ନୂଆଦିଲ୍ଲୀ,୧୭।୧୧ : ଲିଭ୍-ଇନ୍-ପାର୍ଟନର ଶ୍ରଦ୍ଧା ଓ୍ବାଲକରଙ୍କୁ ହତ୍ୟା କରିବା ପରେ ଶରୀରକୁ ୩୫ ଖଣ୍ଡ କରି ଦିଲ୍ଲୀର ବିଭିନ୍ନ ସ୍ଥାନରେ ଫିଙ୍ଗିଥିବା ଅଭିଯୁକ୍ତ ଆଫତାବ୍ ପୁନାଓ୍ବାଲାଙ୍କ ନାର୍କୋ ଆନାଲିସିସ୍ ବା ଲାଇ ଡିଟେକ୍ଟର ପରୀକ୍ଷା ହୋଇପାରେ। ଏଥିପାଇଁ କୋର୍ଟ ଅନୁମତି ଦେଇଥିବା ଜଣାପଡ଼ିଛି।
ଆଫତାବଙ୍କ ବୟାନରେ ତାଳମେଳ ରହୁ ନ ଥିବାରୁ ତାଙ୍କର ଲାଇ ଡିଟେକ୍ଟର ପରୀକ୍ଷା କରାଇବାକୁ ପୋଲିସ ଅନୁମତି ଲୋଡ଼ିଥିଲା। ଏଥିପାଇଁ କୋର୍ଟ ନିର୍ଦ୍ଦେଶ ଦେଇଥିବା ଜଣାପଡ଼ିଛି। ଗତ ମେ’ରେ ଶ୍ରଦ୍ଧାଙ୍କୁ ଦିଲ୍ଲୀର ଛତରପୁର ଅଞ୍ଚଳରେ ହତ୍ୟା ପରେ ତାଙ୍କ ମୃତଦେହକୁ ଖଣ୍ଡଖଣ୍ଡ କରି ଅଭିଯୁକ୍ତ ଆଫତାବ ୧୮ ଦିନ ଯାଏ ତାହାକୁ ଦିଲ୍ଲୀର ବିଭିନ୍ନ ସ୍ଥାନରେ ଫିଙ୍ଗିଥିଲେ। ପ୍ରମାଣ ଲୁଚାଇବା ପାଇଁ ସେ ସବୁପ୍ରକାର କୌଶଳ ଆପଣାଇଥିଲେ। ତେବେ ଜେରା ବେଳେ ସେ ଦେଇଥିବା ବୟାନ ପୋଲିସ୍ର ସନ୍ଦେହ ବଢ଼ାଇଥିଲା।
ମେ’ ୧୮ରେ ଶ୍ରଦ୍ଧାଙ୍କୁ ହତ୍ୟା କରାଯାଇଥିବାବେଳେ ଝଗଡ଼ା ପରେ ସେ ମେ’ ୨୨ରେ ଘର ଛାଡ଼ିଥିଲେ ବୋଲି ଆଫତାବ କହିଥିଲେ। ପୋଲିସ ସେମାନଙ୍କ ଫୋନ୍ର କଲ୍ ରେକର୍ଡ ଯାଞ୍ଚ କଲାପରେ ସତ ପଦାକୁ ଆସିଥିଲା। ଶ୍ରଦ୍ଧାଙ୍କ ନେଟ୍ ବ୍ୟାଙ୍କିଙ୍ଗ୍ ଆପ୍ରୁ ମେ’ ୨୬ରେ ଆଫତାବଙ୍କ ଆକାଉଣ୍ଟକୁ ୫୪,୦୦୦ ଟଙ୍କା ଟ୍ରାନ୍ସଫର ହୋଇଥିଲା। ଏଥିରୁ ଆଫତାବ୍ଙ୍କ ମିଛ ଧରାପଡ଼ିଯାଇଥିଲା।
