ତିହିଡ଼ି, ୧୧।୬(ଡି.ଏନ.ଏ.): ଭଦ୍ରକ ଜିଲା ତିହିଡ଼ିସ୍ଥିତ ଡାକବଙ୍ଗଳା ଏବେ ପରିତ୍ୟକ୍ତ ଅବସ୍ଥାରେ ରହିଛି। ଏକଦା ଚଳଚଞ୍ଚଳ ରହୁଥିବା ଡାକବଙ୍ଗଳାର ସବୁ କୋଠରୀରେ ଏବେ ତାଲା ଝୁଲୁଛି। ଉପର ଆଜବେଷ୍ଟସ ଭାଙ୍ଗିରୁଜି ଯାଇଥିବାରୁ ବର୍ଷା ପାଣି ଗଳି କୋଠରୀ ଭିତର ଅବସ୍ଥାକୁ ଶୋଚନୀୟ କରୁଛି। ଡାକବଙ୍ଗଳା ପରିସର ଏବେ ଆଖପାଖ ଦୋକାନୀମାନଙ୍କ ଡଷ୍ଟବିନ ପାଲଟିଛି। ପୂର୍ତ୍ତ ବିଭାଗ ଅଧୀନରେ ଥିବା ଏହି ଡାକବଙ୍ଗଳାର ମରାମତି କରି ବ୍ୟବହାର ଉପଯୋଗୀ ପାଇଁ ବିଭାଗୀୟ ଅଧୀକ୍ଷଣ ଯନ୍ତ୍ରୀ ପରମାନନ୍ଦ ବେହେରା ପ୍ରସ୍ତାବ ଦେଇଥିଲେ ମଧ୍ୟ ଅନୁଦାନ ମିଳିପାରି ନାହିଁ।
ତିହିଡ଼ି ପୂର୍ତ୍ତ ବିଭାଗର ଏକ ଡିଭିଜନ ହୋଇଥିଲେ ମଧ୍ୟ କନିଷ୍ଠ ଯନ୍ତ୍ରୀ ଆଦୌ ଆସୁନାହାନ୍ତି। ନାମକୁ ମାତ୍ର ଜଣେ ଚୌକିିଦାର ଡାକବଙ୍ଗଳାରେ ରହୁଛନ୍ତି। ପୂର୍ବରୁ ୨ଟି କୋଠରୀ ଥିଲା। ଅଧିକ କୋଠରୀ ଆବଶ୍ୟକ ପଡ଼ିବାରୁ ନୂତନ ଗୃହ ନିର୍ମାଣ କରାଯାଇ ୨୦୦୪ ଫେବୃୟାରୀରେ ଉଦ୍ଘାଟନ କରାଯାଇଥିଲା। ଭିଆଇପି କୋଠରୀ ଭାବେ ପରିଗଣିତ ଏହି କୋଠରୀର ଅବସ୍ଥା ମଧ୍ୟ ଶୋଚନୀୟ ହେବାରୁ ୪ବର୍ଷ ପୂର୍ବେ ତତ୍କାଳୀନ କାର୍ଯ୍ୟ ନିର୍ବାହୀ ଯନ୍ତ୍ରୀ ମନୋଜ କୁମାର ସିଂଙ୍କ ଉଦ୍ୟମକ୍ରମେ ୫୦ହଜାର ଟଙ୍କା ବ୍ୟୟରେ ଉକ୍ତ କୋଠରୀର ମରାମତି କରାଯାଇଥିଲା। ଏହାମଧ୍ୟରେ ଉକ୍ତ କୋଠରୀର ଅବସ୍ଥା ମଧ୍ୟ ଶୋଚନୀୟ ହୋଇପଡ଼ିଥିବାରୁ ଏହା ବ୍ୟବହାର ଅନୁପଯୋଗୀ ହୋଇଛି। ଡାକବଙ୍ଗଳାର ଏପରି ଦୁରବସ୍ଥା ଯୋଗୁ ସରକାରୀ ଉଚ୍ଚପଦସ୍ଥ ଅଧିକାରୀମାନେ ତିହିଡ଼ି ଗସ୍ତ କରିବା ସମୟରେ ଆଲୋଚନା ପାଇଁ ଉପଯୁକ୍ତ ସ୍ଥାନ ପାଉନାହାନ୍ତି। ତେବେ ଡାକବଙ୍ଗଳାର ମରାମତି ପାଇଁ ଅନୁଦାନ ଯୋଗାଇବାକୁ ପୁଣିଥରେ ପ୍ରସ୍ତାବ ଦିଆଯିବ ବୋଲି ଅଧିକ୍ଷଣ ଯନ୍ତ୍ରୀ ବେହେରା କହିଛନ୍ତି। ବାସୁଦେବପୁର ବିଧାୟକ ବିଷ୍ଣୁବ୍ରତ ରାଉତରାୟ ଏବଂ ଚାନ୍ଦବାଲି ବିଧାୟକ ତଥା ଜିଲା ଯୋଜନା କମିଟି ଅଧ୍ୟକ୍ଷ ଡ. ବ୍ୟୋମକେଶ ରାୟ ଏଥିପ୍ରତି ଦୃଷ୍ଟି ଦେଇ ଡାକବଙ୍ଗଳାକୁ ବ୍ୟବହାର ଉପଯୋଗୀ ପାଇଁ ପଦକ୍ଷେପ ନେବାକୁ ଦାବି ହୋଇଛି।
