ରଗଡ଼ି,୨୮ା୧୧(ଡି.ଏନ.ଏ.): ଯାଜପୁର ଜିଲା କୋରେଇ ବ୍ଲକ୍ ପଛିକୋଟ ସରକାରୀ ଉଚ୍ଚ ବିଦ୍ୟାଳୟରେ ବିନା ଅନୁମତିରେ ଅନୁପସ୍ଥିତ ରହିଥିବା ୬ ଜଣ ଶିକ୍ଷକଙ୍କ ପାଇଁ ମହଙ୍ଗା ପଡିଛି। ଗତ ୨୪ ତାରିଖ ମଧ୍ୟାହ୍ନରେ ଅତିରିକ୍ତ ଜିଲା ଶିକ୍ଷାଧିକାରୀ(ସ୍କିମ୍) ଶଶଧର ସିଂ ପରିଦର୍ଶନରେ ଯାଇଥିବାବେଳେ ବିଦ୍ୟାଳୟର ଶିକ୍ଷକ ଅଜୟ କୁମାର ବେହେରା, ଚନ୍ଦନ କୁମାର ଜେନା, ଶିକ୍ଷୟିତ୍ରୀ ସତ୍ୟଭାମା ନାୟକ, ତୃପ୍ତିମୟୀ ନାୟକ, ଅର୍ଚ୍ଚନା କର ଓ ଲୀଳାବତୀ ନାୟକ ବିନା ଅନୁମତିରେ ଅନୁପସ୍ଥିତ ଥିଲେ। ଉପସ୍ଥିତ ଅନ୍ୟ ଶିକ୍ଷକମାନେ ଏହାର କାରଣ ଜଣାଇ ପାରିଲେ ନାହିଁ। ଫଳରେ ଅତିରିକ୍ତ ଶିକ୍ଷାଧିକାରୀ ତାଙ୍କ ପତ୍ର ସଂଖ୍ୟା ୧୧୮୧୪/୨୫ା୧୧ା୨୦୨୨ରେ ଉପରୋକ୍ତ ଶିକ୍ଷକମାନଙ୍କୁ କାରଣ ଦର୍ଶାଅ ନୋଟିସ ଜାରି କରିଛନ୍ତି। ୫ ଦିନ ମଧ୍ୟରେ ଉପଯୁକ୍ତ କାରଣ ଦର୍ଶାଇ ନ ପାରିଲେ ସେମାନଙ୍କ ବିରୋଧରେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ନୋଟିସରେ ଦର୍ଶାଯାଇଛି। ସୂଚନାଥାଉ କି ଏହି ବିଦ୍ୟାଳୟରେ ପୂର୍ବରୁ ଜଣେ ପ୍ରଧାନ ଶିକ୍ଷୟିତ୍ରୀ ପିଲାମାନକୁ କାର୍ଯ୍ୟ କରାଉଥିବାର ଭିଡିଓ ଭାଇରାଲ ହେବା ପରେ ତାଙ୍କୁ ଅନ୍ୟତ୍ର ବଦଳି କରାଯାଇଥିଲା। ଅନ୍ୟପକ୍ଷରେ ତରକୋଟ ରଘୁନାଥ ସରକାରୀ ଉଚ୍ଚ ବିଦ୍ୟାଳୟ ବନ୍ଦ ହୋଇଥିବାରୁ ସମ୍ପୃକ୍ତ ପ୍ରଧାନ ଶିକ୍ଷକଙ୍କୁ ମଧ୍ୟ କାରଣ ଦର୍ଶାଅ ନୋଟିସ (ପତ୍ରସଂଖ୍ୟା ୧୧୮୧୮/୨୫ା୧୧ା୨୦୨୨ରେ) ଜାରି କରାଯାଇଛି।
