କଟକ,୨୦ା୪(କାର୍ତ୍ତିକ ସାହୁ): ଦୀର୍ଘ ୧୫ବର୍ଷ ପରେ ନ୍ୟାୟିକ ଲଢ଼େଇର ଅନ୍ତ ଘଟିଛି। ଅଙ୍ଗନଓ୍ବାଡିି କର୍ମୀ ପଦବୀ ନିମନ୍ତେ ଚୟନ ହେବା ପରେ ନିରାଶ ହୋଇଥିବା ଜଣେ ମହିଳାଙ୍କୁ ଶେଷରେ ନ୍ୟାୟ ମିଳିଛି। ମହିଳା ଜଣକ ଅଙ୍ଗନଓ୍ବାଡି କର୍ମୀ ନିମନ୍ତେ ଯୋଗ୍ୟ ବିବେଚିତ ହୋଇଥିଲେ ସୁଦ୍ଧା ତାଙ୍କ ନାମକୁ ବେଆଇନ ଭାବେ କାଟି ଦିଆଯାଇଥିଲା। ବିଚାରପତି ଶଶିକାନ୍ତ ମିଶ୍ର ଏ ସଂକ୍ରାନ୍ତୀୟ ମାମଲାର ବିଚାର କରି ଆବେଦନକାରୀ ମହିଳା କେମତି ଖସରେଲଙ୍କୁ ଯଥାଶୀଘ୍ର ଅଙ୍ଗନଓ୍ବାଡିି କର୍ମୀ ଭାବେ ନିଯୁକ୍ତି ଦେବାକୁ ବଲାଙ୍ଗୀର ଜିଲା ଅନ୍ତର୍ଗତ ମୁରିବାହାଲ ସିଡିପିଓଙ୍କୁ ଆଦେଶ ଦେଇଛନ୍ତି। ଏଥିସହ ବିଜ୍ଞପ୍ତିର ନିୟମକୁ ଉଲ୍ଲଂଘନ କରି କାହାରିକୁ ଚାକିରି ଦିଆଯାଇ ପାରିବ ନାହିଁ ବୋଲି ହାଇକୋର୍ଟ ସ୍ପଷ୍ଟ କରିଛନ୍ତି। ସମ୍ପୃକ୍ତ ସିଡିପିଓ ପୂର୍ବ ନିଯୁକ୍ତିକୁ ବାତିଲ କରିବା ସହ ଆବେଦନକାରୀଙ୍କୁ ଉକ୍ତ ପଦରେ ନିଯୁକ୍ତି ଦେଇ ୪ ମାସ ମଧ୍ୟରେ ନିଯୁକ୍ତି ପ୍ରମାଣପତ୍ରର ନକଲ ହାଇକୋର୍ଟରେ ଦାଖଲ କରିବା ନିମନ୍ତେ ବିଚାରପତି ଆଦେଶ ଦେଇଛନ୍ତି।
ମାମଲାର ବିବରଣୀ ଅନୁସାରେ, ବଲାଙ୍ଗିର ଜିଲା ଡୁଙ୍ଗୁରିଗୁଡ଼ା ଅଙ୍ଗନବାଡ଼ି କେନ୍ଦ୍ରରେ ଅଙ୍ଗନଓ୍ବାଡି କର୍ମୀ ନିଯୁକ୍ତି ନିମନ୍ତେ ମୁରିବାହାଲ ଶିଶୁ ବିକାଶ ପ୍ରକଳ୍ପ ଅଧିକାରୀ (ସିଡିପିଓ)ଙ୍କ କାର୍ଯ୍ୟାଳୟ ପକ୍ଷରୁ ୨୦୦୯ ଜୁଲାଇ ୮ରେ ବିଜ୍ଞପ୍ତି ପ୍ରକାଶ ପାଇଥିଲା। ଆବେଦନକାରୀ କେମତି ଖସରେଲ ଏହି ପଦ ନିମନ୍ତେ ଆବେଦନ କରିଥିଲେ। ସେ ସର୍ବାଧିକ ୫୭% ନମ୍ବର ରହିଥିବାରୁ ତାଙ୍କୁ ଚୟନ କରାଯାଇଥିଲା। ମାତ୍ର ତାଙ୍କ ନାମକୁ କାଟି ଦିଆଯାଇ ୩୭% ନମ୍ବର ରଖିଥିବା ପ୍ରାର୍ଥୀଙ୍କୁ ନିଯୁକ୍ତି ଦିଆଯାଇଥିଲା। ଆବେଦନକାରୀ ମହିଳା ଜଣକ ସପ୍ତମ ଶ୍ରେଣୀରେ ଓଡ଼ିଆରେ ଫେଲ ହୋଇଥିବାରୁ ତାଙ୍କ ନାମ କାଟି ଦିଆଯାଇଥିବା ପ୍ରଶାସନ ପକ୍ଷରୁ ଦର୍ଶାଯାଇଥିଲା। ମାତ୍ର ବିଜ୍ଞପ୍ତି ଅନୁଯାୟୀ ଆବେଦନକାରୀ ଓଡ଼ିଆରେ ଲେଖିପଢ଼ି ଜାଣିଥିବା ଆବଶ୍ୟକ ଓ ମାଟ୍ରିକ ପରୀକ୍ଷାରେ ଅଧିକ ନମ୍ବର ରଖିଥିବା ପ୍ରାର୍ଥୀଙ୍କୁ ଅଗ୍ରାଧିକାର ଦେବା ନିମନ୍ତେ ନିୟମ ରହିଥିଲା। ନିଯୁକ୍ତି ପାଇବାରୁ ନିରାଶ ହେବା ପରେ ଆବେଦନକାରୀ ଖସରେଲ ନ୍ୟାୟ ପାଇଁ ହାଇକୋର୍ଟଙ୍କ ଦ୍ବାରସ୍ଥ ହୋଇଥିଲେ। ଆବେଦନକାରୀଙ୍କ ପକ୍ଷରୁ ଆଇନ୍ଜୀବୀ ଅଶ୍ବିନୀ କୁମାର ଦାସ ମାମଲା ପରିଚାଳନା କରୁଥିଲେ।
