ପାରାଦୀପ,୩ା୧୨(ସ୍ବ.ପ୍ର.): ପାରାଦୀପ ନୂଆବଜାରସ୍ଥିତ ସଞ୍ଜୟ ଗାନ୍ଧୀ ବିଦ୍ୟାଳୟରୁ ଗତ ୫ ରେ ପିଲାଙ୍କ ପାଇଁ ସରକାର ଯୋଗାଇଥିବା ଉପାଦେୟ ବହି (ଉଜ୍ଜ୍ବଳ ଉତ୍ଥାନ) ରଦ୍ଦି କାଗଜରେ ବିକ୍ରି ହୋଇଥିବା ନେଇ ବିଭିନ୍ନ ଗଣମାଧ୍ୟମରେ ପ୍ରକାଶ ପାଇଥିଲା। ଏହାକୁ ବିକ୍ରି କରିଥିତ୍ବା ଅଭିଯୁକ୍ତଙ୍କ ଉପରେ କଠୋର କାର୍ଯ୍ୟାନୁଷ୍ଠାନ ନିଆଯିବ ବୋଲି ସେତେବେଳେ ଶିକ୍ଷା ବିଭାଗର ପ୍ରମୁଖ ଅଧିକାରୀମାନେ କହିଥିଲେ। ଇତିମଧ୍ୟରେ ୨୭ ଦିନ ବିତିଯାଇଥିଲେ ମଧ୍ୟ ଏପର୍ଯ୍ୟନ୍ତ କୌଣସି କାର୍ଯ୍ୟାନୁଷ୍ଠାନ ନିଆ ଯାଇ ନଥିବା ଜଣାପଡ଼ିଛି।
ଏ ସମ୍ପର୍କରେ ବ୍ଲକ ଶିକ୍ଷାଧିକାରୀ ପବିତ୍ର କର କୁହନ୍ତି, ଏହି ଘଟଣାର ତଦନ୍ତ ନିମନ୍ତେ ୨ ଥର ଲୋକ ପଠାଯାଇ ତଦନ୍ତ କରାଯିବା ସହ ରିପୋର୍ଟ ଉଚ୍ଚ ଅଧିକାରୀଙ୍କୁ ଦିଆଯାଇଛି। ଏ ବିଷୟରେ ଜିଲା ଶିକ୍ଷାଧିକାରୀ ନିରଞ୍ଜନ ବେହେରା କୁହନ୍ତି, ଯେଉଁ ରିପୋର୍ଟ ଆସିଛି ତାହା ଅସ୍ପଷ୍ଟ ରହିଛି। ତଥାପି ଏନେଇ କାର୍ଯ୍ୟାନୁଷ୍ଠାନ ନିଆଯିବ। ସୂଚନାଯୋଗ୍ୟ, କରୋନା କଟକଣା ସମୟରେ ପିଲାଙ୍କ ପାଠପଢା ଦୁଇବର୍ଷ ଧରି ବାଧାପ୍ରାପ୍ତ ହୋଇଥିଲା। ଏନେଇ ୨୦୨୧ରେ ସରକାରୀ ସ୍କୁଲର ପିଲାଙ୍କ ପାଇଁ ଉପାଦେୟ ବହି ଉଜ୍ଜ୍ୱଳ ଉତ୍ଥାନ ଯୋଗାଇ ଦିଆଯାଇଥିଲା। ଏହାଦ୍ବାରା ପିଲାଙ୍କ ପାଠ ସହଜ ହେବା ସହ ପରୀକ୍ଷାରେ ଭଲ ମାର୍କ ରଖିହେବ ବୋଲି ଶିକ୍ଷା ବିଭାଗ ପକ୍ଷରୁ କୁହାଯାଇଥିଲା। ମାତ୍ର ସଞ୍ଜୟ ଗାନ୍ଧୀ ସ୍କୁଲରେ ଏହି ବହି ପିଲାଙ୍କୁ ଦେବା ବଦଳରେ ରଦ୍ଦି କାଗଜ ବେପାରୀଙ୍କୁ ଓଜନ ହିସାବରେ ବିକ୍ରି କରି ଦିଆଯାଇଥିଲା। ଗତ ନଭେମ୍ବର ୫ରେ ରଦ୍ଦି ବେପାରୀ ରଘୁଆ ସାହୁ କହିଥିଲେ, ସେ ସଞ୍ଜୟ ଗାନ୍ଧୀ ସ୍କୁଲରୁ ଏହି ୭୨ କେଜି ବହି ଆଣିଛନ୍ତି। ଏହାକୁ ଶିକ୍ଷୟିତ୍ରୀ ଶିକ୍ଷକମାନେ ବିକ୍ରି କରି ଦେଇଛନ୍ତି। ସେଥିପାଇଁ ସମ୍ପୃକ୍ତ ଶିକ୍ଷୟିତ୍ରୀ ଓ ଶିକ୍ଷକମାନେ ତାଙ୍କଠାରୁ ୪୦୦ ଟଙ୍କା ନେଇଛନ୍ତି। ଏହି ଘଟଣା ସମ୍ପର୍କରେ ସେତେବେଳେ ପ୍ରଧାନ ଶିକ୍ଷୟିତ୍ରୀ ସବିତା କୁମାରୀ ପରିଡାଙ୍କୁ ପଚାରିବାରେ ବହି ସିଆର୍ସିସି ବିକ୍ରି କରିଛନ୍ତି ବୋଲି କହିଥିଲେ। ସିଆର୍ସିସିି ସୁକାନ୍ତ ସ୍ବାଇଁ ଏ ପ୍ରସଙ୍ଗରେ କହିଛନ୍ତି, ସ୍କୁଲ ବାରଣ୍ଡାରେ ବହିଗୁଡ଼ିକ ଗଦା ହୋଇଥିଲା। ତାକୁ ଷ୍ଟାଫମାନେ ବିକ୍ରି କରିଦେଇଛନ୍ତି। ଏହାକୁ ନେଇ ଉଭୟ ସିଆର୍ସିସି ଓ ବିଦ୍ୟାଳୟର ଶିକ୍ଷୟିତ୍ରୀ, ଶିକ୍ଷକଙ୍କ ମଧ୍ୟରେ କଥା କଟାକଟି ହୋଇଥିଲା। ଗଣମାଧ୍ୟମରେ ପ୍ରକାଶ ପାଇବା ପରେ ଜଣେ ଅଧିକାରୀ ଆସି ଏକ ହୋଟେଲରେ ରହି ଶିକ୍ଷୟିତ୍ରୀ ଶିକ୍ଷକଙ୍କୁ ଡାକି ଏସମ୍ପର୍କରେ ଆଲୋଚନା କରିଥିଲେ। ଏହାପରେ ପୁଣିଥରେ ସ୍କୁଲ ଆସି ସମସ୍ତ ୧୩ ଶିକ୍ଷୟିତ୍ରୀ, ଶିକ୍ଷକଙ୍କ ସମେତ ରୋଷେଇ କରୁଥିବା ୪ ଜଣ ମହିଳାଙ୍କୁ ଡାକି ତଦନ୍ତ କରିଥିଲେ । ଏସବୁ ସତ୍ତ୍ୱେ ସ୍କୁଲରେ ସିସିଟିଭି ମଧ୍ୟ ରହିଛି। ମାତ୍ର ଘଟଣାର ଠିକ୍ ଭାବେ ତଦନ୍ତ ନ ହେବା ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି।
