ସମ୍ବଲପୁର/ପଡ଼ିଆବାହାଲ, ୯।୬ (ପ୍ରମୋଦ ବହିଦାର/ରାଧାମୋହନ ଷଡ଼ଙ୍ଗୀ):ସମ୍ବଲପୁର ଜିଲା ଶାସନ ଥାନା ଅନ୍ତର୍ଗତ ଗିରିପାଲି ଅଞ୍ଚଳରେ ମା’ଝିଅଙ୍କୁ ରବିବାର ବିଳମ୍ବିତ ରାତିରେ ପଡ଼ୋଶୀ ଯୁବକ ବେଣ୍ଟଲଗା ସାଇକେଲ କ୍ରାଙ୍କରେ ହାଣି ହତ୍ୟା କରିଛନ୍ତି। ପରେ ଯୁବକ ଜଣକ ନିଜେ ୧୧୨କୁ ଫୋନ୍କରି ପୋଲିସକୁ ହତ୍ୟା ସମ୍ପର୍କରେ ଜଣାଇଥିଲେ। ସୂଚନା ପାଇ ରାତିରେ ପୋଲିସ ପହଞ୍ଚତ୍ ଯୁବକଙ୍କୁ ଧରିବା ସହ ତାଙ୍କଠାରୁ ହତ୍ୟାରେ ବ୍ୟବହୃତ ବେଣ୍ଟଲଗା ସାଇକେଲ କ୍ରାଙ୍କକୁ ଜବତ କରିଥିଲା। ମୃତକଦ୍ୱୟ ହେଲେ ଗିରିପାଲି ଗ୍ରାମ ଖଡ଼ିଆପଡ଼ାର ଉର୍କୁଲି ପାତ୍ର (୬୦) ଓ ତାଙ୍କ ଝିଅ ଲିଳିମା ଯୋଉଡ଼ା (୩୫)। ମୃତା ଲିଳିମା ୩ ବର୍ଷ ହେଲା ସ୍ବାମୀଙ୍କଠାରୁ ଅଲଗା ହୋଇ ବାପଘରେ ରହୁଛନ୍ତି। ତାଙ୍କର ୩ ବର୍ଷ ବୟସର ଏକ ଶିଶୁକନ୍ୟା ଅଛି। ତଦନ୍ତ ପରେ ପୋଲିସ ପଡୋଶୀ ଯୁବକ ଅଜୟ ପ୍ରଧାନ(୨୪)ଙ୍କୁ ଗିରଫ କରିଛି। ପୂର୍ବ ଶତ୍ରୁତା କାରଣରୁ ଅଜୟ ଉଭୟ ମା’ ଓ ଝିଅଙ୍କୁ ହତ୍ୟା କରିଥିବା ପ୍ରାଥମିକ ସୂତ୍ରରୁ ଜଣାପଡ଼ିଥିବା ପୋଲିସ କହିଛି।
ଏଏସ୍ପି ଶ୍ରୀମନ୍ତ ବାରିକଙ୍କ ସୂଚନା ଅନୁଯାୟୀ, ରବିବାର ପରିବାରର ଅନ୍ୟ ସଦସ୍ୟ କୌଣସି କାମରେ ରଙ୍ଗିଆଟିକ୍ରାସ୍ଥିତ ବନ୍ଧୁଘରକୁ ଯାଇଥିଲେ। ଘରେ କେବଳ ଉର୍କୁଲି, ଲିଳିମା ଓ ଶିଶୁକନ୍ୟା ଥିଲେ। ପ୍ରବଳ ଗରମ ଯୋଗୁ ରାତିରେ ମା’, ଝିଅ ଘର ବାହାର ଅଗଣାରେ ଖଟ ପକାଇ ଶୋଇଥିଲେ। ତେବେ ଘରେ ଅନ୍ୟ କେହି ନ ଥିବାର ସୁଯୋଗରେ ବିଳମ୍ବିତ ରାତିରେ ଅଜୟ ଉଭୟଙ୍କୁ ଶୋଇଥିବା ଅବସ୍ଥାରେ ବେଣ୍ଟଲଗା ସାଇକେଲ କ୍ରାଙ୍କରେ ଆକ୍ରମଣ କରିଥିଲେ। ଫଳରେ ଘଟଣାସ୍ଥଳରେ ହିଁ ଉଭୟଙ୍କର ମୃତ୍ୟୁ ହୋଇଯାଇଥିଲା। ତେବେ ପାଖରେ ଶୋଇଥିବା ଶିଶୁକନ୍ୟାର କୌଣସି କ୍ଷତି ହୋଇ ନ ଥିଲା। ରାତିରେ ପୋଲିସ ପହଞ୍ଚତ୍ବାବେଳକୁ ଶିଶୁକନ୍ୟା କାନ୍ଦୁଥିଲା।
ସୋମବାର ସକାଳେ ଏଏସ୍ପି ବାରିକଙ୍କ ସହ ଡିଏସ୍ପି ଯୋଗେଶ ପଣ୍ଡା, ଶାସନ ଥାନା ଆଇଆଇସି ପ୍ରବୀର ତ୍ରିପାଠୀ ସାଇଣ୍ଟିଫିକ୍ ଦଳ ସହ ଘଟଣାସ୍ଥଳରେ ପହଞ୍ଚତ୍ ତଦନ୍ତ ଆରମ୍ଭ କରିଛନ୍ତି। ମୃତା ଉର୍କୁଲିଙ୍କ ଜ୍ୟେଷ୍ଠପୁତ୍ର ଜୟନ୍ତ ପାତ୍ରଙ୍କ ଏତଲାକ୍ରମେ ପୋଲିସ ନଂ.୧୫୮/୨୬ରେ ମାମଲା ରୁଜୁ କରିଛି। ପୋଲିସ ଉଭୟ ମୃତଦେହକୁ ଜବତ ପରେ ବ୍ୟବଚ୍ଛେଦ ପାଇଁ ବୁର୍ଲାର ଭିମସାରକୁ ପଠାଇଛି। ବ୍ୟବଚ୍ଛେଦ ପରେ ପୋଲିସ ପରିବାର ଲୋକଙ୍କୁ ମୃତଦେହ ହସ୍ତାନ୍ତର କରିଛି। ମୃତା ଉର୍କୁଲିଙ୍କ କନିଷ୍ଠ ପୁତ୍ର ସାଇବନ୍ତ କହିଛନ୍ତି, ସେ ତାଙ୍କ ବଡ଼ଭାଇ ଓ ଭାଉଜଙ୍କ ସହ ମିଶି ଭାଉଜଙ୍କ ବାପଘର ରଙ୍ଗିଆଟିକ୍ରା ଗ୍ରାମକୁ ଯାଇଥିଲେ। ସେଠାରେ ଶୋଇଥିବା ସମୟରେ ରାତି ପ୍ରାୟ ୩ଟାରେ ମୋବାଇଲ ଫୋନରେ ପୋଲିସଠାରୁ ଏହି ଘଟଣା ସମ୍ପର୍କରେ ସୂଚନା ପାଇ ଗଁାରେ ପହଞ୍ଚତ୍ଥିଲେ। ହତ୍ୟାକାଣ୍ଡର କାରଣ ଜଣାପଡ଼ିନାହିଁ। ବ୍ୟବଚ୍ଛେଦ ରିପୋର୍ଟ ଓ ଗିରଫ ଅଜୟଙ୍କୁ ଅଧିକ ପଚରାଉଚରା ପରେ ସତ୍ୟାସତ୍ୟ ସାମ୍ନାକୁ ଆସିବ ବୋଲି ଏଏସ୍ପି ବାରିକ କହିଛନ୍ତି।
Dharitri – Odisha’s No.1 Odia Daily
