୋଇଯିବ।
