ଥୁଆମୂଳ ରାମପୁର, ୩୦।୬ (ଦୁର୍ଗା କୀର୍ତ୍ତି): ଥୁଆମୂଳ ରାମପୁର ଥାନା ସଦର ସ୍ଥିତ ତାଳବନ୍ଧ ପଡ଼ା ଓ କାଲି ମନ୍ଦିର ପଡ଼ା ମଝିରେ ଥିବା ଦୁଇଟି ବନ୍ଧ ନିକଟରେ ମଙ୍ଗଳବାର ସନ୍ଧ୍ୟା ପ୍ରାୟ ୮.୦୨ ସମୟରେ ଏକ ସଡ଼କ ଦୁର୍ଘଟଣା ଘଟିଯାଇଛି। ଦୁଇଟି ବାଇକ୍ ମଧ୍ୟରେ ମୁହାଁମୁହିଁ ଧକ୍କା ହେବା ଫଳରେ ଦୁଇ ଜଣ ବ୍ୟକ୍ତି ଗୁରୁତର ଭାବେ ଆହତ ହୋଇଛନ୍ତି। ଆହତଙ୍କ ମୁଣ୍ଡ, କପାଳ ଓ ଆଖିରେ ଗଭୀର ଆଘାତ ଲାଗିଥିବା ଜଣାପଡ଼ିଛି।
ଆହତ ଦ୍ୱୟ ହେଲେ ତହସିଲ ପଡ଼ାର ପୁରୁନ୍ଧର ନାଏକ (୪୦), ପିତା- ବାଳକୃଷ୍ଣ ନାଏକ ଏବଂ ପାଲଜୋର୍ ଗ୍ରାମର ସଦାଶିବ ମାଝୀ (୨୮), ପିତା- ଡମ୍ବରୁଧର ମାଝୀ। ସଦାଶିବ ନିଜ ଗ୍ରାମରୁ ଲାଠିଆଗୁଡ଼ା ଅଭିମୁଖେ ଯାଉଥିବା ବେଳେ ପୁରୁନ୍ଧର ଥୁଆମୂଳ ରାମପୁର ମାର୍କେଟରୁ ଘରକୁ ଫେରୁଥିଲେ। ଏହି ସମୟରେ ଭାରସାମ୍ୟ ହରାଇ ଦୁହିଁଙ୍କ ମଧ୍ୟରେ ମୁହାଁମୁହିଁ ଧକ୍କା ହୋଇଥିଲା।
ଦୁର୍ଘଟଣା ପରେ ପ୍ରଥମେ ସ୍ଥାନୀୟ ଲୋକେ ୧୦୮ ଆମ୍ବୁଲାନ୍ସକୁ ଯୋଗାଯୋଗ କରିଥିଲେ ମଧ୍ୟ ସେହି ସମୟରେ ଗାଡ଼ି ଉପଲବ୍ଧ ନ ଥିଲା। ଏଭଳି ଜରୁରୀ ପରିସ୍ଥିତିରେ ସ୍ଥାନୀୟ ‘ନବଜୀବନ ଯୁବ ଅନୁଷ୍ଠାନ’ର କର୍ମକର୍ତ୍ତାମାନେ ମେଡିକାଲରୁ ଏକ ଷ୍ଟ୍ରେଚର୍ ଆଣି ଆହତମାନଙ୍କୁ ଉଦ୍ଧାର କରି ପ୍ରାଥମିକ ଚିକିତ୍ସା ପାଇଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ନେଇଥିଲେ। ଖବର ପାଇ ସ୍ଥାନୀୟ ପୋଲିସ ମଧ୍ୟ ଘଟଣାସ୍ଥଳରେ ପହଞ୍ଚି ସହଯୋଗର ହାତ ବଢ଼ାଇଥିଲା। ଏଥିସହ ଯୁବ ଅନୁଷ୍ଠାନର ସଦସ୍ୟମାନେ ଆହତ ଗରିବ ପୁରୁନ୍ଧର ନାଏକଙ୍କ ପରିବାରକୁ ଆର୍ଥିକ ସହାୟତା ମଧ୍ୟ ପ୍ରଦାନ କରିଛନ୍ତି।
ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ପ୍ରାଥମିକ ଚିକିତ୍ସା ପରେ ଦ୍ୱୟଙ୍କ ଅବସ୍ଥା ଗୁରୁତର ଥିବାରୁ ସେମାନଙ୍କୁ ଭବାନୀପାଟଣା ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା। ମାତ୍ର ଦୁର୍ଭାଗ୍ୟବଶତଃ ସେହି ସମୟରେ ମଧ୍ୟ କୌଣସି ଆମ୍ବୁଲାନ୍ସ ମିଳିପାରି ନ ଥିଲା। ଶେଷରେ ବାଧ୍ୟ ହୋଇ ଉଭୟ ପରିବାର ଲୋକେ ନିଜ ଖର୍ଚ୍ଚରେ ଏକ ବେସରକାରୀ ଗାଡ଼ି ଯୋଗାଡ଼ କରି ଆହତମାନଙ୍କୁ ଜିଲା ଡାକ୍ତରଖାନାକୁ ନେଇଛନ୍ତି।
୨୪ଟି ଗ୍ରାମ ପଞ୍ଚାୟତ ବିଶିଷ୍ଟ ଏହି ବୃହତ ବ୍ଲକରେ ମାତ୍ର ୨ଟି ଆମ୍ବୁଲାନ୍ସ ରହିଛି। ଜରୁରୀ ସମୟରେ ଆମ୍ବୁଲାନ୍ସ ନ ମିଳିବା ସମସ୍ୟା ଏଠାରେ ଦୀର୍ଘଦିନ ଧରି ଲାଗିରହିଛି, ଯାହାକୁ ନେଇ ସ୍ଥାନୀୟ ଜନସାଧାରଣଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ପ୍ରଶାସନ ଏଥିପ୍ରତି ଦୃଷ୍ଟି ଦେଇ ସ୍ୱାସ୍ଥ୍ୟ ସେବାରେ ସୁଧାର ଆଣିବାକୁ ଦାବି ହେଉଛି।
