ଗାଜିଆବାଦ,୨୨ ।୮: ଆଫଗାନିସ୍ତାନରେ ତାଲିବାନ ଶାସନ ଆରମ୍ଭ କରିବା ପୂର୍ବରୁ ସେଠାରେ ଥିବା ଭାରତୀୟଙ୍କୁ ଉଦ୍ଧାର କରିବା କାମ ଚାଲିଛି । ରବିବାର ବାୟୁସେନାର ଏକ ବିମାନ ଯୋଗେ ୧୦୭ ଭାରତୀୟ ଗାଜିଆବାଦ ପହଞ୍ଚିଛନ୍ତି । ମୋଟ ୧୬୮ ଯାତ୍ରୀଙ୍କ ମଧ୍ୟରୁ ବାକି ସମସ୍ତେ ଆଫଗାନୀ ବୋଲି ଜଣାପଡିଛି । ତେବେ ବିମାନରୁ ଓହ୍ଲାଇବା ପରେ ଆଫଗାନିସ୍ତାନରେ ଜଣେ ଶିଖ ସାଂସଦ ଭାବୁକ ହୋଇ ପଡିଛନ୍ତି । ସେ କହିଛନ୍ତି ବହୁ ବର୍ଷରୁ ସେ ଆଫଗାନିସ୍ତାନରେ ରହି ଆସୁଥିଲେ । ଆଉ ଏବେ ଯେଉଁ ପରିସ୍ଥିତି ଉପୁଜୁଛି ଭାବିବା ବେଳକୁ ଆଖିରେ ଲୁହ ଆସି ଯାଉଛି । ୨୦ ବର୍ଷର ସରକାର ଏବେ ସମ୍ପୂର୍ଣ୍ଣ ଭାବେ ଶୂନ୍ୟକୁ ଚାଲି ଆସିଛି । ଉକ୍ତ ଶିଖ ସାଂସଦ ଜଣଙ୍କ ହେଉଛନ୍ତି ନରେନ୍ଦ୍ର ସିଂ ଖାଲସା । ଆଫଗାନିସ୍ତାନରୁ ଜୀବତ ଭାବେ ଆସି ଭାରତରେ ପହଞ୍ଚିବା ପରେ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଭାରତ ସରକାରଙ୍କୁ ଧନ୍ୟବାଦ ଦେଇଛନ୍ତି । ଏହାସହ ବାକି ଆଫଗାନିସ୍ତାନରେ ଫସି ରହିଥିବା ଶିଖଙ୍କୁ ବଞ୍ଚାଇବାକୁ ସେ ଅନୁରୋଧ କରିଛନ୍ତି । ଶିଖ ସାଂସଦ କହିଛନ୍ତି, ଭାରତ ସରକାରଙ୍କ ଏହା ହେଉଛି ବଡପଣ । ମିଳିଥିବା ସୂଚନାରୁ ଜଣାପଡେ କି ଏବେ ଗୋଟିଏ ଗୁରୁଦ୍ୱାରରେ ପ୍ରାୟ ୨୮୦ ଶିଖ ଫସି ରହିଛନ୍ତି । ଆଉ ଏମାନେ ବଞ୍ଚିବାକୁ ନିବେଦନ କରିଛନ୍ତି ।
