ପାପଡ଼ାହାଣ୍ଡି,୧୪।୧(ଡି.ଏନ୍.ଏ.): ନବରଙ୍ଗପୁର ଜିଲା ପାପଡ଼ାହାଣ୍ଡି ବ୍ଲକର ତିନୋଟି ସ୍ଥାନରେ ପ୍ରଶାସନ ବାଲ୍ୟବିବାହକୁ ରୋକିବାରେ ସଫଳ ହୋଇଛି। ଏଥିସହ ୩ ନାବାଳିକାଙ୍କୁ ଉଦ୍ଧାର କରି ସଚେତନ କରାଯିବା ସହ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ସୂଚନା ଅନୁଯାୟୀ ପାପଡାହାଣ୍ଡି ବ୍ଲକ ପଞ୍ଚାୟତ ସଦର ମହକୁମାର ଜଣେ ନାବାଳକ ସହ କୋଷାଗୁମୁଡ଼ା ଅଞ୍ଚଳର ଜଣେ ବାଳିକାଙ୍କ ବିବାହ କରିବା ପାଇଁ ଡେଙ୍ଗାଗୁଡ଼ା ଗ୍ରାମକୁ ନିଆଯାଇଥିଲା। ଆଦିବାସୀ ପରମ୍ପରା ଅନୁଯାୟୀ ଦୁହିଁଙ୍କ ବିବାହ କରାଇବାକୁ ନିଷ୍ପତ୍ତି ମଧ୍ୟ ହୋଇଥିଲା। ହେଲେ ନାବାଳିକାଙ୍କ ମାଆ, ବାପା ମା ଅବଗତ ନ ଥିଲେ। ବିଶେଷ ସୂତ୍ରରୁ ଖବର ପାଇଁ ବ୍ଲକ ପ୍ରଶାସନ ପକ୍ଷରୁ ଶିଶୁ ବିକାଶ ଅଧିକାରୀ ଏସ୍. ଗୀତା, ସୁପରଭାଇଜର ସୁକୁମୋନି ବେହେରା, ବ୍ଲକ ସଂଯୋଜକ ଉତ୍ତମ କୁମାର ବେହେରା ଏବଂ ଅଙ୍ଗନଓ୍ବାଡି କର୍ମୀ ନାବାଳକଙ୍କ ଘରେ ପହଞ୍ଚି ବୁଝାଶୁଝା କରିଥିଲେ। ବାଲ୍ୟ ବିବାହ ଏକ ଅପରାଧ ବୋଲି କହିବା ସହ ରାଜିନାମା ଲେଖି ପରେ ନାବାଳିକା କୁ ତାଙ୍କ ପରିବାର ବର୍ଗଙ୍କୁ ହସ୍ତାନ୍ତର କରିଥିଲେ। ସେହିପରି ପାପଡ଼ାହାଣ୍ଡି ବ୍ଲକ ଖୁଟବାଇ ପଞ୍ଚାୟତ ସଦର ମହକୁମାର ଜଣେ ନାବାଳିକା ସହ ଡାବୁଗାଁ ବ୍ଲକ ବଡ଼ଅଲମା ପଞ୍ଚାୟତ ଅନ୍ତର୍ଗତ ଚିକିଲିଆଗୁଡ଼ା ଗ୍ରାମର ନାବାଳକଙ୍କ ଖୁଟବାଇ ଗ୍ରାମରେ ବିବାହ କାର୍ଯ୍ୟକ୍ରମ ଜାରି ରହିଥିଲା। ଖବର ପାଇଁ ଶିଶୁ ବିକାଶ ଅଧିକାରୀ, ବ୍ଲକ ସଂଯୋଜକ ପହଞ୍ଚି ବୁଝାଶୁଝା କରି ବିବାହ ରୋକିବାରେ ସଫଳ ହୋଇଥିଲେ। ଉଭୟ ପରିବାର ବୁଝିବା ସହ ଘରକୁ ଚାଲିଯାଇଥିଲେ। ସେହିପରି ପାପଡ଼ାହାଣ୍ଡି ଗ୍ରାମର ବସଷ୍ଟାଣ୍ଡ ଛକ ସାହିର ନାବାଳକ ସହ ଜୟପୁର ଗ୍ରାମର ନାବାଳିକାଙ୍କ ବିବାହ କରିବା ପାଇଁ ପାପଡ଼ାହାଣ୍ଡି ଅଣାଯାଇଥିଲା। ଉଭୟ ଏକା ସହିତ କଲେଜରେ ପଢ଼ିବା ସମୟରେ ପ୍ରେମ ସମ୍ପର୍କ ଗଢ଼ି ଉଠିଥିଲା। ବିବାହ ପାଇଁ ପ୍ରସ୍ତୁତି ଚାଲିଥିବାବେଳେ ଅଧିକାରୀମାନେ ପହଞ୍ଚି ବୁଝାଶୁଝା କରି ବିବାହକୁ ଅଟକାଇଥିଲେ। ଏଥିସହ ରାଜିନାମା ପରେ ନାବାଳିକାଙ୍କୁ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି।
