ଚେନ୍ନାଇ : ସାଉଥ ଫିଲ୍ମ ଇଣ୍ଡଷ୍ଟ୍ରିରୁ ଏକ ଦୁଃଖଦ ଖବର ଆସିଛି। ଜାତୀୟ ପୁରସ୍କାର ବିଜେତା ନିର୍ଦ୍ଦେଶକ ବିଜୟ ସେତୁପତିଙ୍କ ଫିଲ୍ମ ସେଟରେ ଏକ ଦୁର୍ଘଟଣା ଘଟିଛି। ବିଜୟଙ୍କ ପାଇଁ ଷ୍ଟଣ୍ଟମ୍ୟାନ ଏସ ସୁରେଶ ଷ୍ଟଣ୍ଟ ପ୍ରଦର୍ଶନ କରୁଥିବାବେଳେ ତାଙ୍କ ମୃତ୍ୟୁ ଘଟିଛି। ଏକ ଦୁର୍ଘଟଣାର ସମ୍ମୁଖୀନ ହୋଇ ସେ ୨୦ ଫୁଟ ଉଚ୍ଚରୁ ଖସି ପଡ଼ିଥିଲେ। ସୁରେଶଙ୍କୁ ୫୪ ବର୍ଷ ବୟସ ହୋଇଥିଲା।
ଚେନ୍ନାଇର ଭାନ୍ଦାଲୁରରେ ନିର୍ଦ୍ଦେଶକ ଭେଟ୍ରିମାରନଙ୍କ ନିର୍ଦ୍ଦେଶନାରେ ନିର୍ମିତ ବିଦୁଥଲାଇ ଚଳଚ୍ଚିତ୍ରର ଶୁଟିଂ ଚାଲିଥିଲା। ଏହି ସମୟରେ ସୁରେଶ ମୁଖ୍ୟ ଷ୍ଟଣ୍ଟ ନିର୍ଦ୍ଦେଶକଙ୍କ ସହ ସହକାରୀ ଭାବରେ ଅଭିନୟ କରୁଥିଲେ। ସେ ଷ୍ଟଣ୍ଟ ପ୍ରଦର୍ଶନ କରୁଥିବାବେଳେ ସେଠାରେ ତାଙ୍କର ସଂଯୋଜକମାନେ ମଧ୍ୟ ଉପସ୍ଥିତ ଥିଲେ। ଫିଲ୍ମର ଏକ ଦୃଶ୍ୟ ଅନୁଯାୟୀ ତାଙ୍କୁ ୨୦ ଫୁଟ ଉଚ୍ଚତାରୁ ଡେଇଁବାର ଏକ ଷ୍ଟଣ୍ଟ କରିବାକୁ ପଡିଥିଲା। ଖବର ଅନୁଯାୟୀ, ସୁରେଶଙ୍କୁ ଏକ ଦଉଡି ସାହାଯ୍ୟରେ କ୍ରେନରେ ବାନ୍ଧି ଦିଆଯାଇଥିଲା, କିନ୍ତୁ ଶୁଟିଂ ଆରମ୍ଭ ହେବା ମାତ୍ରେ ଦଉଡି ଛିଣ୍ଡି ଯାଇଥିଲା ଏବଂ ଷ୍ଟଣ୍ଟମ୍ୟାନ ସୁରେଶ ୨୦ ଫୁଟ ଉଚ୍ଚତାରୁ ସିଧା ତଳେ ଖସି ପଡ଼ିଥିଲେ। ତାଙ୍କୁ ଏକ ଘରୋଇ ଡାକ୍ତରଖାନା ନିଆଯାଇଥିଲା, ଯେଉଁଠାରେ ଡାକ୍ତରମାନେ ତାଙ୍କୁ ମୃତ ଘୋଷଣା କରିଥିଲେ।
ମିଡିଆ ରିପୋର୍ଟ ଅନୁଯାୟୀ, ସୁରେଶ ୨୫ ବର୍ଷ ଧରି ଫିଲ୍ମ ଇଣ୍ଡଷ୍ଟ୍ରିରେ ଷ୍ଟଣ୍ଟମ୍ୟାନ ଭାବରେ କାର୍ଯ୍ୟ କରୁଥିଲେ। ଏହି ଦୁର୍ଘଟଣା ପରେ ଫିଲ୍ମର ଶୁଟିଂ ସ୍ଥଗିତ ରଖାଯାଇଛି। ଏହା ସହିତ ସେଟରେ ଏହି ଘଟଣା ପରେ ପୋଲିସ ମଧ୍ୟ ତଦନ୍ତ ଆରମ୍ଭ କରିଛି।
