ମାନିଲା,୪।୭: ସୈନ୍ୟ ବାହିନୀର ଏକ ବିମାନ ଅବତରଣ ସମୟରେ ଦୁର୍ଘଟଣା ଗ୍ରସ୍ତ ହୋଇଛି। ଦକ୍ଷିଣ ଫିଲିପାଇନ୍ସ୍ରେ ଘଟିଥିବା ଏହି ଦୁର୍ଘଟଣାରେ ଇତିମଧ୍ୟରେ ୧୭ ଜଣ ସୈନ୍ୟଙ୍କ ମୃତଦେହ ଉଦ୍ଧାର କରାଯାଇଛି। ସେହିପରି ୪୦ ଜଣ ଆହତ ସୈନ୍ୟଙ୍କୁ ଉଦ୍ଧାର କରାଯାଇଛି। ଆହତଙ୍କୁ ଚିକିତ୍ସା ଲାଗି ହସ୍ପିଟାଲରେ ଭର୍ତ୍ତି କରାଯାଇଛି। ଦୁର୍ଘଟଣା ଗ୍ରସ୍ତ ସି-୧୩୦ ବିମାନରେ ୯୨ ଜଣ ସୈନ୍ୟ ଯାତ୍ରା କରୁଥିବା ନେଇ ପ୍ରତିରକ୍ଷାମନ୍ତ୍ରୀ ଡେଲଫିନ୍ ଲୋରେନ୍ଜାନା ସୂଚନା ଦେଇଛନ୍ତି। ସୈନ୍ୟବାହିନୀ ପ୍ରମୁଖ ଜେନେରାଲ ସିରିଲିଟୋ ସୋବେଜାନା କହିଛନ୍ତି ଯେ, ବିମାନଟି ଦକ୍ଷିଣ କାଗାୟନ ଡି ଓରୋ ସହରରୁ ସୈନ୍ୟଙ୍କୁ ନେଇ ସୁଲୁ ପ୍ରଦେଶର ଜୋଲୋ ଦ୍ୱୀପରେ ଅବତରଣ ସମୟରେ ଦୁର୍ଘଟଣା ଗ୍ରସ୍ତ ହୋଇଛି। ରନ୍ ଓ୍ବେରେ ଠିକ୍ ଭାବେ ଅବତରଣ ନ କରିପାରିବାରୁ ଏଭଳି ହୋଇଥିବା ସେ କହିଛନ୍ତି। ବିମାନ ଉପରେ କୌଣସି ଆକ୍ରମଣ ହୋଇ ନ ଥିବା ପ୍ରତିରକ୍ଷା ମୁଖପାତ୍ର କଲୋନେଲ୍ ଏଡ୍ଗାର୍ଡ ଏରୋଭାଲୋ କହିଛନ୍ତି।
