ଭୁବନେଶ୍ୱର,୨୩।୧୨ (ବ୍ୟୁରୋ): ପ୍ଲାଷ୍ଟିକ ସର୍ଜରି କ୍ଷେତ୍ରରେ ଭୁବନେଶ୍ୱର ଏମ୍ସକୁ ମିଳିଛି ଆଉ ଏକ ସଫଳତା। ସ୍ବତନ୍ତ୍ର ଡାକ୍ତରୀ ଟିମ୍ ୧୦ ଘଣ୍ଟାର ଅପରେଶନ ପରେ ଜଣେ ଯୁବତୀଙ୍କ ସମ୍ପୂର୍ଣ୍ଣ କଟା ହାତକୁ ଯୋଡିବାରେ ସକ୍ଷମ ହୋଇଛନ୍ତି। ଡିସେମ୍ବର ୯ ତାରିଖ ଅପରାହ୍ନ ପ୍ରାୟ ୪ଟା ବେଳେ ପୁରୀ ଜିଲା କ୍ୃଷ୍ଣପ୍ରସାଦ ବ୍ଲକ ସାମନ୍ତରାପୁର ଗାଁରେ ମେଶିନରେ ଧାନକଟା ଯାଉଥିଲା। ଧାନ କଟା ମେଶିନ ପାଖରେ ୨୫ ବର୍ଷୀୟା ବର୍ଷା ସାହୁ ଛିଡ଼ା ହୋଇଥିଲେ। ହଠାତ୍ ବର୍ଷାଙ୍କ ଓଢ଼ଣି ମେଶିନରେ ଗୁଡ଼େଇ ହୋଇ ଯାଇଥିଲା। କିଛି ଭାବିବା ଆଗରୁ ତାଙ୍କ ବାମ ହାତ ମେଶିନ୍ ଭିତରକୁ ଟାଣି ହୋଇ ଯାଇଥିଲା। ମେଶିନ୍ରେ ହାତ କଟିଯାଇ ୫୦ ମିଟର ଦୂରରେ ଛିଟିକି ପଡ଼ିଥିଲା। ପରିବାର ଲୋକେ କଟାହାତ ସହ ବର୍ଷାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ସ୍ଥାନୀୟ ସରକାରୀ ମେଡିକାଲରେ ଭର୍ତ୍ତି କରିଥିଲେ। ସେଠାରୁ ତାଙ୍କୁ ପ୍ରଥମେ ବ୍ରହ୍ମପୁର ଏମ୍କେସିଜି ମେଡିକାଲ କଲେଜ ଓ ହସ୍ପିଟାଲ ଏବଂ ପରେ ଭୁବନେଶ୍ୱର ଏମ୍ସକୁ ପଠା ଯାଇଥିଲା। ଶରୀରରୁ ହାତ ଅଲଗା ହୋଇଯାଇଥିବାରୁ ଏମ୍ସ ଡାକ୍ତର ଏହାକୁ ଚ୍ୟାଲେଞ୍ଜ ଭାବେ ଗ୍ରହଣ କରିଥିଲେ। ସଙ୍ଗେ ସଙ୍ଗେ ଅପରେଶନ ପାଇଁ ଟିମ୍ ଗଠନ କରାଯାଇ ରାତି ପ୍ରାୟ ୧୧.୩୦ରେ ଅପରେଶନ ଆରମ୍ଭ ହୋଇଥିଲା। ପୂରା ରାତି ଅପରେଶନ ଚାଲି ସକାଳ ୮ଟାରେ ଅପରେଶନ ସଫଳ ହୋଇଥିଲା। ଏ ସମ୍ପର୍କରେ ଏମ୍ସ କାର୍ଯ୍ୟନିର୍ବାହୀ ନିର୍ଦ୍ଦେଶକ ଡା. ଆଶୁତୋଷ ବିଶ୍ୱାସ ଓ ପ୍ଲାଷ୍ଟିକ ସର୍ଜରୀ ବିଭାଗ ମୁଖ୍ୟ ଡା. ସଞ୍ଜୟ କୁମାର ଗିରି କହିଛନ୍ତି, ଅପରେଶନ ବହୁତ ଆହ୍ବାନପୂର୍ଣ୍ଣ ଥିଲା। ସ୍ଥାନୀୟ ଡାକ୍ତରଖାନାର ଡାକ୍ତର କଟାହାତକୁ ପ୍ରିଜର୍ଭ କରି ପଠାଇଥିବାରୁ ଅପରେଶନ ସହଜ ହୋଇଥିଲା। ବର୍ଷାଙ୍କୁ ସମ୍ପୂର୍ଣ୍ଣ ସୁସ୍ଥ ହେବାକୁ ୩ରୁ ୪ ମାସ ସମୟ ଲାଗିବ ବୋଲି ଡାକ୍ତର କହିଛନ୍ତି। ସେହିପରି ବର୍ଷା କହିଛନ୍ତି, ହାତ ପୁଣି ଥରେ ଯୋଡ଼ି ହୋଇ ପାରିବ ବୋଲି ଭାବି ନ ଥିଲି। ଦ୍ୱିତୀୟ ଭଗବାନ ଭାବେ ଡାକ୍ତରମାନେ ମୋତେ ନୂଆ ଜୀବନ ଦେଇଛନ୍ତି। ଡା. ସଞ୍ଜୟ ଗିରିଙ୍କ ନେତୃତ୍ୱରେ ଅପରେଶନ ହୋଇଥିବାବେଳେ ଟିମ୍ରେ ପ୍ଲାଷ୍ଟିକ ସର୍ଜରି ବିଭାଗର ଡା. ଶାନ୍ତନୁ ସୁବା, ଡା. ପ୍ରିୟଙ୍କା ପନ୍ତ, ଡା. ଆକାଂକ୍ଷା ରାଜପୁତ, ଡା. ବିଷ୍ଣୁ, ଆନାସ୍ଥେସିଆ ବିଭାଗ ଡା. ଜୟନ୍ତ ମିତ୍ର, ଡା. ହୃଷୀକେଶ, ଡା. ଶୈଳଜା, ଅର୍ଥପେଡିକ ବିଭାଗର ଡା. ନିଖଳ ଓ ଡା. ମନୋଜ ପ୍ରମୁଖ ସାମିଲ ହୋଇଥିଲେ।
