ବିବେକ ଅଗ୍ନିହୋତ୍ରୀଙ୍କ ଫିଲ୍ମ ‘କଶ୍ମୀର ଫାଇଲ୍ସ’ ଏବେ ବକ୍ସ ଅଫିସ୍ରେ ସୁପରହିଟ୍ ସାବ୍ୟସ୍ତ ହୋଇଛି। ଯିଏ ଏହି ଫିଲ୍ମ ଦେଖୁଛନ୍ତି ସେମାନେ ପ୍ରଶଂସା ନ କରି ନିଜକୁ ଅଟକାଇ ପାରୁନାହାନ୍ତି। ଅନେକ ସେଲିବ୍ରିଟି ଏହି ଫିଲ୍ମ ଦେଖିବା ପରେ ପ୍ରତିକ୍ରିୟା ପ୍ରକାଶ କରୁଛନ୍ତି। ନିକଟରେ ବଲିଉଡର ମିଷ୍ଟର ପରଫେକ୍ସନିଷ୍ଟ ଅମିର ଖାନ ‘କଶ୍ମୀର ଫାଇଲ୍ସ’ ଦେଖିବାକୁ ସମସ୍ତଙ୍କୁ ଅପିଲ୍ କରିଛନ୍ତି।ପ୍ରତ୍ୟେକ ହିନ୍ଦୁସ୍ତାନୀ ଏହି ଫିଲ୍ମ ଦେଖିବା ଉଚିତ୍ ବୋଲି ସେ ମତ ଦେଇଛନ୍ତି।
ଦିଲ୍ଲୀରେ ଫିଲ୍ମ ‘ଆର୍ଆର୍ଆର୍’ ର ଏକ ଇଭେଣ୍ଟରେ ଅମିର ଉପସ୍ଥିତ ଥିଲେ। ଏଠାରେ ତାଙ୍କୁ ଫିଲ୍ମ ‘କଶ୍ମୀର ଫାଇଲ୍ସ’ ବିଷୟରେ ପଚରାଯାଇଥିଲା। ଏନେଇ ସେ କହିଥିଲେ,କଶ୍ମୀରୀ ପଣ୍ଡିତଙ୍କ ସହ ଯାହା ଘଟିଛି ତାହା ନିଶ୍ଚିତ ଭାବରେ ବହୁତ ଦୁଃଖର ବିଷୟ। ପ୍ରତ୍ୟେକ ଭାରତୀୟ ଏଭଳି ପ୍ରସଙ୍ଗରେ ନିର୍ମିତ ଫିଲ୍ମ ଦେଖିବା ଜରୁରୀ। ଜଣେ ବ୍ୟକ୍ତି ନିର୍ଯାତିତ ହେଲେ କ’ଣ ହୁଏ ପ୍ରତ୍ୟେକ ଭାରତୀୟ ମନେ ରଖିବା ଉଚିତ୍। ମୁଁ ନିଶ୍ଚିତ ଭାବେ ଏହି ଫିଲ୍ମ ଦେଖିବି ଏବଂ ଫିଲ୍ମଟି ଏତେ ସଫଳ ହୋଇଥିବାରୁ ମୁଁ ଖୁସି ବୋଲି ସେ କହିଛନ୍ତି।
ଏପର୍ଯ୍ୟନ୍ତ ଫିଲ୍ମକୁ ଉତ୍ତରପ୍ରଦେଶ, ମଧ୍ୟପ୍ରଦେଶ, ଗୋଆ, ହରିୟାଣା, କର୍ନାଟକ, ବିହାର ଇତ୍ୟାଦି ଅନେକ ରାଜ୍ୟରେ ଏହାକୁ ଟିକସମୁକ୍ତ କରାଯାଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଏହି ଫିଲ୍ମକୁ ବହୁତ ପ୍ରଶଂସା କରିଛନ୍ତି।
