ଭବାନୀପାଟଣା,୧୬।୨(ସ୍ବ.ପ୍ର.): ଦୀର୍ଘ ୫୦ ବର୍ଷ ପରେ ସ୍ବପ୍ନ ହେବ ପୂରଣ। ଶେଷରେ କନାଗାଁ ତେଲ ନଦୀ ଉପରେ ନିର୍ମାଣ ହେବାକୁ ଯାଉଛି ଏକ ପୋଲ। ଅଞ୍ଚଳବାସୀ ଖରା ଦିନେ ନଦୀ ପାର ହୋଇ କାମ ଚଳାଇ ଦେଉଥିବା ବେଳେ ବର୍ଷା ଦିନ ଆସିଲେ ଦେଶୀ ଡଙ୍ଗା ଯାହାଙ୍କ ପାଇଁ ସାହାରା ପାଲଟୁଥିଲା। ସେଥିରେ ଏକ ସେତୁ ନିମାଣ ଅଞ୍ଚଳବାସୀଙ୍କୁ ଆଣିଦେଇଛି ଢେର ସାରା ଆନନ୍ଦ। କଳାହାଣ୍ଡି ଜିଲା ଧର୍ମଗଡ ବ୍ଲକ ଅନ୍ତର୍ଗତ କନାଗାଁ ଓ ଥନଟ ଗ୍ରାମକୁ ସଂଯୋଗ ତେଲ ନଦୀରେ ଆରମ୍ଭ ହୋଇଛି ବିଜୁ ସେତୁ କାମ। କନାଗାଁ ଓ ଥନଟ ଦେଇ ଯାଇଛି ଚୀର ସ୍ରୋତା ତେଲ ନଦୀ। ନଦୀ ଉପରେ କୌଣସି ପୋଲ ନ ଥିବାରୁ ଗାଁରୁ ସହରକୁ ଆସୁଥିବା ଲୋକଙ୍କ ପାଇଁ ସବୁବେଳେ କଷ୍ଟ ସାଧ୍ୟ ହୋଇ ପଡିଥାଏ। ଏହି ନଦୀ ଦେଇ ପ୍ରାୟ ୧୦ଟି ପଞ୍ଚାୟତର ହଜାର ହଜାର ଲୋକେ ନିର୍ଭର କରୁଥିବା ବେଳେ ଗୋଲାମୁଣ୍ଡା ବ୍ଲକର ଜନସାଧାରଣ ମଧ୍ୟ ନିର୍ଭର କରିଥାନ୍ତି। ସେହିପରି କନାଗାଁ, ଲୁହାଗାଁ, ସାଗୁନଭାଡି, ଗତାଗୁଡା ଭଳି ବହୁ ଗ୍ରାମର ଲୋକଙ୍କ ପାଇଁ ଏହା ହେଉଛି ସବୁଦିନିଆ ରାସ୍ତା। ଯାହାକି ବର୍ତ୍ତମାନ ଏହି ତେଲ ନଦୀ ଉପରେ ପୋଲ ନିର୍ମାଣ କାମ ଅଞ୍ଚଳବାସୀଙ୍କୁ ଆସ୍ବସ୍ଥି ଦେଇଛି। ଏହି ନଦୀକୁ ସଂଯୋଗ କରିଥାଏ ଧର୍ମଗଡ ସହର। ଯେଉଁ ସହର ଉପରେ ନିର୍ଭର କରିଥାନ୍ତି ନଦୀ ସେପାରିରେ ଥିବା ବହୁ ଗ୍ରାମର ଲୋକ। ସେ ଅଞ୍ଚଳର ଛାତ୍ରୀଛାତ୍ରଙ୍କଠାରୁ କଲେଜ ପଢିବାକୁ ମଧ୍ୟ ଧର୍ମଗଡ ସହର ଉପରେ ନିର୍ଭର କରିଥାନ୍ତି। ସେ ଅଞ୍ଚରେ ବିଶେଷ କରି ପନିପରିବା ଚାଷ ହେଉଥିବା ବେଳେ ବିଭିନ୍ନ ପ୍ରକାର ପନିପରିବା ଧର୍ମଗଡ ସହରକୁ ବିକ୍ରି ପାଇଁ ଆସିଥାଏ। ବର୍ଷା ଦିନରେ ଅଞ୍ଚଳର ହଜାର ହଜାର ଲୋକଙ୍କୁ ମାତ୍ର ୪ କି.ମି. ବାଟକୁ ପଡିଥାଏ ୧୫ କି.ମି. ଦୂରତା। ଖରା ଦିନରେ ଏଠାରେ ଅସ୍ଥାୟୀ ରାସ୍ତା ନିର୍ମାଣ କରାଯାଉଥିବା ବେଳେ ବର୍ଷା ଦିନେ ଦେଶୀ ଡଙ୍ଗା ହିଁ ସ୍ଥାନୀୟ ଲୋକଙ୍କ ଭରସା ପାଲଟିଥାଏ। ଏହି ନଦୀ ଉପରେ ରାଜ୍ୟ ସରକାରଙ୍କ ବିଜୁ ସେତୁ ଯୋଜନାରେ ପ୍ରାୟ ୧୯ କୋଟି ୫୫ ଲକ୍ଷ ଟଙ୍କା ବ୍ୟୟ ଅଟକଳରେ ଆରମ୍ଭ ହୋଇଛି ପୋଲ କାମ। ଏହାର ନିର୍ମାଣ କାର୍ଯ୍ୟ ଆସନ୍ତା ମେ ମାସ ୨୦୨୫ରେ ସାରିବା ପାଇଁ ସମୟ ଧାର୍ଯ୍ୟ କରିଛି ଗ୍ରାମ୍ୟ ଉନ୍ନୟନ ବିଭାଗ। ଅଞ୍ଚଳବାସୀ ଏହି ନଦୀ ଉପରେ ପୋଲ ନିର୍ମାଣ ପାଇଁ ଦୀର୍ଘ ୫୦ ବର୍ଷ ହେବ ଦାବି କରି ଆସୁଥିବା ବେଳେ ବିଳମ୍ବରେ ହେଲେ ମଧ୍ୟ ରାଜ୍ୟ ସରକାର ଗ୍ରହଣ କରି ଏଠାରେ ଏହି ବିଜୁ ସେତୁ ନିର୍ମାଣ କାମ ଆରମ୍ଭ କରିଥିବାରୁ ଅଞ୍ଚଳବାସୀଙ୍କ ପକ୍ଷରୁ କୃତଜ୍ଞତା କରାଯାଇଛି।
