ୱାଶିଂଟନ,୨୦ ।୧୨: ୱାଶିଂଟନରେ ଥିବା ଆମେରିକାର କ୍ୟାପିଟାଲ ବିଲଡିଂ(ଆମେରିକାର ସଂସଦ ଗୃହ) ପରିସର ବାହାରେ ୬ ଜାନୁୟାରୀ ୨୦୨୧ରେ ହୋଇଥିବା ଆକ୍ରମଣର ଅନୁସନ୍ଧାନ କରୁଥିବା ଏକ ସ୍ୱତନ୍ତ୍ର ଯାଞ୍ଚ ସମିତି ସୋମବାର ଏହାର ଚୁଡାନ୍ତ ଶୁଣାଣି କରିଛି । ଅନୁସନ୍ଧାନ କରୁଥିବା ପ୍ୟାନେଲର ଉପାଧ୍ୟକ୍ଷ ଲିଜ ଚେନି କହିଛନ୍ତି ଯେ ଏହି ପ୍ରମାଣ ପୂର୍ବତନ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ଫଙ୍କ ଘୋର ନୈତିକ ବିଫଳତାକୁ ଦର୍ଶାଉଛି । ସେ କହିଛନ୍ତି କ୍ୟାପିଟାଲ ହିଲ ଘଟଣା ପାଇଁ ଡୋନାଲ୍ଡ ଟ୍ରମ୍ପ ଦାୟୀ । ଯେତେବେଳେ ହିଂସା ହେଉଥିଲା ସେତେବେଳେ ସେ ଏଥିରେ ହସ୍ତକ୍ଷେପ କରି ନ ଥିଲେ । ଆମେରିକା ହାଉସ ଅଫ ରିପ୍ରେଞ୍ଜେଟେଟିଭର ପ୍ୟାନେଲ ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ କ୍ୟାପିଟଲ ଆକ୍ରମଣରେ ତାଙ୍କ ଭୂମିକା ପାଇଁ ଅବରୋଧ ଓ ଦେଶଦ୍ରୋହ ଅଭିଯୋଗ କରିବାକୁ ଫେଡେରାଲ ଓକିଲମାନଙ୍କୁ କହିଛନ୍ତି ।
ଜାନୁୟାରୀ ୬ରେ ହୋଇଥିବା ଦଙ୍ଗାର ଯାଞ୍ଚ କରୁଥିବା ହାଉସ କମିଟି ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ଫଙ୍କ ବିରୋଧରେ ଏକାଧିକ ଆପରାଧିକ ମାମଲା ଉପରେ ଅଧିକ କାର୍ଯ୍ୟାନୁଷ୍ଠାନ ପାଇଁ ଏକ ରେଫରାଲକୁ ଅନୁମୋଦନ କରିବାକୁ ଭୋଟ ଦେଇଛି ବୋଲି ସିଏନଏନ ତା’ର ଏକ ରିପୋର୍ଟରେ କହିଛି । ଟ୍ରମ୍ଫଙ୍କୁ ଦୋଷୀ ସାବ୍ୟସ୍ତ କରିବା ନ୍ୟାୟ ବିଭାଗ ଉପରେ ନିର୍ଭର କରୁଥିବା ବେଳେ ଆମେରିକା କଂଗ୍ରେସ ଏହାର ଚୁଡାନ୍ତ ରିପୋର୍ଟ ବୁଧବାର ପ୍ରକାଶ କରିବ, ଯାହା ପୂର୍ବତନ ରାଷ୍ଟପତିଙ୍କ ବିରୋଧରେ ମାମଲକୁ ବୁଝିବାରେ ସାହାଯ୍ୟ କରିବ ।
