ଛତ୍ରପୁର,୨୨ା୩: କରୋନା ହଟସ୍ପଟ ରାଜ୍ୟରୁ ପ୍ରବାସୀମାନେ ଟ୍ରେନ ଯୋଗେ ଗଞ୍ଜାମ ଜିଲାକୁ ଫେରୁଛନ୍ତି। ଦୈନିକ ଛତ୍ରପୁର, ବ୍ରହ୍ମପୁର ଓ ଖଲ୍ଲିକୋଟ ଷ୍ଟେଶନରେ ପ୍ରବାସୀ ଓହ୍ଲାଉଛନ୍ତି। ଜିଲାରେ ଆଗକୁ ଦଣ୍ଡଯାତ୍ରା, ତାରାତାରିଣୀ ଯାତ୍ରା, ଦେଳଯାତ୍ରା ଓ ବ୍ରହ୍ମପୁରରେ ବୁଢ଼ୀ ଠାକୁରାଣୀ ଯାତ୍ରା ହେବ। ଏସବୁ ଯାତ୍ରାକୁ ମାନସିକ ପୂରଣ ପାଇଁ ଗଞ୍ଜାମକୁ ଜିଲା ବାହାରୁ ଲୋକ ଆସୁଥିବା ଜଣାପଡ଼ିଲେ ସେହି ଅଞ୍ଚଳର ଯାତ୍ରାକୁ ସ୍ଥଗିତ ରଖାଯିବ। ତେଣୁ କୌଣସି ଯାତ୍ରା ନିମନ୍ତେ ଜିଲାକୁ ନ ଆସିବାକୁ ଜିଲା ପ୍ରଶାସନ ପକ୍ଷରୁ ଅନୁରୋଧ କରାଯାଇଛି। ସ୍ବାସ୍ଥ୍ୟଗତ ସମସ୍ୟା କିମ୍ବା ଅନ୍ୟ କୌଣସି କାର୍ଯ୍ୟ ସକାଶେ ଅନ୍ୟ ରାଜ୍ୟରୁ କେହି ପ୍ରବାସୀ ଗଞ୍ଜାମ ଆସିଲେ ଆର୍ଟିପିସିଆର୍ ନେଗେଟିଭ୍ ରିପୋର୍ଟ ଆଣିବା ବାଧ୍ୟତାମୂଳକ ବୋଲି ଜ଼ିଲାପାଳ ବିଜୟ ଅମୃତା କୁଲାଙ୍ଗେ କହିଛନ୍ତି। ରିପୋର୍ଟ ନ ଆଣିଲେ ୭ ଦିନ କ୍ୱାରାଣ୍ଟାଇନ୍ରେ ରହିବାକୁ ହେବ। ପ୍ରବାସୀଙ୍କ ସମ୍ପୂର୍ଣ୍ଣ ତଥ୍ୟ ରେକର୍ଡଭୁକ୍ତ କରାଯାଇ ଯାଞ୍ଚ ହେବ। ଲକ୍ଷଣ ଥିଲେ ଟେଷ୍ଟ କରାଯିବ। ସେହିପରି ବ୍ରହ୍ମପୁର ରେଲଓ୍ବେ ଷ୍ଟେଶନ ଭଳି ଛତ୍ରପୁର ଏବଂ ଖଲ୍ଲିକୋଟ ଷ୍ଟେଶନରେ ଯାତ୍ରୀଙ୍କ ସ୍ବାସ୍ଥ୍ୟଯାଞ୍ଚ କରିବାକୁ ଜିଲାପାଳ ନିର୍ଦ୍ଦେଶ ଦେଇଛନ୍ତି। କୋଭିଡ୍ ସମୟରେ ଜିଲାରେ ଯେଭଳି କଟକଣା ଜାରି କରାଯାଇ ପଞ୍ଚସୂତ୍ରୀ ନିୟମକୁ ଗୁରୁତ୍ୱ ଦିଆଯାଇଥିଲା ତାହା ପୁଣି କାର୍ଯ୍ୟକାରୀ କରିବାକୁ ସୋମବାର ଭିଡିଓ କନଫରେନ୍ସରେ ଜିଲାପାଳ ସମସ୍ତ ବିଭାଗୀୟ ଅଧିକାରୀ, ଗୋଷ୍ଠୀ ଉନ୍ନୟନ ଅଧିକାରୀ, ତହସିଲଦାର, କାର୍ଯ୍ୟ ନିର୍ବାହୀ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି।
