ଧରାକୋଟ,୩ା୧୦: ଚଳିତ ଲଗାଣ ବର୍ଷାରେ ଗଞ୍ଜାମ ଜିଲା ଧରାକୋଟ ବ୍ଲକର ଜନଜୀବନ ବେଶ୍ ପ୍ରଭାବିତ ହୋଇଛି। ଗୁରୁବାର ରାତିରେ ଜାତୀୟ ରାଜପଥ ୫୯ର ଧରାକୋଟ ବ୍ଲକ ଅନ୍ତର୍ଗତ ଖାରିଗୁମା ନିକଟସ୍ଥ ହନୁମାନ ମନ୍ଦିର ନିକଟରେ ରାସ୍ତା ଉପରେ ବିରାଟ ଗଛ ପଡ଼ିଯିବାରୁ ରାସ୍ତା ଦୀର୍ଘ ସମୟ ଅବରୋଧ ହୋଇ ରହିଥିଲା। ଉଭୟ ସୋରଡ଼ା ଓ ଧରାକୋଟ ପଟୁ ଗାଡ଼ିମୋଟର ଲମ୍ବାଲାଇନ ଲାଗିରହିଥିଲା। ଘଟଣାସ୍ଥଳରେ ଧରାକୋଟ ତହସିଲଦାର ଲମ୍ବୋଦର ମାରାଣ୍ଡି ଓ ଭାରପ୍ରାପ୍ତ ବିଡିଓ ସୁଶୀଲ ପଟ୍ଟନାୟକ ପହଞ୍ଚି ଗଛ କାଟିବା ପରେ ଜାତୀୟ ରାଜପଥ ୫୯ରେ ଯାତାୟାତ ସ୍ବାଭାବିକ ହୋଇଥିଲା ।
ଠିକ୍ ସେହିପରି କୁସଗୁମା ବିଦ୍ୟାଳୟ ନିକଟରେ ରାସ୍ତା ଉପରେ ପଡ଼ିଥିବା ଗଛ କାଟିବାରୁ ଚଳାଚଳ ସ୍ବାଭାବିକ ହୋଇଥିଲା। ଅନ୍ୟପକ୍ଷରେ ସାବା ପଞ୍ଚାୟତ ଦେଇ ଯାଇଥିବା ପଟାଶାଳଠାରୁ ଟି.ଗୋବିନ୍ଦପୁର ଯାଇଥିବା ଗ୍ରାମ୍ୟ ଉନ୍ନୟନ ବିଭାଗ ୧୨ କିମି ରାସ୍ତାର ଘୋଡ଼ାଆମ୍ବ ନିକଟରେ ଲଗାଣ ବର୍ଷାରେ ବଡ଼ ବଡ଼ ପଥର ଖଣ୍ଡ ଖସି ରାସ୍ତା ଉପରେ ପଡ଼ିଥିବା ଦେଖାଯାଇଥିଲା। ସେହିପରି ଘୋଡ଼ାଆମ୍ବଠାରୁ ଟି. ଗୋବିନ୍ଦପୁର ରାସ୍ତାରେ ଦୁଇଟି ଗଛ ଉପୁଡ଼ି ପଡ଼ିଥିବାରୁ ଏହାକୁ କାଟିବା ପରେ ଯାତାୟାତ ସ୍ବାଭାବିକ ହୋଇଥିଲା।
