ଚଣ୍ଡିଖୋଲ,୧୫।୬(ପ୍ରଦୀପ୍ତ କୁମାର ପୃଷ୍ଟି): ବଡ଼ଚଣା ବିଧାନସଭା କ୍ଷେତ୍ରରେ ଦୀର୍ଘ ବର୍ଷ ଧରି ବିଜୁ ଜନତା ଦଳ (ବିଜେଡି) କ୍ଷମତାରେ ଥିବାବେଳେ ଚଳିତ ନିର୍ବାଚନରେ ଭାରତୀୟ ଜନତାପାର୍ଟି(ଭାଜପା) ବିଜୟ ଲାଭ କରିଛି। ଭାଜପାର ଅମର ନାୟକ ବିଜୟୀ ହୋଇଛନ୍ତି। ତେବେ ଏହି ନିର୍ବାଚନମଣ୍ଡଳୀରୁ ବିଜେଡିରୁ ୬ ଥର ବିଧାୟକ ହୋଇଥିବା ଅମର ପ୍ରସାଦ ଶତପଥୀଙ୍କୁ ଦଳ ଏଥର ଟିକେଟ ଦେଇ ନ ଥିଲା। ତାଙ୍କ ସ୍ଥାନରେ ଚଳଚ୍ଚିତ୍ର ତାରକା ବର୍ଷା ପ୍ରିୟଦର୍ଶିନୀଙ୍କୁ ଦଳ ପ୍ରାର୍ଥୀ କରିଥିଲା। ନିର୍ବାଚନ ଶେଷ ହେବା ପରେ ଅମର ଶତପଥୀଙ୍କ ଏକ ଭିଡିଓ ବାର୍ତ୍ତା ଭାଇରାଲ ହେବାରେ ଲାଗିଛି, ଯାହାକି ବଡ଼ଚଣା ନିର୍ବାଚନମଣ୍ଡଳୀରେ ଚର୍ଚ୍ଚାର ବିଷୟ ପାଲଟିଛି। ଏଥିରେ ସେ କହିଛନ୍ତି, ବଡ଼ଚଣାବାସୀ ଶିକ୍ଷିତ ଓ ସ୍ବାଭିମାନୀ। ତେଣୁ ବଡ଼ଚଣାର ଅସ୍ମିତାକୁ ଗୁରୁତ୍ୱ ଦେଇଛନ୍ତି। ଏହି ମାଟିରେ ଦୀର୍ଘ ୫୦ବର୍ଷ ଧରି ସେ ରାଜନୀତି କରିଆସିଛନ୍ତି। ବଡ଼ଚଣାବାସୀଙ୍କ ପ୍ରତ୍ୟେକ ସୁଖ ଦୁଃଖରେ ପହଞ୍ଚତ୍ଛନ୍ତି। ଲୋକଙ୍କ ସହିତ ପାରିବାରିକ ସମ୍ପର୍କ ବେଶ୍ ନିବିଡ଼ ରହିଛି। ଏହାକୁ ଦଳର ମୁଖ୍ୟ ବୁଝିପାରି ନାହାନ୍ତି ବୋଲି ଶତପଥୀ କହିଛନ୍ତି। ଗତ ଏପ୍ରିଲ ୩୦ରେ ବଡ଼ଚଣା ମହୋତ୍ସବ ପଡ଼ିଆରେ ହୋଇଥିବା ଜନସମାବେଶ କିପରି ଥିଲା ତାହାକୁ କେହି ହୃଦୟଙ୍ଗମ କରିପାରି ନାହାନ୍ତି। ତେବେ ଆଗାମୀ ଦିନରେ ସଙ୍ଗଠନକୁ ସୁଦୃଢ କରିବାକୁ ସେ ଏହି ଭିଡିଓରେ କର୍ମୀମାନଙ୍କୁ ଆହ୍ବାନ ଦେଇଛନ୍ତି। ଏହି ଘଟଣା ବଡ଼ଚଣାରେ ବେଶ୍ ଆଲୋଡ଼ନ ସୃଷ୍ଟି କରିଛି। ଏଥି ମଧ୍ୟରେ ନିର୍ବାଚନ ସରିବା ୧୪ଦିନ ବିତି ଯାଇଥିଲେ ବି ବିଜେଡି ତରଫରୁ କୌଣସି ସଭା ସମିତି ହୋଇନାହିଁ କିମ୍ବା ନିର୍ବାଚନୀ ସମୀକ୍ଷା ହୋଇନାହିଁ। ଅମର ଶତପଥୀଙ୍କୁ ଦଳ ତରଫରୁ କୌଣସି ଦାୟିତ୍ୱ ଦିଆଯାଇ ନ ଥିଲା। ଏପରି କି ପ୍ରଚାରରେ ମଧ୍ୟ ସାମିଲ କରାଯାଇ ନ ଥିଲା। କେବଳ ତାଙ୍କୁ ନୀରବ ରହିବା ପାଇଁ ବରିଷ୍ଠ ଉପସଭାପତି ପଦବୀ ପ୍ରଦାନ କରାଯାଇଥିଲା। ନିର୍ବାଚନ ସମୟରେ ସେ ବଡ଼ଚଣାକୁ ଆଦୌ ଆସି ନ ଥିବାବେଳେ ନିର୍ବାଚନ ପରେ ବିଭିନ୍ନ ସାମାଜିକ କାର୍ଯ୍ୟକ୍ରମରେ ଯୋଗଦେଇଥିବା ପରିଲକ୍ଷିତ ହୋଇଛି।
ବିଜେଡିର ମଙ୍ଗ ଧରିଥିବା ନେତୃମଣ୍ଡଳୀ ଓ ବର୍ଷାଙ୍କୁ ଜିତାଇବା ପାଇଁ ସଂକଳ୍ପ ନେଇଥିବା ବିଭିନ୍ନ ପଦାଧିକାରୀଙ୍କ ଆଉ ଦେଖା ମିଳୁନାହିଁ। ଏହାକୁ ନେଇ କର୍ମୀ ମହଲରେ ଅସନ୍ତୋଷ ଦେଖାଦେଇଛି। ଅମର ସାମାଜିକ କାର୍ଯ୍ୟକ୍ରମରେ ଯୋଗ ଦେଉଥିଲାବେଳେ ପୁରୁଖା କର୍ମୀମାନେ ତାଙ୍କ ସହିତ ଯାଉଥିବା ପରିଲକ୍ଷିତ ହୋଇଛି। ଖୁବ୍ଶୀଘ୍ର ସେ ବଡ଼ଚଣାରେ କର୍ମୀମାନଙ୍କୁ ସଙ୍ଗଠିତ କରି ପୁନର୍ବାର ରାଜନୈତିକ କାର୍ଯ୍ୟକ୍ରମ ଆରମ୍ଭ କରିବେ ବୋଲି ଜଣାପଡ଼ିଛି।
ସୂଚନାଥାଉକି, ୨୦୦୪ରେ ଅମର ଶତପଥୀଙ୍କ ଟିକେଟ କାଟି ଦିଆଯାଇଥିଲା। ଏଠାରୁ ସେ ସମୟରେ ଗୌତମ ରାୟଙ୍କୁ ଟିକେଟ ଦିଆଯାଇଥିଲା। ସେ ବଡ଼ଚଣା ଅଞ୍ଚଳ ଲୋକ ହୋଇ ନ ଥିବାରୁ ଭୋଟର କଂଗ୍ରେସର ସୀତାକାନ୍ତ ମହାପାତ୍ରଙ୍କୁ ବିଜୟୀ କରାଇଥିଲେ। ଏହାର ୨୦ବର୍ଷ ପରେ ପୁନର୍ବାର ବଡ଼ଚଣା ବାହାରର ପ୍ରାର୍ଥୀ ବର୍ଷାଙ୍କୁ ଟିକେଟ ଦିଆଯିବା ଯୋଗୁ ବଡ଼ଚଣାବାସୀ ସ୍ବାଭିମାନର ପ୍ରତୀକ ସ୍ବରୂପ ଭାଜପା ପ୍ରାର୍ଥୀ ଅମର ନାୟକଙ୍କୁ ବିଜୟୀ କରାଇଥିବା ଚର୍ଚ୍ଚା ହେଉଛି। ଏ ସମ୍ପର୍କରେ ଅମର ଶତପଥୀଙ୍କୁ ପଚାରିବାରୁ ସେ କୁହନ୍ତି, ଯାହା ସତ୍ୟ ଘଟଣା ହୋଇଛି, ତାହା ଭିଡିଓ ବାର୍ତ୍ତା ମାଧ୍ୟମରେ ଜଣାଇଛି।
