ମୋରବି,୧।୧୧ : ଗୁଜରାଟର ମୋରବିରେ ଘଟିଥିବା ଝୁଲାପୋଲ ଦୁର୍ଘଟଣାରେ ୪୭ ଜଣ ଶିଶୁଙ୍କ ସମେତ ୧୩୫ ଜଣଙ୍କର ମୃତ୍ୟୁ ଘଟିଛି। ଏହାକୁ ନେଇ ବିରୋଧୀ ଦଳଙ୍କ ପକ୍ଷରୁ ଭାଜପା ନେତୃତ୍ୱାଧୀନ ଗୁଜରାଟ ସରକାରଙ୍କୁ ଘେରିବା ଆରମ୍ଭ ହୋଇଛି। ଔପନିବେଶ ସମୟର ପୋଲର ନବୀକରଣ ପାଇଁ ମୋରବି ମ୍ୟୁନିସିପାଲିଟି କର୍ପୋରେଶନ ଘଣ୍ଟା ଏବଂ ବଲ ତିଆରି କରୁଥିବା ଏକ ଘରୋଇ କମ୍ପାନୀ ଓରେଭାକୁ ଏନେଇ ଠିକା ବିନା ଟେଣ୍ଡରରେ ଦେଇଥିଲା। ବର୍ତ୍ତମାନ ସୁଦ୍ଧା କମ୍ପାନୀର ୯ ଜଣ ତଳସ୍ତରର କର୍ମଚାରୀଙ୍କୁ ଏହି ମାମଲାରେ ଗିରଫ କରାଯାଇଛି। ଏଥି ସହିତ କମ୍ପାନୀର ମାଲିକ ଏବଂ ପ୍ରମୁଖ ଅଧିକାରୀମାନେ ନିଖୋଜ ହୋଇଯାଇଛନ୍ତି। କମ୍ପାନୀର ବିଶାଳ ଫାର୍ମହାଉସରେ ତାଲା ପଡିଛି। ଏପରିକି ଜଣେ ସୁରକ୍ଷାକର୍ମୀ ମଧ୍ୟ ଦୃଶ୍ୟମାନ ହେଉନାହାଁନ୍ତି।
ସ୍ଥାନୀୟ ଲୋକେ କହିଛନ୍ତି ଯେ ଅକ୍ଟୋବର ୩୦ରୁ ଓରେଭାର ପରିଚାଳନା ନିର୍ଦ୍ଦେଶକ ଜୟସୁଖଭାଇ ପଟେଲଙ୍କ ଦେଖା ନାହିଁ। ଝୁଲା ପୋଲ ଖୋଲିବାର ଗୋଟିଏ ଦିନ ପୂର୍ବରୁ ସେ ଅକ୍ଟୋବର ୨୪ ରେ ସର୍ବସାଧାରଣରେ ଦାବି କରିଥିଲେ ଯେ ନବୀକରଣ ହୋଇଥିବା ପୋଲ ଅତି କମରେ ୮ ରୁ ୧୦ ବର୍ଷ ପର୍ଯ୍ୟନ୍ତ କାର୍ଯ୍ୟ କରିବ। ତେବେ ଏହା ଖୋଲିବାର ମାତ୍ର ୪ ଦିନ ମଧ୍ୟରେ ଭୁଶୁଡି ପଡିଥିଲା। ମୋରବି ମ୍ୟୁନିସିପାଲିଟି କର୍ପୋରେଶନ ଜୟସୁଖଭାଇଙ୍କ ଅଜନ୍ତା ମାନ୍ୟୁଫାକଚରିଂ ଲିମିଟେଡ ଚୁକ୍ତିନାମା ସ୍ବାକ୍ଷର କରିଥିଲା। ଏହାର ପ୍ୟାରେଣ୍ଟ କମ୍ପାନୀ ହେଉଛି ଓରେଭା। ଅଜନ୍ତା ଏକ ଘଣ୍ଟା ନିର୍ମାତା ଭାବରେ ଜଣାଶୁଣା। ବଡ଼ ଅଧିକାରୀଙ୍କୁ ଗିରଫ ନକରି ତଳିଆ କର୍ମଚାରୀଙ୍କୁ ଗିରଫ କରି ସରକାର ଜାଣିଶୁଣି ନୀରବ ହୋଇ ବସିଥିବା ଲୋକେ ଅଭିଯୋଗ କରିଛନ୍ତି।
ନଭେମ୍ବର ୨ ରେ ଏହି ଦୁଃଖଦ ଘଟଣାର ମୃତକଙ୍କ ପାଇଁ ରାଜ୍ୟବ୍ୟାପୀ ଶୋକ ପାଳନ କରାଯିବ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ଗାନ୍ଧିନଗର ରାଜ ଭବନରେ ଆୟୋଜିତ ଏକ ଉଚ୍ଚସ୍ତରୀୟ ବୈଠକରେ ଏହି ନିଷ୍ପତ୍ତି ନିଆଯାଇଛି। ଏଥି ସହିତ ଦୁର୍ଘଟଣା ମୃତକଙ୍କ ପୋଷ୍ଟମର୍ଟମ କରାଯିବ ନାହିଁ ବୋଲି ରାଜ୍ୟ ସରକାର ନିଷ୍ପତ୍ତି ନେଇଛନ୍ତି।
