ପାରଳାଖେମୁଣ୍ଡି:୧୬।୮(ଡି.ଏନ୍.ଏ.): ଗଜପତି ଜିଲାପାରଳାଖେମୁଣ୍ଡିଠାରେ ଘଟିଥିବା ଏସିଏଫ୍ ସମ୍ୟ ରଞ୍ଜନ ମୃତ୍ୟୁ ଘଟଣାରେ କ୍ରାଇମବ୍ରାଞ୍ଚ ଟିମ ସୋମବାର ବନ ବିଭାଗର ୬ ଜଣ କର୍ମଚାରୀଙ୍କୁ ପଚରାଉଚରା କରିଛି। ସେମାନଙ୍କୁ ପାରଳାଖେମୁଣ୍ଡି ଥାନାକୁ ଆଣି ଏକ ସ୍ବତନ୍ତ୍ର କୋଠରିରେ ରଖି ତଦନ୍ତ ଆରମ୍ଭ କରିଛି। ଏହି ୬ ଜଣଙ୍କ ମଧ୍ୟରେ ରହିଛନ୍ତି ରୋଷେୟା ମନ୍ମଥ କୁମ୍ବ, ଏସିଏଫଓ ଗୌରୀ ରଥ, ଏସିଏଫଓ କେ .ଭାସ୍କର ରାଓ, ନାରାୟଣପୁର ରେଞ୍ଜର ଏଲିଫ୍ୟାଣ୍ଟ ସ୍କ୍ବାଡ୍ ଆକାଶ ପ୍ରଧାନ, ଏବଂ ଦୁଇଜଣ ଜଗୁଆଳି ଅଜିତ ବେହେରା, ସନ୍ତୋଷ ବିଶ୍ବାଳ। ଏହି ୬ ଜଣଙ୍କ ମଧ୍ୟରୁ ଆଗରୁ ମଧ୍ୟ କେତେଜଣକୁ ଡାକି ପୋଲିସ ତଦନ୍ତ କରିଥିଲା। ବର୍ତ୍ତମାନ ସୁଦ୍ଧା ଦୁଇଜଣ ଏସିଏଫଓଙ୍କୁ ଦିନ ୧୦ଟାରୁ ୪ ଘଣ୍ଟା ଜେରା କରାଗଲା ପରେ ୪ଟାରେ ଆଉଥରେ ଜେରା କରାଯିବ ବୋଲି କ୍ରାଇମବ୍ରାଞ୍ଚ ଡିଏସ୍ପି ଜ୍ଞାନ ରଞ୍ଜନ ମିଶ୍ର ସୂଚନା ଦେଇଛନ୍ତି।
ସୂଚନାଯୋଗ୍ୟ, ସୌମ୍ୟଙ୍କ ମୃତ୍ୟୁ ଦୁର୍ଘଟଣା ନା ଆତ୍ମହତ୍ୟା ନା ହତ୍ୟା ଜାଣିବା ପାଇଁ କ୍ରାଇମବ୍ରାଞ୍ଚ ଟିମ ୩ ଦିନ ଧରି ତଦନ୍ତ କରୁଛି। ଏହା ବ୍ୟତୀତ ଡିଏଫଓ ସଂଗ୍ରାମ କେଶରୀ ବେହେରାଙ୍କୁ ମଧ୍ୟ ଜେରା କରିପାରେ ଏହି ଟିମ। ସୌମ୍ୟଙ୍କ ପରିବାରକୁ ମଧ୍ୟ ଭେଟିପାରେ କ୍ରାଇମବ୍ରାଞ୍ଚ । ସୌମ୍ୟଙ୍କ ସରକାରୀ ବାସଭବନରେ ଗତ ଶନିବାର ତିନି ଘଣ୍ଟାରୁ ଊଦ୍ଧର୍ବ ସମୟ ତର୍ଜମା କରି ଫେରିଥିଲା ଏହି ଟିମ।
