ନୂଆଦିଲ୍ଲୀ,୧।୧୦: ପାର୍ବଣ ଋତୁ ଆରମ୍ଭରୁ ହିଁ ସାଧାରଣ ଗ୍ରାହକଙ୍କ ପକେଟ୍ ଉପରେ ଚାପ ପଡ଼ିବାକୁ ଯାଉଛି। ଅକ୍ଟୋବର ୧ ତାରିଖ ଅର୍ଥାତ୍ ଆଜିଠାରୁ AC, LED TV, ଫ୍ରିଜ୍, ୱାଶିଂ ମେସିନ୍ ସମେତ ବିଭିନ୍ନ କନ୍ଜ୍ୟୁମର ଇଲେକ୍ଟ୍ରୋନିକ୍ସ (Consumer Electronics) ସାମଗ୍ରୀର ଦର ବୃଦ୍ଧି ପାଇଛି। ବିଭିନ୍ନ କମ୍ପାନୀ ଓ ପ୍ରୋଡକ୍ଟ ଆଧାରରେ ଏହି ସାମଗ୍ରୀଗୁଡ଼ିକର କ୍ରୟ ମୂଲ୍ୟରେ ପ୍ରାୟ ୩ ରୁ ୮ ପ୍ରତିଶତ ପର୍ଯ୍ୟନ୍ତ ବୃଦ୍ଧି ଦେଖିବାକୁ ମିଳିଛି। ଫଳରେ ଏହି ଫେଷ୍ଟିଭ୍ ସିଜନ୍ରେ ନୂଆ ଗୃହୋପକରଣ କିଣିବାକୁ ଯୋଜନା କରୁଥିବା ଗ୍ରାହକଙ୍କୁ ପୂର୍ବ ଅପେକ୍ଷା ଅଧିକ ଟଙ୍କା ଖର୍ଚ୍ଚ କରିବାକୁ ପଡ଼ିବ।
କେଉଁ ସାମଗ୍ରୀର ଦାମ୍ କେତେ ବଢ଼ିଲା?
ଇଲେକ୍ଟ୍ରୋନିକ୍ସ ସାମଗ୍ରୀ ମଧ୍ୟରେ ଏୟାର କଣ୍ଡିସନର (AC)ର ଦର ସବୁଠାରୁ ଅଧିକ ବୃଦ୍ଧି ପାଇଛି:
-
AC: ଦାମ୍ ପ୍ରାୟ ୫ ରୁ ୮ ପ୍ରତିଶତ ପର୍ଯ୍ୟନ୍ତ ବଢ଼ିଛି।
-
LED TV: କ୍ରୟ ମୂଲ୍ୟରେ ୩ ରୁ ୭ ପ୍ରତିଶତ ବୃଦ୍ଧି ଘଟିଛି।
-
ଫ୍ରିଜ୍ ଓ ୱାଶିଂ ମେସିନ୍: ଦୈନନ୍ଦିନ ବ୍ୟବହାର୍ଯ୍ୟ ଏହି ଉପକରଣଗୁଡ଼ିକ ପ୍ରାୟ ୩ ରୁ ୪ ପ୍ରତିଶତ ମହଙ୍ଗା ହୋଇଛି।
କେଉଁ କମ୍ପାନୀଗୁଡ଼ିକ ବଢ଼ାଇଲେ ଦର?
ଇଟି (ET) ରିପୋର୍ଟ ଅନୁଯାୟୀ Bluestar, Godrej Appliances, Haier, Daikin ଏବଂ Super Plastronics ଭଳି ପ୍ରମୁଖ କମ୍ପାନୀଗୁଡ଼ିକ ନିଜ ପ୍ରୋଡକ୍ଟର ଦାମ୍ ୪ ରୁ ୧୦ ପ୍ରତିଶତ ପର୍ଯ୍ୟନ୍ତ ବଢ଼ାଇ ସାରିଛନ୍ତି। ଅପରପକ୍ଷରେ, PTI ରିପୋର୍ଟ ଅନୁସାରେ LG ଏବଂ Bosch Home Comfort (ଯାହା ଭାରତରେ Hitachi ବ୍ରାଣ୍ଡ୍ର AC ବିକ୍ରି କରେ) ମଧ୍ୟ AC ଦରରେ ପ୍ରାୟ ୫ ପ୍ରତିଶତ ବୃଦ୍ଧି କରିଛନ୍ତି। ତେବେ Panasonic କମ୍ପାନୀ ବର୍ତ୍ତମାନ ବଜାର ସ୍ଥିତି ଉପରେ ନଜର ରଖିଛି ଏବଂ ପରବର୍ତ୍ତୀ ସମୟରେ ଦର ବୃଦ୍ଧି ନେଇ ନିଷ୍ପତ୍ତି ନେଇପାରେ।
ଏହି ସାମଗ୍ରୀଗୁଡ଼ିକର ଦର ବୃଦ୍ଧି ପଛରେ ମୁଖ୍ୟ କାରଣ ହେଉଛି କଞ୍ଚାମାଲର ବର୍ଦ୍ଧିତ ମୂଲ୍ୟ। କୋପର (ତମ୍ବା), ଷ୍ଟିଲ୍, ଆଲୁମିନିୟମ୍ ଏବଂ ପ୍ଲାଷ୍ଟିକ୍ ଭଳି ଜରୁରୀ ସାମଗ୍ରୀର ଦାମ୍ ବୃଦ୍ଧି ପାଇଛି। ଏହାସହ ଗୋଟିଏ ସ୍ଥାନରୁ ଅନ୍ୟ ସ୍ଥାନକୁ ଜିନିଷ ପଠାଇବାର ପରିବହନ ଖର୍ଚ୍ଚ (Freight & Shipping Cost) ମଧ୍ୟ ଯଥେଷ୍ଟ ବଢ଼ିଯାଇଛି, ଯାହାର ସିଧାସଳଖ ପ୍ରଭାବ କମ୍ପାନୀଗୁଡ଼ିକର ଉତ୍ପାଦନ ଖର୍ଚ୍ଚ ଉପରେ ପଡ଼ିଛି।
ଦର ବୃଦ୍ଧି ସତ୍ତ୍ୱେ ଗ୍ରାହକଙ୍କ ପାଇଁ ସାମାନ୍ୟ ଆଶ୍ୱାସନାର ସୁଯୋଗ ରହିଛି। ବଜାରର କେତେକ ଦୋକାନରେ ଏବେ ବି ପୁରୁଣା ଷ୍ଟକ୍ ମହଜୁଦ୍ ଅଛି, ଯାହାକୁ ସେମାନେ ପୁରୁଣା ଦରରେ ବିକ୍ରି କରୁଛନ୍ତି। ତେଣୁ ନୂଆ ସାମଗ୍ରୀ କିଣିବା ପୂର୍ବରୁ ଶୋ’ରୁମ୍ଗୁଡ଼ିକରେ ପୁରୁଣା ଷ୍ଟକ୍ ବିଷୟରେ ପଚାରି ବୁଝିଲେ ବର୍ଦ୍ଧିତ ମୂଲ୍ୟରୁ ରକ୍ଷା ମିଳିପାରିବ। ତଥାପି, ମାସର ପ୍ରଥମ ଦିନରୁ ହିଁ ଅଧିକାଂଶ ବ୍ୟବସାୟୀ ନୂଆ ଦରରେ ସାମଗ୍ରୀ ବିକ୍ରି କରିବା ଆରମ୍ଭ କରିଦେଇଛନ୍ତି।
