ବୌଦ୍ଧ,୧୩।୮(ସ୍ବ.ପ୍ର.): ବୌଦ୍ଧ ଜିଲା ହରଭଙ୍ଗା ବ୍ଲକ ପୁରୁଣାକଟକ ଥାନା ଲୁଣିବାହାଲ ବଜାର ଉପରେ ଗତ ଗୁରୁବାର ବାପ ପୁଅଙ୍କ ଆକ୍ରମଣରେ ଯୁବରାଜପୁର ଗ୍ରାମର ସମ୍ପର୍କୀୟ ଭାଇ ଝରିଆ ବାରିକ(୫୬)ଙ୍କ ମୃତ୍ୟୁ ଘଟିଥିଲା। ପୋଲିସର ତଦନ୍ତ ଓ ମୃତକ ଝରିଆଙ୍କ ପରିବାର ଅଭିଯୋଗକୁ ଭିତ୍ତିକରି ପୋଲିସ ଯୁବରାଜପୁର ଗ୍ରାମର ସୁବାସ ବାରିକ(୫୫) ଓ ପୁଅ ଅସିତ ଓରଫ ସିଲୁ (୩୩)ଙ୍କୁ ଗିରଫ କରି ହତ୍ୟା ଅଭିଯୋଗରେ କୋର୍ଟ ଚାଲାଣ କରିଛି। ପ୍ରକାଶ ଥାଉକି, ଯୁବରାଜପୁର ଗ୍ରାମର ଝରିଆ ଓ ସୁବାସଙ୍କ ମଧ୍ୟରେ ପୂର୍ବରୁ ଜମିବାଡି ବିବାଦକୁ ନେଇ ଉଭୟ ପରିବାର ମଧ୍ୟରେ ଗଣ୍ଡଗୋଳ ଲାଗିରହିଥିଲା। ଗୁରୁବାର ଲୁଣିବାହାଲଠାରେ ବାପ ପୁଅ ମିଶି କାଠଫାଳିଆ ଓ କଇଁଚିରେ ଝରିଆଙ୍କୁ ମରଣାନ୍ତକ ଆକ୍ରମଣ କରିଥିଲେ। ଘଟଣାସ୍ଥଳରେ ପୁରୁଣାକଟକ ପୋଲିସ ପହଞ୍ଚତ୍ ଝରିଆଙ୍କୁ ଉଦ୍ଧାର କରି ପୁରୁଣାକଟକ ମେଡିକାଲକୁ ନେଇଥିଲେ। ସେଠାରେ ଝରିଆଙ୍କ ମୃତ୍ୟୁ ଘଟିଥିଲା। ଏହି ଘଟଣାରେ ସୁବାସ ଓ ଅସିତଙ୍କୁ ପୋଲିସ ଗିରଫ କରି ଶୁକ୍ରବାର କୋର୍ଟ ଚାଲାଣ କରିଥିବା ଥାନା ଅଧିକାରୀ ଜ୍ୟୋତ୍ସ୍ନା କାଉରି ପ୍ରକାଶ କରିଛନ୍ତି।
