ଡିଜିଟାଲ ସୁବିଧା ଏବଂ ବ୍ୟକ୍ତିଗତ ସୁରକ୍ଷାକୁ ଅଧିକ ସୁନିଶ୍ଚିତ କରିବା ପାଇଁ କେନ୍ଦ୍ର ସରକାର ଆଧାରର ଏକ ନୂଆ ଆପ୍ ଉନ୍ମୋଚନ କରିଛନ୍ତି। ସରକାରୀ ଯୋଜନାଗୁଡ଼ିକର ସୁବିଧା ପାଇବା ଲାଗି ଏବେ ଆଉ ପୂର୍ବଭଳି ପ୍ରତ୍ୟେକ ସ୍ଥାନରେ ଆଧାର କାର୍ଡ କିମ୍ବା ଏହାର ଫଟୋ କପି ଆବଶ୍ୟକ ପଡ଼ିବ ନାହିଁ। କିନ୍ତୁ ଏଥିରେ ଫେସିଆଲ୍ ରେକଗ୍ନିଶନ(ବ୍ୟକ୍ତିଙ୍କ ମୁହଁକୁ ସ୍କାନ୍ କରି ପରିଚୟ ଚିହ୍ନଟ) ବୈଶିଷ୍ଟ୍ୟକୁ ସଂଲଗ୍ନ କରାଯାଇଛି। ଡିଜିଟାଲ୍ ଭେରିଫିକେଶନ ଜରିଆରେ ସୁବିଧା ହାସଲ ପାଇଁ ୟୁପିଆଇ ଏବଂ ଅନ୍ୟ ଡିଜିଟାଲ୍ ପେମେଣ୍ଟ ସିଷ୍ଟମ ଭଳି ଆଧାର ଆପ୍କୁ ମୋବାଇଲ ଫୋନ୍ରେ ଡାଉନ୍ଲୋଡ୍ କରିବାକୁ ପଡ଼ିବ। ଫଳରେ ଏଥିରେ ମିଳିବାକୁ ଥିବା କ୍ୟୁଆର୍ କୋଡ୍ ସାହାଯ୍ୟରେ ଜଣେ ବ୍ୟକ୍ତି ହୋଟେଲ, ଦୋକାନ, ବିମାନବନ୍ଦର ଏବଂ ଅନ୍ୟାନ୍ୟ ଆଧାର ଯାଞ୍ଚ ସ୍ଥାନରେ ସହଜରେ ତଥ୍ୟ ପ୍ରଦାନ କରିପାରିବେ ବୋଲି କେନ୍ଦ୍ର ସୂଚନା ଏବଂ ପ୍ରଯୁକ୍ତିବିଦ୍ୟା (ଆଇଟି) ମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି। ଏହି ନୂଆ ଆପ୍ ଦ୍ୱାରା ଲୋକମାନଙ୍କ ବ୍ୟକ୍ତିଗତ ତଥ୍ୟ ଅଧିକ ସୁରକ୍ଷିତ ହେବା ସହ ଡକ୍ୟୁମେଣ୍ଟ ଜାଲିଆତିକୁ ରୋକାଯାଇ ପାରିବ ବୋଲି ସରକାରଙ୍କ ପକ୍ଷରୁ କୁହାଯାଇଛି। ତେବେ ଏହାର କାର୍ଯ୍ୟକାରିତାକୁ ନେଇ ଜନସାଧାରଣଙ୍କ ମଧ୍ୟରେ ସନ୍ଦେହ ସୃଷ୍ଟି ହୋଇଛି। ପୂର୍ବରୁ ଡାର୍କଓ୍ବେବ ସମେତ ବେଆଇନ କାର୍ଯ୍ୟକଳାପ ପାଇଁ ଉଦ୍ଦିଷ୍ଟ କେତେକ ଓ୍ବେବ୍ସାଇଟରେ କାର୍ଡଧାରୀଙ୍କ ଠିକଣା, ଜନ୍ମ ତାରିଖ ଭଳି ବ୍ୟକ୍ତିଗତ ସୂଚନା ଉପଲବ୍ଧ ହୋଇଥିବାରୁ ନୂଆ ଆପ୍ରେ ଲୋକଙ୍କ ପ୍ରିଭେସି କେତେ ସୁରକ୍ଷିତ, ସେନେଇ ପ୍ରଶ୍ନ ଉଠିଲାଣି।
