ନୂଆଦିଲ୍ଲୀ,୨୫।୩ : ବରିଷ୍ଠ ଭାଜପା ନେତା ତଥା ପୂର୍ବତନ କେନ୍ଦ୍ର ମନ୍ତ୍ରୀ ରବି ଶଙ୍କର ପ୍ରସାଦ ଶନିବାର ଏହି ଅଭିଯୋଗକୁ ଖଣ୍ଡନ କରିଛନ୍ତି ଯେ କଂଗ୍ରେସ ନେତା ରାହୁଲ ଗାନ୍ଧୀଙ୍କ ସଦସ୍ୟତା ରଦ୍ଦ କରାଯାଇଛି କାରଣ ସେ ଆଦାନୀ ପ୍ରସଙ୍ଗରେ ବିଭିନ୍ନ ପ୍ରଶ୍ନ କରୁଥିଲେ। ତାଙ୍କର ପ୍ରଶ୍ନରେ ଭୟଭୀତ ହୋଇ ଭାଜପା ସରକାରଙ୍କ ନିର୍ଦ୍ଦେଶରେ ଏଭଳି କରାଯାଇଥିବା ଅଭିଯୋଗରେ କୌଣସି ସତ୍ୟତା ନାହିଁ ବୋଲି ରବିଶଙ୍କର କହିଛନ୍ତି।
ରାହୁଲ ଗାନ୍ଧୀ ଦିଲ୍ଲୀରେ ଏକ ଗଣମାଧ୍ୟମ ସମ୍ମିଳନୀକୁ ସମ୍ବୋଧିତ କରିବାର କିଛି ସମୟ ପରେ ରବିଶଙ୍କର ଏହି ଅଭିଯୋଗ କରିଛନ୍ତି। ଗୁଜରାଟ କୋର୍ଟ ସ୍ବାରା ଦୋଷୀ ସାବ୍ୟସ୍ତ ହେବା ପରେ କଂଗ୍ରେସ ଷ୍ଟେ ଅର୍ଡର ଆଣିବାକୁ ଚାହୁଁ ନାହିଁ। କାରଣ ଏକମାସ ପରେ ହେବାକୁ ଥିବା କର୍ନାଟକ ବିଧାନସଭା ନିର୍ବାଚନରେ କଂଗ୍ରେସ ଏହାକୁ ମୁଖ୍ୟ ପ୍ରସଙ୍ଗ କରିବାର ଯୋଜନା କରିଛି।
ପ୍ରିୟଙ୍କା ଗାନ୍ଧୀ ଭଦ୍ରାଙ୍କ ବିବୃତ୍ତି ନିଶ୍ଚିତ କରୁଛି ଯେ କର୍ନାଟକ ନିର୍ବାଚନକୁ ଦୃଷ୍ଟିରେ ରଖି କଂଗ୍ରେସ ଏହାର ପ୍ରସିଦ୍ଧ ଆଇନ ବିଶେଷଜ୍ଞଙ୍କ ମତାମତ ଏାକ୍ଷେତ୍ରରେ ନେଇ ନାହିଁ। ପୱନ ଖେରାଙ୍କ କ୍ଷେତ୍ରରେ ଦେଖାଯାଇଥିବା ତତ୍ପରତାରୁ ଏହା ବୁଝି ହେଉଛି।
ଆମେ ଆଦାନୀଙ୍କ ବିଷୟରେ ସୂଚନା ଦେବାକୁ ଏଠାକୁ ଆସିନାହୁଁ। କିନ୍ତୁ, ରାହୁଲ ତାଙ୍କର ଅଯୋଗ୍ୟତାକୁ ଆଦାନୀଙ୍କ ସହ ଯୋଡି ଲୋକଙ୍କୁ ବିଭ୍ରାନ୍ତ କରିବାକୁ ଚେଷ୍ଟା କରୁଛନ୍ତି। ୨୦୧୯ରେ ଅପମାନ ଜନକ ମନ୍ତବ୍ୟ ସହ ଜଡିତ ଏକ ମାମଲାରେ ତାଙ୍କୁ ଦୋଷୀ ସାବ୍ୟସ୍ତ କରାଯାଇଛି।
ୟୁପିଏ କେନ୍ଦ୍ରରେ କ୍ଷମତାରେ ଥିବାବେଳେ କଂଗ୍ରେସ ଶାସିତ ରାଜ୍ୟ ରାଜସ୍ଥାନରେ ଆଦାନୀ ଗୋଷ୍ଠୀ ବ୍ୟବସାୟ କରି ଚୁକ୍ତିନାମା କରିଥିଲା। ଏବେ କଂଗ୍ରେସ ଆଦାନୀ ପ୍ରସଙ୍ଗରେ ବିରୋଧ କାହିଁକି କରୁଛି ବୋଲି ସେ ଅଭିଯୋଗ କରିଛନ୍ତି।
