ମାଞ୍ଚେଷ୍ଟର, ୧୧।୯(ପି.ଟି.)-
ସାମ୍ପ୍ରତିକ ଅନ୍ତର୍ଜାତୀୟ କ୍ରିକେଟରେ ଟିମ୍ ଇଣ୍ଡିଆ ଅଧିନାୟକ ବିରାଟ କୋହଲି ଓ ଅଷ୍ଟ୍ରେଲିଆ ଅଧିନାୟକ ଷ୍ଟିଭ୍ ସ୍ମିଥ ଦୁଇ ସମକକ୍ଷ ବ୍ୟାଟ୍ସମ୍ୟାନ। ଉଭୟ ଖେଳାଳି ବ୍ୟକ୍ତିଗତ ପ୍ରଦର୍ଶନ ପାଇଁ ଅନେକ ସମୟରେ ଚର୍ଚ୍ଚାରେ ମଧ୍ୟ ରହିଥାନ୍ତି। ମାତ୍ର ବର୍ତ୍ତମାନ ବିଶ୍ୱ ଏକଦିବସୀୟ କ୍ରିକେଟରେ କୋହଲି ଶ୍ରେଷ୍ଠ ବୋଲି ସ୍ମିଥ ପ୍ରକାଶ କରିଛନ୍ତି। ଚଳିତମାସ ୧୯ ତାରିଖରୁ ଆରମ୍ଭ ହେବାକୁ ଯାଉଥିବା ଇଣ୍ଡିଆନ ପ୍ରିମିୟର ଲିଗ୍(ଆଇପିଏଲ) ଏବଂ ଏହାପରେ ଭାରତ-ଅଷ୍ଟ୍ରେଲିଆ ସିରିଜରେ ଉଭୟ ବ୍ୟାଟ୍ସମ୍ୟାନ ପରସ୍ପର ବିପକ୍ଷରେ ଖେଳିବେ। ଇଂଲଣ୍ଡ ବିପକ୍ଷରେ ୩ ମ୍ୟାଚ ବିଶିଷ୍ଟ ସିରିଜ ଖେଳିବା ପାଇଁ ସ୍ମିଥ ଏବେ ଇଂଲଣ୍ଡରେ ଅଛନ୍ତି। ଗୁରୁବାର ପ୍ରଶଂସକଙ୍କ ସହ ଇନ୍ଷ୍ଟାଗ୍ରାମ ସେସନ ଅବସରରେ ଏକଦିବସୀୟ ପାଇଁ କୋହଲି ଶ୍ରେଷ୍ଠ ବୋଲି କହିଛନ୍ତି ସ୍ମିଥ। ୩୧ ବର୍ଷୀୟ ସ୍ମିଥଙ୍କୁ ଜଣେ ପ୍ରଶଂସକ ବର୍ତ୍ତମାନ ଦିନିକିଆ କ୍ରିକେଟରେ କିଏ ଶ୍ରେଷ୍ଠ ବୋଲି ପ୍ରଶ୍ନ କରିଥିଲେ। କାଳ ବିଳମ୍ବ ନ କରି କୋହଲିଙ୍କ ନାମ ନେଇଥିଲେ ସ୍ମିଥ।
ଭାରତୀୟ ଅଧିନାୟକ ବର୍ତ୍ତମାନ ସକ୍ରିୟ ଥିବା ଏକଦିବସୀୟ କ୍ରିକେଟରଙ୍କ ମଧ୍ୟରେ ସର୍ବାଧିକ ରନ ସ୍କୋରର ଅଛନ୍ତି। ସେ ୫୯.୩୪ ଆଭରେଜରେ ୧୧୮୬୭ ରନ ସ୍କୋର କରିଛନ୍ତି। ୪୩ଟି ଶତକ ହାସଲ କରି ସାରିଛନ୍ତ। ଏକଦିବସୀୟ କ୍ରିକେଟରେ ସର୍ବାଧିକ ଶତକ ହାସଲରେ ସଚିନ ତେନ୍ଦୁଲକରଙ୍କ ରେକର୍ଡ ଭାଙ୍ଗିବା ପାଇଁ ସେ ଆଉ ୭ ଶତକ ଆବଶ୍ୟକ କରୁଛନ୍ତି। ଆଗାମୀ ଆଇପିଏଲରେ ରାଜସ୍ଥାନ ରୟାଲ୍ସ ପକ୍ଷରୁ ପ୍ରତିନିଧିତ୍ୱ କରିବାକୁ ଯାଉଥିବା ସ୍ମିଥ ଭାରତୀୟ ଖେଳାଳିଙ୍କ ମଧ୍ୟରେ ଲୋକେଶ ରାହୁଲ ଓ ସଞ୍ଜୁ ସାମସନଙ୍କ ଉପରେ ନଜର ରହିବ ବୋଲି ପ୍ରକାଶ କରିଛନ୍ତି। ଗତ ଅଷ୍ଟ୍ରେଲିଆ ବିପକ୍ଷ ଟି୨୦ ସିରିଜରେ ଇଂଲଣ୍ଡର ଜୋସ ବଟଲର ଚମତ୍କାର ଫର୍ମର ପରିଚୟ ଦେଇଥିଲେ। ଆଇପିଏଲରେ ମଧ୍ୟ ତାଙ୍କର ସେହି ଫର୍ମ ଜାରି ରହିବ ବୋଲି ସ୍ମିଥ ଆଶା ରଖିଛନ୍ତି। ଇଂଲଣ୍ଡ ବିପକ୍ଷ ଦିନିକିଆ ସିରିଜ ଚଳିତ ମାସ ୧୬ ତାରିଖରେ ଶେଷ ହେବାପରେ ସ୍ମିଥ ୟୁନାଇଟେଡ ଆରବ ଏମିରେଟ୍ସରେ ରାଜସ୍ଥାନ ରୟାଲ୍ସ ଦଳସହ ଯୋଗଦେବେ।
