ଆଳି,୩୦ା୯(ବନମାଳୀ ସେନାପତି): ରାଜ୍ୟ ସରକାର ପଞ୍ଚାୟତର ବିକାଶ ନିମନ୍ତେ ପଞ୍ଚାୟତିରାଜ ବ୍ୟବସ୍ଥାରେ ପଞ୍ଚାୟତଗୁଡିକୁ କୋଟି କୋଟି ଟଙ୍କା ଯୋଗାଇ ଦେଉଛନ୍ତି। ହେଲେ ସରକାରୀ ଅର୍ଥକୁ ବାଟମାରଣା କରବାରେ ଲାଗି ପଡିଛନ୍ତି ପଞ୍ଚାୟତ ପ୍ରତିନିଧି ଓ ସରକାରୀ କର୍ମଚାରୀ। ସାଧାରଣ ଲୋକଙ୍କ ସୁବିଧା ନିମନ୍ତେ ସରକାରୀ ସ୍ତରରେ ଯୋଜନା ହେଉଥିବା ବେଳେ ଲୋକଙ୍କୁ ଭୁଆଁ ବୁଲାଇ ସରକାରୀ ଅର୍ଥ ହଡ଼ପ କରାଯାଇଥିବା ଭଳି ଏକ ସଙ୍ଗୀନ ଅଭିଯୋଗ ଆଣିଛନ୍ତି ଆଳି ବ୍ଲକ ସିଙ୍ଗିରି ପଞ୍ଚାୟତର ଅଧିବାସୀ।
ଶୁକ୍ରବାର ଖବରଦାତା ସମ୍ମିଳନୀ ମାଧ୍ୟମରେ ସେମାନେ ଅଭିଯୋଗ ଆଣିଛନ୍ତି ଯେ, ସିଙ୍ଗିରି ପଞ୍ଚାୟତ ଏବେ ଦୁର୍ନୀତିରେ ଉବୁଟୁବୁ ହେଉଛି। ପଞ୍ଚାୟତରେ ୨୦୨୨-୨୩ ଓ ୨୦୨୩-୨୪ ଆର୍ଥିକ ବର୍ଷରେ ପଞ୍ଚାୟତକୁ ଆସିଥିବା ଅର୍ଥ ଆତ୍ମସାତ ହୋଇଥିବା ସେମାନେ ଅଭିଯୋଗ ବାଢିଛନ୍ତି। ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନା (ଏମ୍ଜିଏନ୍ଆର୍ଇଜିଏସ୍)ରେ ୨୨-୨୩ ଓ ୨୩-୨୪ ଆର୍ଥତ୍କ ବର୍ଷରେ ଅନେକ ପ୍ରକଳ୍ପ କାର୍ଯ୍ୟ ହୋଇଥିବା ବେଳେ ୪ଟି ପ୍ରକଳ୍ପର ସୂଚନା ଫଳକ ମାରି ଦେଇ କାମ କରା ନ ଯାଇ ପ୍ରାୟ ୧୨ଲକ୍ଷରୁ ଊର୍ଦ୍ଧ୍ୱ ଟଙ୍କା ହଡ଼ପ କରାଯାଇଥିବା ନେଇ ଗ୍ରାମବାସୀ ଅଭିଯୋଗ ଆଣିଛନ୍ତି। ଏହି ଦୁର୍ନୀତିରେ ସରପଞ୍ଚଙ୍କଠୁ ଆରମ୍ଭ କରି ପଞ୍ଚାୟତ କାର୍ଯ୍ୟନିର୍ବାହୀ, ଜିଆରଏସ୍, ଏପିଓ, କନିଷ୍ଠଯନ୍ତ୍ରୀ, ସହକାରୀ ଯନ୍ତ୍ରୀ ଓ ବିଡିଓ ସାମିଲ ରହିଥିବା ଅଭିଯୋଗ ହେଉଛି। ତଥ୍ୟ ଅନୁଯାୟୀ, ସିଙ୍ଗିରି ପଞ୍ଚାୟତ କାର୍ଯ୍ୟାଳୟକୁ ଯାଇଥିବା ମୁଖ୍ୟ ରାସ୍ତାରେ ସାମାନ୍ୟ ବର୍ଷା ହେଲେ ଆଣ୍ଠୁଏ ପାଣି ଜମି ରହେ। ଏହି ରାସ୍ତାରୁ ଜଳ ନିଷ୍କାସନର ବ୍ୟବସ୍ଥା ସହ ରାସ୍ତାକୁ ଉଚ୍ଚ କରିବାକୁ ସ୍ଥାନୀୟ ଅଞ୍ଚଳବାସୀ ଦୀର୍ଘଦିନ ହେବ ଦାବି କରି ଆସୁଛନ୍ତି। ହେଲେ ଏହି ରାସ୍ତା ନିର୍ମାଣ ହେଉନାହିଁ। କିନ୍ତୁ ଏମ୍ଜିଏନ୍ଆର୍ଇଜିଏସ୍ରେ ମୁକ୍ତେଶ୍ୱର ମହାଦେବ ମନ୍ଦିର ନିକଟରୁ ପଞ୍ଚାୟତ କାର୍ଯ୍ୟାଳୟ ପର୍ଯ୍ୟନ୍ତ ରାସ୍ତା ନିର୍ମାଣ ହୋଇଥିବା ଦର୍ଶାଇ ୨ଲକ୍ଷ ୨୦ ହଜାର ୨୧୭ ଟଙ୍କା ଉଠାଯାଇଛି। ହେଲେ ଏହି ରାସ୍ତାରେ କିନ୍ତୁ ମାଟି ମୁଠାଏ ପଡ଼ି ନ ଥିବା ଗ୍ରାମବାସୀ ଅଭିଯୋଗ କରିଛନ୍ତି। ସେହିପରି ଗୋପୀ ଦାସ ଛକଠାରୁ କୀର୍ତ୍ତନ ମଣ୍ଡପ ପର୍ଯ୍ୟନ୍ତ ରାସ୍ତାରେ ମାତ୍ର ୩୦ରୁ ୪୦ ଟ୍ରିପ ମାଟି ପକାଇ ଏ ବାବଦରେ ୨ ଲକ୍ଷ ୫୪ ହଜାର ୭୯୩ ଟଙ୍କା ଉଠା ଯାଇଥିବା ଜଣାପଡିଛି। ସେହିପରି ସରକାର ଗ୍ରାମଞ୍ଚଳରେ ଅପରିତ୍ୟକ୍ତ ଅବସ୍ଥାରେ ଥିବା ପୋଖରୀର ପୁନରୁଦ୍ଧାର କରୁଛନ୍ତି। ପଞ୍ଚାୟତର ମା’ ବୁଢୀ ଜାଗୁଳାଇ ପୋଖରୀ ପୁନରୁଦ୍ଧାର ପ୍ରକଳ୍ପ କରି ଏହାକୁ ପୋତି ଦେଇଛନ୍ତି ଏବଂ ଏ ବାବଦରେ ୪ ଲକ୍ଷ ୭ ହଜାର ୬୨୮ ଟଙ୍କା ଉଠାଇ ନେଇଛନ୍ତି। ସେହିପରି ଦହିସାହି ଗଁାରେ ଆଦର୍ଶ ପୋଖରୀର ପୁନରୁଦ୍ଧାର ନିମନ୍ତେ ୩ ଲକ୍ଷ ୫୬ ହଜାର ୭୬୭ ଟଙ୍କା ସରକାରୀ ତହବିଲରୁ ଉଠା ଯାଇଛି। ସେଭଳି କୌଣସି ପୋଖରୀ ଖନନ ହୋଇ ନ ଥିବା ଗ୍ରାମବାସୀ ଅଭିଯୋଗ କରିଛନ୍ତି। ଗ୍ରାମବାସୀଙ୍କ ଅଭିଯୋଗ ଅନୁଯାୟୀ, ଗ୍ରାମର ଅନେକ ଜବ୍କାର୍ଡଧାରୀ ଥିବାବେଳେ ସେମାନଙ୍କୁ କାମ ନିୟୋଜିତ କରାଯାଉନି। ମେଶିନ ଲଗାଇ ଏମ୍ଜିଏନ୍ଆର୍ଇଜିଏସ୍ କାର୍ଯ୍ୟ କରାଯାଏ। ଏହି ଦୁର୍ନୀତିର ଉଚ୍ଚସ୍ତରୀୟ ତଦନ୍ତ କରିବା ସହ ସମ୍ପୃକ୍ତ ଥିବା ସରପଞ୍ଚ, କାର୍ଯ୍ୟନିର୍ବାହୀ, ଜିଆରଏସ୍, କନିଷ୍ଠଯନ୍ତ୍ରୀଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପଞ୍ଚାୟତର ମିନତି ଦାସ, ଉର୍ମିଳା ବେହେରା, ଅକ୍ଷୟ ଦାସ, ଶ୍ରୀଚରଣ ମଲିକ, ବସନ୍ତ ସେଠୀ, ରମେଶ ନାଥ, ରଞ୍ଜନ ସେଠୀ, ଅବିନାଶ ଦାସ, ହେମନ୍ତ ବାରିକ, ଶ୍ରୀକାନ୍ତ ମଲିକ, ମନୋରଞ୍ଜନ ଲେଙ୍କା, ପଦ୍ମନାଭ ସେଠୀ, ହେମନ୍ତ ରାଉତ, ଅଭିରାମ ମଲିକ ପ୍ରମୁଖଙ୍କ ସମେତ ଶତାଧିକ ଗ୍ରାମବାସୀ ଦାବି କରିଛନ୍ତି। ଏ ନେଇ ପଞ୍ଚାୟତର ସରପଞ୍ଚ ଅକ୍ଷୟ ଦାସଙ୍କୁ ପଚାରିବାରୁ ଏହା ମିଥ୍ୟା ଅଭିଯୋଗ। ତଦନ୍ତ ପ୍ରକ୍ରିୟା ନିମନ୍ତେ ସେ ପ୍ରସ୍ତୁତ ଅଛନ୍ତି ବୋଲି କହିଛନ୍ତି। ଆଳି ବିଡିଓ ମିନତି ଜଗଦେବଙ୍କୁ ପଚାରିବାର ଏହି ଅଭିଯୋଗ ପାଇଛନ୍ତି। ଖୁବ୍ଶୀଘ୍ର ଅଭିଯୋଗର ତଦନ୍ତ କରାଯିବ। ଯିଏ ବି ଦୋଷୀ ହୋଇଥିବେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ପ୍ରତିଶ୍ରୁତି ଦେଇଛନ୍ତି।
