କଟକ ସଦର,୨।୯(ସୁଶାନ୍ତ କୁମାର ଜେନା): କଟକ ସଦର ଅଞ୍ଚଳରେ ମଙ୍ଗଳବାର ସକାଳୁ ଝିପିଝିପି ବର୍ଷା ଲାଗିରହିଛି। ଆଜି ଦିନ ୧୦ଟାରେ କଟକ-ପାରାଦୀପ ଏନଏଚ ୫୫ର ନାହାଭଙ୍ଗା ନିକଟରେ ଏକ ବଡ ଆକାଶି ଗଛ ଭାଙ୍ଗି ପଡିଥିଲା। ଫଳରେ ଗଛର ମୋଟା ଡାଳ କାର ଉପରେ ପଡ଼ିଥିଲା। ସେହି କାରର ହୁଡ ଭାଙ୍ଗି ଯାଇଥିବାବେଳେ ଯାତ୍ରୀ ସୁରକ୍ଷିତ ଥିଲେ। ମାତ୍ର କାରକୁ ଅତିକ୍ରମ କରି ଯାଉଥିବା ୨ ବାଇକ ଆରୋହୀଙ୍କ ଶରୀରରେ ଗଛ ଡାଳର ଆଘାତ ଲାଗିଛି। ଉଭୟଙ୍କୁ ଚିକିତ୍ସା ପାଇଁ ସଙ୍ଗେ ସଙ୍ଗେ କଟକବଡ଼ ଡାକ୍ତରଖାନାକୁ ଆମ୍ବୁଲାନ୍ସ ଯୋଗେ ପଠାଇ ଦିଆଯାଇଥିଲା।
ଉକ୍ତ ରାସ୍ତାରେ ପ୍ରତି ଘଣ୍ଟାରେ ହଜାର ହଜାର ସଂଖ୍ୟାରେ ହାଲୁକା ଓ ଭାରିଯାନ ଉଭୟ ପଟୁ ଚଳାଚଳ କରୁଥିଲେ ସୁଦ୍ଧା ପାର୍ଶ୍ୱରେ ଲାଗିଥିବା ଗଛର ବଡ ବଡ ଡାଳ ରାସ୍ତାକୁ ମାଡି ଆସିଛି। କେତେବେଳେ ଡାଳ ଭାଙ୍ଗି କାହାର ଜୀବନ ଯିବ, ତାର ଉତ୍ତର ପରିବହନ ଓ ଜାତୀୟ ରାଜପଥ ପ୍ରାଧିକରଣ ପାଖରେ ନାହିଁ। ରାସ୍ତାରେ ସିସିଟିଭି ଲାଗିଥିଲେ ସୁଦ୍ଧା ପରିବହନ ବିଭାଗ କେବଳ ଟ୍ରାଫିକ ନିୟମ ମାନୁ ନ ଥିବା ଗାଡ଼ି ମୋଟର ଉପରେ ଜରିମାନା ଧାର୍ଯ୍ୟ କରି ଚୁପଚାପ ବସିଯାଉଥିବା ଅଭିଯୋଗ ହୋଇଛି।
ଏହି ରାସ୍ତାରେ ପ୍ରତ୍ୟେକ ଦିନ ବିଚାରପତି, ଆଇଏଏସ ଅଫିସର, ମନ୍ତ୍ରୀ, ନେତା ଯାତାୟାତ କରୁଥିଲେ ସୁଦ୍ଧା ମୌଳିକ ସମସ୍ୟା ଉପରେ କାହାର ନଜର ନ ପଡ଼ିବା ଦୁର୍ଭାଗ୍ୟଜନକ ବୋଲି ନାହାଭଙ୍ଗା ଭଙ୍ଗା ଅଞ୍ଚଳର ଯୁବନେତା ତଥା ଯାଦବ ମହାସଭାର କଟକ ଜିଲା ସଭାପତି ସମର ବେହେରା କହିଛନ୍ତି। ଏହି ରାସ୍ତା ପାଶର୍ବରେ ଗୋପାଳକମାନେ ଗୋରୁ ଚରାଉଥିବାରୁ ସେମାନଙ୍କ ଜୀବନବିପନ୍ନ ହେବା ନିଶ୍ଚିତ ବୋଲି ବେହେରା ସରକାରଙ୍କ ନିକଟରେ ଦାବି କରିଛନ୍ତି।ଏହି ରାସ୍ତା ପାଶର୍ବରେ ବହୁ ସଂଖ୍ୟାରେ ଟ୍ରକ ରହଣି କରୁଥିବାରୁ ଏଥିରେ ଧନଜୀବନ କ୍ଷତି ଘଟିବା ନିଶ୍ଚିତ ହୋଇଯାଉଛି। ପରିବହନ ବିଭାଗ ଧନଜୀବନ ପ୍ରତି ଦୃଷ୍ଟି ନ ଦେଲେ ଆଗାମୀ ଦିନରେ ସ୍ଥାନୀୟ ଜନସାଧାରଣ ଆନ୍ଦୋଳନକୁ ଓହ୍ଲାଇବେ ବୋଲି ସ୍ଥାନୀୟ ଅଞ୍ଚଳବାସୀ ସତର୍କ କରାଇ ଦେଇଛନ୍ତି।
