ଓ୍ବାଶିଂଟନ,୧୬।୧: ଆମେରିକାର ଜଣେ ମହିଳା ଓ୍ବେଟର ଜଣେ ନାବାଳକଙ୍କ ଜୀବନ ବଞ୍ଚାଇ ଚର୍ଚ୍ଚାକୁ ଆସିଛନ୍ତି। ଏହି ବାଳକ ଜଣଙ୍କୁ ତାଙ୍କ ମା ଏବଂ ସାବତ ବାପା ହୋଟେଲରେ ଖୁବ୍ ଜୋରରେ ପିଟୁଥିଲେ। ବିଚରା ପିଲାଟି କିଛି ବି ପ୍ରତିବାଦ କରୁ ନ ଥିଲା। ଏହା ଦେଖି ସେହି ହୋଟେଲରେ କାମ କରୁଥିବା ମହିଳା ଓ୍ବେଟର ଜଣକ ସହି ପାରି ନ ଥିଲେ। ଗୁପ୍ତରେ ଚିଠି ଲେଖି ଉକ୍ତ ବାଳକଙ୍କୁ ସାହାଯ୍ୟ କରିବେ ବୋଲି ପଚାରିଲେ। ସେ ହଁ କହିବାରୁ ଓ୍ବେଟର ଜଣକ ତାଙ୍କୁ ସାହାଯ୍ୟ କରିବାକୁ ଆଗେଇ ଆସିଥିଲେ। ଜାଣନ୍ତୁ ପୂରା ଘଟଣା ସମ୍ପର୍କରେ…
ଆମେରିକାର ଓରଲ୍ୟାଣ୍ଡରେ ଫ୍ଲେବିନ୍ କାରବାହ୍ଲୋ ମିସେସ ପଟାଟୋ ରେଷ୍ଟୁରାଣ୍ଟରେ କାମ କରୁଥିଲେ। ନୂଆ ବର୍ଷ ଉପଲକ୍ଷେ ଏହି ରେଷ୍ଟୁରାଣ୍ଟକୁ ଏକ ଦମ୍ପତି ଆସିଥିଲେ। ୩୧ ବର୍ଷୀୟ କ୍ରିଷ୍ଟନ ସ୍ବେନ୍ ଏବଂ ୨୪ ବର୍ଷୀୟ ଟିମୋଥୀଙ୍କ ସହ ତାଙ୍କର ୧୧ବର୍ଷର ପୁଅ ଆସିଥିଲେ।
ଫ୍ଲେବିନ୍ କୁହନ୍ତି, ସେ ସ୍ବାମୀ, ସ୍ତ୍ରୀ ଏବଂ ପିଲାଙ୍କୁ ଦେଖି ମୋତେ କିଛି ଅଲଗା ଲାଗୁଥିଲା। କାରଣ ଏହି ଦୁଇଜଣ ନିଜେ ଖାଇବା ପାଇଁ ଅର୍ଡର କରିଥିଲେ ସୁଦ୍ଧା ପିଲାଟିକୁ କିଛି ଦେଇ ନ ଥିଲେ। ପରେ ତାଙ୍କ ବାପା କହିଥିଲେ ସେ ଘରେ ଖାଇବ। ମୁଁ ଦେଖିଲି ପିଲାଟିର ହାତ ଏବଂ ମୁହଁରେ କିଛି ଦାଗ ରହିଛି। ତାଙ୍କର ବିଶ୍ୱାସ ହେଲା ସେ ପିଲାଟିକୁ ସାହାଯ୍ୟ କରିବେ। ସେ ଗୁପ୍ତରେ ଏକ ଚିଠି ଲେଖି ପିଲାଟି ପାଖରେ ରଖିଦେଲେ। ଏଥିରେ ଲେଖାଥିଲା ମୁଁ ତୁମକୁ ସାହାଯ୍ୟ କରିପାରେ କି? ଫ୍ଲେବିନ୍ଙ୍କ ଲେଖା ଦେଖି ପିଲାଟି ମଧ୍ୟ ଇସାରା ଦେଇ ସାହାଯ୍ୟ ଚାହିଁଲା। ଏହା ପରେ ଫ୍ଲେବିନ୍ ପୋଲିସକୁ ସୂଚନା ଦେଇଥିଲେ। ପୋଲିସ ହୋଟେଲରେ ପହଞ୍ଚି ପିଲାଟିକୁ ଉଦ୍ଧାର କରିବା ସହିତ ମା-ବାପାଙ୍କୁ ଗିରଫ କରିଛି।
