କୋଟଗଡ,୨ା୯(ଡି.ଏନ.ଏ.): କନ୍ଧମାଳ ଜିଲା କୋଟଗଡ଼ ବ୍ଲକରେ ୧୫ ପଞ୍ଚାୟତ ରହିଛି। ଏହା ବ୍ଲକ ମୁଖ୍ୟାଳୟ ଠାରୁ ୪୦ରୁ ୫୦ କି.ମି.ଦୂରରେ ଅବସ୍ଥିତ। ଏଠାରେ ନେଟୱର୍କ ଠିକ୍ ନ ରହିବାରୁ ଆଧାର ପଞ୍ଜୀକରଣରେ ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ହାତଗଣିତି ଚାରି ପାଞ୍ଚ ପଞ୍ଚାୟତରେ ଛାଡି ଦେଲେ ଅନ୍ୟ ପଞ୍ଚାୟତଗୁଡିକରେ ଏହା ନ ଥିବାରୁ ଅନ୍ଲାଇନ କାମରେ ବାଧା ଉପୁଜୁଛି। ସମସ୍ତ ସରକାରୀ ଯୋଜନାରେ ଆଧାର ବାଧ୍ୟତାମୂଳକ କରାଯାଇଛି। କିନ୍ତୁ ଏଠାରେ ଲୋକେ ଅସୁବିଧାର ସମ୍ମୁଖୀନ ହେଉଛନ୍ତି।
ସୂଚନା ଅନୁସାରେ କୋଟଗଡ ସମନ୍ବିତ ଶିଶୁ ବିକାଶ ଅଧିକାରିଣୀ ପି. ହରଲକ୍ଷ୍ମୀଙ୍କ ନିର୍ଦ୍ଦେଶରେ ଚାଲିଛି ଜନ୍ମରୁ ୫ ବର୍ଷ ବୟସର ଶିଶୁଙ୍କ ଆଧାର ପଞ୍ଜୀକରଣ। ଏଣୁ କୋଟଗଡରେ କିଛି ଦିନ ହେଲା ଏହି ପଞ୍ଜୀକରଣ ପାଇଁ କୋଟଗଡ ଓ ଦୁର୍ଗାପଙ୍ଗା ପୋଷ୍ଟ ଅଫିସରେ ବେଳେ ବେଳେ ବ୍ଲକରେ ମା ଓ ଶିଶୁଙ୍କ ଭିଡ଼ ଦେଖିବାକୁ ମିଳୁଛି। ସିଡିପିଓଙ୍କ କହିବା ଅନୁଯାୟୀ ଜନ୍ମରୁ ୫ବର୍ଷ ଶିଶୁଙ୍କ ଆଧାର ପଞ୍ଜୀକରଣ ପାଇଁ ପ୍ରତ୍ୟେକ ସେଣ୍ଟର ଅଙ୍ଗନଓ୍ବାଡି କର୍ମୀଙ୍କୁ ନିର୍ଦ୍ଦେଶ ଦିଆଯାଇଛି। କିନ୍ତୁ କୋଟଗଡରେ ନେଟୱର୍କ ସମସ୍ୟା ଯୋଗୁ ଆଧାର ପଞ୍ଜୀକରଣ ହୋଇ ପାରୁନି। ଯେଉଁଥିପାଇଁ ମା’ ଓ ଶିଶୁ ନାହିଁ ନ ଥିବା ଅସୁବିଧା ଭୋଗୁଥିବା ଦେଖିବାକୁ ମିଳୁଛି। ଦିନ ଦିନ ଧରି ବ୍ଲକ କାର୍ଯ୍ୟାଳୟ, ପୋଷ୍ଟ ଅଫିସରେ ଠିଆ ହୋଇ ନିରାଶରେ ଘରକୁ ଫେରୁଥିବା ଦେଖିବାକୁ ମିଳୁଛି। କୋଟଗଡ଼ରେ ବହୁଦିନ ହେଲା ୪ଜି ନେଟ୍ୱର୍କ ସମସ୍ୟା ଲାଗି ରହିଥିବା ଦେଖିବାକୁ ମିଳୁଛି । ଏ ସମ୍ପର୍କରେ ପୋଷ୍ଟ ଅଫିସ କର୍ମଚାରୀ ମନୋଜ ପାଣିଗ୍ରାହୀଙ୍କୁ ପଚାରିବାରୁ ନେଟ୍ୱର୍କ ସମସ୍ୟା ଯୋଗୁ ଆମେ ଲୋକଙ୍କୁ ସେବା ଯୋଗାଇ ପାରୁନୁ। କୋଟଗଡ଼ରେ ଏହି ସମସ୍ୟା ବହୁଦିନ ହେଲା ଲାଗି ରହିଛି। ଏଥିଯୋଗୁ ଦିନକୁ ୮/୧୦ ଜଣଙ୍କର ହିଁ ବଡ଼ କଷ୍ଟରେ ନଁା ପଞ୍ଜୀକରଣ ହୋଇ ପାରୁଛି। ଅଳ୍ପ ସଂଖ୍ୟକ ଆଧାର ଥିବା ପିଲାଙ୍କ ଲିଙ୍କ୍ ହୋଇପାରୁଛି। ସିଡିପିଓ ପି. ହରଲକ୍ଷ୍ମୀଙ୍କ କହିବା ଅନୁସାରେ, ଶତ ପ୍ରତିଶତ ସଂଯୋଗ ନେଟ୍ୱର୍କ ସମସ୍ୟା ପାଇଁ ହୋଇ ପାରିବନି। ଯଦି ଏହି ସମସ୍ୟା ଲାଗି ରହେ ତେବେ ବହୁ ଶିଶୁ ସରକାରୀ ଯୋଜନାରୁ ବଞ୍ଚିତ ହେବେ।ଏଣୁ ପ୍ରଶାସନ ଏଥିପ୍ରତି ଦୃଷ୍ଟି ଦେଇ ଏହାର ସମାଧାନ ଲାଗି ପଦକ୍ଷେପ ନେଲେ ଶିଶୁମାନେ ଉପକୃତ ହେବେ ବୋଲି କୋଟଗଡ ଅଞ୍ଚଳବାସୀ ଦାବି କରିଛନ୍ତି।
