କାମାକ୍ଷାନଗର, ୪।୨(ଡି.ଏନ୍.ଏ.): ଢେଙ୍କାନାଳ ଜିଲା କାମାକ୍ଷାନଗର ବ୍ଲକ କାନପୁରା ପଞ୍ଚାୟତିରାଜ ହାଇସ୍କୁଲରେ ଶୁକ୍ରବାରଠାରୁ ଆରମ୍ଭ ହୋଇଛି ୩୫ତମ ଜିଲାସ୍ତରୀୟ ସ୍କାଉଟ୍ସ, ଗାଇଡ୍ସ କ୍ୟାମ୍ପୋରୀ। ଏହା ୩ଦିନ ଧରି ଚାଲିବ। ଏଥିରେ ୧୭୦ ବିଦ୍ୟାଳୟର ୩୪୩ ସ୍କାଉଟ୍ସ, ୧୩୬ ଗାଇଡ୍ସ, ୧୩୬ ସ୍କାଉଟ୍ସ ମାଷ୍ଟର, ୩୩ ଗାଇଡ୍ସ କ୍ୟାପଟେନ୍ ଅଂଶଗ୍ରହଣ କରିଛନ୍ତି। ଜିଲା ଶିକ୍ଷାଧିକାରୀ ତଥା ଚିଫ୍ କମିଶନର ନିବେଦିତା ପାଣିଙ୍କ ସଭାପତିତ୍ୱରେ ମୁଖ୍ୟ ଅତିଥି ଭାବେ ଭାରତ ସ୍କାଉଟ୍ସ ଓ ଗାଇଡ୍ସର ଜାତୀୟ ଉପସଭାପତି ତଥା ମୁଖ୍ୟ କମିଶନର କାଳୀପ୍ରସାଦ ମିଶ୍ର ଯୋଗଦେଇ କହିଲେ, ଶିକ୍ଷା ସହ ସେବାକୁ ବ୍ରତଭାବେ ଗ୍ରହଣ କଲେ ଜୀବନରେ ପୂର୍ଣ୍ଣତା ମିଳେ। ରାଜ୍ୟ ଗାଇଡ୍ସ କମିଶନର ତଥା ପ୍ରଶାସନିକ ଅଧିକାରୀ ଅନାମିକା ଦାସ ମୁଖ୍ୟବକ୍ତା ଭାବେ ଯୋଗଦେଇ ଆରମ୍ଭ କରିଥିବା କାର୍ଯ୍ୟକୁ ସଫଳତାର ସହ ଶେଷ କରିବାକୁ ପରାମର୍ଶ ଦେଇଥିଲେ।
ନଗରପାଳ ଧର୍ମାନନ୍ଦ ପରିଡ଼ା, ବିଇଓ ବ୍ରହ୍ମାନନ୍ଦ ରାଉତ, ଜଗବନ୍ଧୁ ଜେନା, ଜିଲା ଗାଇଡ୍ସ କମିଶନର ପୁଷ୍ପାଞ୍ଜଳି ଦଳେଇ, ସ୍କାଉଟ୍ସ କମିଶନର ଇତିଶ ବରାଳ ପ୍ରମୁଖ ସମ୍ମାନିତ ଅତିଥି ଭାବେ ଯୋଗଦେଇ ଶିବିରାର୍ଥୀଙ୍କୁ ଶୃଙ୍ଖଳିତ ହେବା ପାଇଁ ଗୁରୁତ୍ୱାରୋପ କରିଥିଲେ। ସ୍କାଉଟ୍ସ ଓ ଗାଇଡ୍ସର ଜିଲା ସମ୍ପାଦକ ତଥା ଜିଲା ଶାରୀରିକ ଶିକ୍ଷାଧିକାରୀ ଜ୍ୟୋତିପ୍ରକାଶ ପରିଡ଼ା ବିବରଣୀ ପାଠ କରିଥିଲେ। କାନପୁର ସ୍କୁଲର କ୍ରୀଡ଼ା ଶିକ୍ଷକ ବିପିନ ସାହୁ ମଞ୍ଚ ପରିଚାଳନା କରିଥିବାବେଳେ ପ୍ରଧାନ ଶିକ୍ଷକ ଶ୍ରୀରାମ ରାଉତ ଧନ୍ୟବାଦ ପ୍ରଦାନ କରିଥିଲେ।