ଭୁବନେଶ୍ୱର,୧୦ା୪(ଅନୁରାଧା ମହାରଣା)ବର୍ତ୍ତମାନ ବିଭିନ୍ନ ସରକାରୀ ଓ ବେସରକାରୀ କାର୍ଯ୍ୟ ପାଇଁ ଆଧାର କାର୍ଡ ଖୁବ୍ ଗୁରୁତ୍ୱପୂର୍ଣ୍ଣ ହୋଇପଡ଼ିଛି। ଏଭଳି ପରିସ୍ଥିତିରେ ଏହାର ବ୍ୟବହାରକୁ ସହଜ ଏବଂ ଅଧିକ ପ୍ରଭାବଶାଳୀ କରିବାକୁ ସରକାର ଏକ ନୂତନ ବୈଶିଷ୍ଟ୍ୟ ଆରମ୍ଭ କରିଛନ୍ତି। ଡିଜିଟାଲାଇଜେଶନ ଦିଗରେ ଏହା ଏକ ବଡ଼ ପଦକ୍ଷେପ। କେନ୍ଦ୍ର ଆଇଟି ମନ୍ତ୍ରୀ ଅଶ୍ୱିନୀ ବୈଷ୍ଣବ ଫେସ୍ ଆଇଡି ପ୍ରାମାଣିକୀକରଣ ବୈଶିଷ୍ଟ୍ୟଯୁକ୍ତ ବା ଫେସ୍ ରେକଗ୍ନିଶନ ନାମରେ ଏକ ନୂତନ ଆଧାର କାର୍ଡ ଆପ୍ ଲଞ୍ଚ କରିଛନ୍ତି। ଏହା ସାହାଯ୍ୟରେ ହୋଟେଲ କିମ୍ବା ବିମାନବନ୍ଦରରେ ପ୍ରବେଶ କରିବା ସମୟରେ ଆଧାର କାର୍ଡର ସଫ୍ଟ କିମ୍ବା ହାର୍ଡ କପି ପ୍ରଦାନ କରିବାର କୌଣସି ଆବଶ୍ୟକତା ନାହିଁ॥ ୟୁନିକ ଆଇଡେଣ୍ଟିଫିକେଶନ ଅଥରିଟି ଅଫ ଇଣ୍ଡିଆ (ୟୁଆଇଡିଏଆଇ) ଏହି ନୂତନ ଆଧାର ଆପ୍ ବିକଶିତ କରିଛି, ଯାହା ବର୍ତ୍ତମାନ ବିଟା ପରୀକ୍ଷଣ ପର୍ଯ୍ୟାୟରେ ଅଛି। ଏହା ସଫଳ ହେଲେ ଲୋକମାାନେ ଆଧାର କାର୍ଡ ପାଖରେ ରଖିବା ଆବଶ୍ୟକ ହେବ ନାହିଁ। କ୍ୟୁଆର୍କୋଡ୍ ଏବଂ ଫେସ୍ ଆଇଡି ମାଧ୍ୟମରେ ଯାଞ୍ଚ ପ୍ରକ୍ରିୟା କିଛି ମିନିଟରେ ଶେଷ ହେବ। ଆପ୍ର ସୁରକ୍ଷା ଏବଂ ଗୋପନୀୟତା ପାଇଁ ଆର୍ଟିଫିସିଆଲ ଇଣ୍ଟେଲିଜେନ୍ସ (ଏଆଇ) ର ସାହାଯ୍ୟ ନିଆଯାଉଛି। ଏହି ନୂତନ ଆଧାର ଆପରେ ଗୋପନୀୟତା ଉପରେ ଗୁରୁତ୍ୱ ଦିଆଯାଇଛି। ଏହାର ଅର୍ଥ ହେଉଛି ବ୍ୟକ୍ତିଗତ ବିବରଣୀଗୁଡ଼ିକର ସମ୍ପୂର୍ଣ୍ଣ ନିୟନ୍ତ୍ରଣ ବ୍ୟବହାରକାରୀଙ୍କ ହାତରେ ରହିବ। ଯେହେତୁ ଆପ୍ରେ ଡେଟା ଅଂଶୀଦାର ପାଇଁ ଉପଭୋକ୍ତାଙ୍କ ସମ୍ମତି ଆବଶ୍ୟକ ହେବ, ତଥାପି ଗୋପନୀୟତା ମଧ୍ୟ ବଜାୟ ରହିବ। ଫେସ୍ ଆଇଡି ପ୍ରାମାଣୀକରଣ ହେତୁ ଆଧାର ଯାଞ୍ଚ ବର୍ତ୍ତମାନ କେବଳ ଚେହେରା ମାଧ୍ୟମରେ କରାଯିବ। ଏହି ପ୍ରକ୍ରିୟା ୟୁପିଆଇ କାରବାର ପରି ସହଜ ହେବ। ୟୁଡିଆଇ ଦାବି କରିଛି ଯେ, ଏହା ୧୦୦% ଡିଜିଟାଲ ଏବଂ ସୁରକ୍ଷିତ ଥିବାରୁ ଏଥିରେ ଥିବା ତଥ୍ୟକୁ ଟାମ୍ପରିଂ କରାଯାଇପାରିବ ନାହିଁ। ଏହା ତଥ୍ୟ ଲିକ୍ କରିବ ନାହିଁ କିମ୍ବା ଏହାର ଅପବ୍ୟବହାର ହେବାକୁ ଦେବ ନାହିଁ। ଫଟୋଶପ୍ ଭଳି ଅପବ୍ୟବହାର ମଧ୍ୟ ହେବାକୁ ଦେବ ନାହିଁ ବୋଲି ମନ୍ତ୍ରୀ ବୈଷ୍ଣବ ସୂଚନା ଦେଇଛନ୍ତି।
ଅପରପକ୍ଷରେ ସାଇବର ସୁରକ୍ଷା ବିଶେଷଜ୍ଞ ଲିଙ୍ଗରାଜ ସେଠୀଙ୍କ କହିବାନୁସାରେ, ମଣିଷ ଯେତେ ଡିଜିଟାଇଜେଶନ୍ ଯୁଗକୁ ପ୍ରବେଶ କରୁଛି, ସେମାନଙ୍କ ଗୋପନୀୟତା କିଛି ନା କିଛି ମାତ୍ରାରେ ଅସୁରକ୍ଷିତ ହେଉଛି। ଅନ୍ୟ ଆପ୍ ଭଳି ଆଧାର ଆପ୍ରେ ମଧ୍ୟ ବ୍ୟବହାରକାରୀ ସତର୍କ ରହିବା ଉଚିତ୍। ଆଧାର ଆପ୍କୁ ଆୟତ୍ତ କରିବା ସାଇବର ଅପରାଧୀଙ୍କ ପାଇଁ ଯଦିଓ ସହଜ ନୁହେଁ ମାତ୍ର ଅସମ୍ଭବ ମଧ୍ୟ ନୁହେଁ, କୌଣସି ସ୍ଥାନରେ କେହି ଆଧାର ମାଗିଲେ, ବ୍ୟବହାରକାରୀ ପ୍ରଥମେ ଭଲରେ ବୁଝିନେବା ଜରୁରୀ କି କେଉଁଥି ପାଇଁ ଆଧାର ତଥ୍ୟ ମଗାଯାଉଛି। ସେହିଭଳି ମୋବାଇଲ୍ କିଣିବାବେଳେ ହେଉ ବା ଅନ୍ୟାନ୍ୟ ସମୟରେ ଆଧାର ତଥ୍ୟ ନେଉଥିବା ବ୍ୟକ୍ତି ବା ଅନୁଷ୍ଠାନ ଏ ସମ୍ପର୍କରେ ଉପଭୋକ୍ତାଙ୍କୁ ଅବଗତ କରାଇବା ମଧ୍ୟ ଆବଶ୍ୟକ ବୋଲି ଲିଙ୍ଗରାଜ କହିଛନ୍ତି॥
