ଏରସମା,୨୩।୧୦(ସ୍ବ.ପ୍ର.): ଏରସମା ବ୍ଲକ ମୁଖ୍ୟାଳୟରେ ଶିଶୁମାନଙ୍କ ଉଦ୍ଦେଶ୍ୟରେ ନିର୍ମିତ ଗାନ୍ଧୀ ଉଦ୍ୟାନ ଏବେ ପରିତ୍ୟକ୍ତ ଅବସ୍ଥାରେ ପଡ଼ିରହିଛି ା ବିଭିନ୍ନ ସଙ୍ଗଠନ ପକ୍ଷରୁ ଏହାର ପୁନରୁଦ୍ଧାର ପାଇଁ ଦାବି ହୋଇଆସୁଥିଲେ ମଧ୍ୟ କୌଣସି ସୁଫଳ ମିଳୁନାହିଁ। ଏରସମାର ଶିଶୁ ଓ କିଶୋରମାନଙ୍କ ଅବସର ବିନୋଦନ ପାଇଁ ପୂର୍ବତନ ବିଡିଓ ମୁରଲୀଧର ସ୍ବାଇଁ ଏହି ଶିଶୁ ଉଦ୍ୟାନ ୨୦୦୮ରେ ନିର୍ମାଣ ଆରମ୍ଭ କରିଥିଲେ ା ୪ା୬ା୨୦୦୯ରେ ଏହି ଉଦ୍ୟାନକୁ ପୂର୍ବତନ କୃଷି, ସମବାୟ, ମତ୍ସ୍ୟ ଓ ପ୍ରାଣୀସମ୍ପଦ ମନ୍ତ୍ରୀ ଦାମୋଦର ରାଉତ ଉଦ୍ଘାଟନ କରିଥିଲେ। ଉଦ୍ୟାନରେ ସୁନ୍ଦର ଫାଟକ ନିର୍ମାଣ କରାଯିବା ସହ ପିଲାଙ୍କ ଆମୋଦପ୍ରମୋଦ ପାଇଁ ଦୋଳି, ଖସଡ଼ା, ଶିଡି ଆଦିର ବ୍ୟବସ୍ଥା କରାଯାଇଛି। ବିଭିନ୍ନ କିସମର ଫୁଲଗଛରେ ଭରପୂର କରାଯାଇଛି ା ବଗିଚା ବୁଲିବା ପାଇଁ ସୁନ୍ଦର ରାସ୍ତା କରାଯାଇଛି ା ଉଦ୍ୟାନ ଉପଭୋଗ କରିବା ପାଇଁ ୮ ସିମେଣ୍ଟ ବେଞ୍ଚ୍ ଗଛ ଗଣ୍ଡି ଆକୃତିର କରାଯାଇଛି ା ନିରାପତ୍ତା ପାଇଁ ଉଦ୍ୟାନର ଚତୁଃପାର୍ଶ୍ୱରେ କମକୁଟ ପ୍ରାଚୀର ନିର୍ମାଣ କରାଯାଇଛି ା ମାତ୍ର ପରିତାପର ବିଷୟ, ରକ୍ଷଣାବେକ୍ଷଣ ଅଭାବରୁ ଏହି ଉଦ୍ୟାନ ଏବେ ସରୀସୃପମାନଙ୍କ ଆଶ୍ରୟସ୍ଥଳ ପାଲଟିଛି। ସେଠାରେ ବିଭିନ୍ନ ପଚାଶଢ଼ା ଜିନିଷ ପକାଯାଉଥିବାରୁ ପୂତିଗନ୍ଧମୟ ପରିବେଶ ସୃଷ୍ଟି ହୋଇଛି। ଫଳରେ ଉଦ୍ୟାନକୁ ଲାଗି ନିର୍ମାଣ କରାଯାଇଥିବା ବସ୍ଷ୍ଟାଣ୍ଡ ବିଶ୍ରାମାଗାରରେ ଯାତ୍ରୀମାନେ ବସିପାରୁନାହାନ୍ତି ା ଏନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି।
ଏମାନେ ଯାହା କୁହନ୍ତି …
ଶିଶୁମାନଙ୍କ ଶାରୀରିକ ଓ ମାନସିକ ବିକାଶ ପାଇଁ ନିର୍ମାଣ କରାଯାଇଥିବା ଉଦ୍ୟାନ ଏବେ ସାପଙ୍କ ଆଶ୍ରୟସ୍ଥଳ ପାଲଟିଛି ା ଏଥିସହ ମଦ୍ୟପଙ୍କ ଆଡ୍ଡାସ୍ଥଳୀ ପାଲଟିଛି। ଏଥିପ୍ରତି ଜିଲା ପ୍ରଶାସନ ଦୃଷ୍ଟିଦେବାକୁ ନିବେଦନ କରୁଛି ା
-ପ୍ରବୀର ପଣ୍ଡା, ସଭାପତି,ସଚେତନ ନାଗରିକମଞ୍ଚ ଏରସମା
ପଞ୍ଚାୟତ ବୈଠକରେ ଶିଶୁ ଉଦ୍ୟାନର ପୁନରୁଦ୍ଧାର ସମ୍ପର୍କରେ ଆଲୋଚନା କରାଯାଇଥିଲା। ଏ ସମ୍ପର୍କରେ ବ୍ଲକ ପ୍ରଶାସନର ଦୃଷ୍ଟି ଆକର୍ଷଣ କରାଯାଇଛି ା ଖୁବ୍ଶୀଘ୍ର ଏ ଦିଗରେ ପଦକ୍ଷେପ ନିଆଯିବ।
-ସଚ୍ଚିଦାନନ୍ଦ ଦାସ, ଏରସମା ସରପଞ୍ଚ
