ଲାଠୋର,୨୩ା୯(ଡି.ଏନ.ଏ.): ବଲାଙ୍ଗୀର ଜିଲା ଖପ୍ରାଖୋଲ ବ୍ଲକ ଅଧୀନ ଲାଠୋର,ମାଲପଡ଼ା ଏବଂ ବେନ୍ଦେର ଉଚ୍ଚ ବିଦ୍ୟାଳୟରେ ଚାଲିଥିବା ସ୍ମାର୍ଟ କ୍ଲାସ ରୁମରେ ସାଉଣ୍ଡ ସିଷ୍ଟମର ସୁବିଧା ଏଯାବତ୍ କରାଯାଇନାହିଁ। ଫଳରେ ଶିକ୍ଷା ଗ୍ରହଣ କଲା ବେଳେ ନା ନା ସମସ୍ୟାର ସମ୍ମୁଖୀନ ହେବାକୁ ପଡୁଥିବା ଛାତ୍ରୀଛାତ୍ରମାନେ ଅଭିଯୋଗ କରିଛନ୍ତି। ଲାଠୋର ଦୁର୍ଗେଶ୍ୱରୀ ସରକାରୀ ନୋଡ଼ାଲ ଉଚ୍ଚ ବିଦ୍ୟାଳୟରେ ନବମ ଶ୍ରେଣୀରେ ୧୨୫ ଏବଂ ଦଶମ ଶ୍ରେଣୀରେ ୧୨୪ ଜଣ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି। ସେହିପରି ମାଲପଡ଼ା ସରକାରୀ ଉଚ୍ଚ ମାଧ୍ୟମିକ ବିଦ୍ୟାଳୟରେ ନବମ ଶ୍ରେଣୀରେ ୧୨୬ ଏବଂ ଦଶମ ଶ୍ରେଣୀରେ ୧୪୭ ଜଣ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି। ବେନ୍ଦେର ସରକାରୀ ଉଚ୍ଚ ବିଦ୍ୟାଳୟରେ ନବମ ଶ୍ରେଣୀରେ ୩୯ ଏବଂ ଦଶମ ଶ୍ରେଣୀରେ ୨୬ ଜଣ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି। ଏହି ତିନି ଗୋଟି ବିଦ୍ୟାଳୟରେ ସର୍ବମୋଟ ୫୮୭ ଜଣ ଛାତ୍ରୀଛାତ୍ର ପାଠ ପଢୁଛନ୍ତି। ତିନୋଟି ବିଦ୍ୟାଳୟର ପ୍ରତି ଶ୍ରେଣୀରେ ପିଲା ସଂଖ୍ୟା ଅଧିକ ରହିଥିବା ବେଳେ ସେକସନର ବ୍ୟବସ୍ଥା ନ ଥିବା ହେତୁ ଗୋଟିଏ କୋଠରୀରେ ସଂଖ୍ୟାଧିକ ପିଲା ବସି ପାଠ ପଢୁଛନ୍ତି। ସଂପୃକ୍ତ ବିଦ୍ୟାଳୟ ଗୁଡ଼ିକ ସରକାରଙ୍କ ୫-ଟି ଯୋଜନାରେ ସାମିଲ ହୋଇଥିବା ଯୋଗୁ ପିଲା ମାନେ ଡ଼ିଜିଟାଲ ମାଧ୍ୟମରେ ଶିକ୍ଷା ଗ୍ରହଣ କରୁଛନ୍ତି। ହେଲେ ସାଉଣ୍ଡ ସିଷ୍ଟମ ସଂପୃକ୍ତ ବିଦ୍ୟାଳୟ ଗୁଡିକରେ ନ ଥିବା ଯୋଗୁ ଶିକ୍ଷକମାନେ ପାଠ ପଢାଇବା ସମୟରେ ଯାହା କହୁଛନ୍ତି ତାହା ପଛରେ ବସୁଥିବା ଛାତ୍ରୀଛାତ୍ର ଶୁଣି ପାରୁନାହାନ୍ତି। ୫-ଟି ଯୋଜନା ମାଧ୍ୟମରେ ସାଉଣ୍ଡ ସିଷ୍ଟମ ଉପଲବ୍ଧ କରିବାର ବ୍ୟବସ୍ଥା ରହିଥିଲେ ହେଁ ଅଦ୍ୟାବଧି ସାଉଣ୍ଡ ସିଷ୍ଟମ କରାଯାଇ ନ ଥିବା ବିଦ୍ୟାଳୟ କର୍ତ୍ତୃପକ୍ଷମାନେ ପ୍ରକାଶ କରିଛନ୍ତି। ଏନେଇ ଖପ୍ରାଖୋଲ ବିଡ଼ିଓ ରଶ୍ମିରଞ୍ଜନ ରାଉତଙ୍କୁ ପଚାରିବାରେ ଯେଉଁଠାରେ ଏପରି ସମସ୍ୟା ରହିଛି, ସେମାନେ ଆମକୁ ପ୍ରସ୍ତାବ ଦେଲେ ଆମେ ଉପରିସ୍ଥ ଅଧିକାରୀଙ୍କୁ ପଠାଇ ସମସ୍ୟାର ସମାଧାନ କରିବୁ ବୋଲି କହିଥିଲେ।
