କୋରେଇ(ଚନ୍ଦ୍ରକାନ୍ତ ପତି), ୫ା୪:ଯାଜପୁର ଜିଲା କୋରେଇ ବିଧାନସଭା ନିର୍ବାଚନମଣ୍ଡଳୀରେ ଏକଦା ସୁକିନ୍ଦାର ପ୍ରଫୁଲ୍ଲ ଘଡ଼େଇଙ୍କ ପରିବାର ଓ ଯାଜପୁରର ଅଶୋକ ଦାସଙ୍କ ପରିବାର ମଧ୍ୟରେ ଶୀତଳ ଯୁଦ୍ଧ ଚାଲିଥିବା ନେଇ ଚର୍ଚ୍ଚା ହୋଇଥାଏ। ଆଗାମୀ ନିର୍ବାଚନକୁ ଦୃଷ୍ଟିରେ ରଖି ୨ ପରିବାରଙ୍କ ମଧ୍ୟରେ କୋରେଇ ବିଜେଡି ଟିକେଟକୁ ନେଇ ଟଣାଓଟରା ହେଉଥିବା ଦେଖିବାକୁ ମିଳିଛି। ପୂର୍ବତନ ବିଧାୟକ ଆକାଶ ଦାସ ନାୟକ ପୂର୍ବରୁ ଟିକେଟ ଆଶାୟୀଥିବା ବେଳେ ଏବେ ସେ ବିଜେଡିରୁ ଲମ୍ଫ ମାରି ଭାଜପା ଟିକେଟ ହାତେଇଛନ୍ତି। ବିଜେଡି ଏଯାବତ କୋରେଇ ବିଧାନସଭା ଆସନ ପାଇଁ ପ୍ରାର୍ଥୀ ଘୋଷଣା କରିନାହିଁ। କୁହାଯାଉଛି ସୁକିନ୍ଦା ବିଧାୟକ ପ୍ରୀତିରଞ୍ଜନ ଘଡ଼େଇ ଓ ଯାଜପୁର ବିଧାୟକ ପ୍ରଣବ ପ୍ରକାଶ ଦାସଙ୍କ ମଧ୍ୟରେ ଚାଲିଥିବା ଶୀତଳଯୁଦ୍ଧର ଏହା ପ୍ରତିଫଳନ।
ଆକାଶ ଭାଜପାରେ ଯୋଗଦେବା ପରେ ପ୍ରଣବ ପ୍ରକାଶ ଦାସଙ୍କ ଭାଇ ଭବପ୍ରସାଦ ଦାସ (ଲଲ) ବିଜେଡି ଟିକେଟ ପାଇପାରନ୍ତି ବୋଲି ଜୋରଦାର ଚର୍ଚ୍ଚା ହେଲା। ତାହାକୁ ନେଇ କୋରେଇରେ ସୁକିନ୍ଦା ବିଧାୟକ ପ୍ରୀତିରଞ୍ଜନ ଘଡ଼େଇଙ୍କ କିଛି ସମର୍ଥକ ଯାଜପୁର ରୋଡ୍ସ୍ଥିତ ବ୍ରାହ୍ମଣୀ ହୋଟେଲରେ ନିକଟରେ ଏକ ଖବରଦାତା ସମ୍ମିଳନୀ କରି ଦାସ ପରିବାରଙ୍କ ଉପରେ ଅସନ୍ତୋଷ ଝାଡ଼ିଥିଲେ। ଯଦି ଅଶୋକ ଦାସଙ୍କ ପରିବାରରୁ କାହାକୁ କୋରେଇରୁ ବିଜେଡି ପ୍ରାର୍ଥୀ କରାଯାଏ, ତେବେ ସୁକିନ୍ଦା ବିଧାୟକ ପ୍ରୀତିରଞ୍ଜନ ଘଡ଼େଇଙ୍କ ସ୍ତ୍ରୀ ଝିଲିକ ଭଟ୍ଟାଚାର୍ଯ୍ୟ ଘଡ଼େଇଙ୍କୁ ମଧ୍ୟ ବିଜେଡି ପ୍ରାର୍ଥୀ କରୁବୋଲି ସେମାନେ ଦାବି କରିଥିଲେ। ଯାହାକୁ ନେଇ କୋରେଇ ରାଜନୀତି ସରଗରମ ହୋଇଉଠିଥିଲା। ଗତ ମଙ୍ଗଳବାର ପ୍ରଣବ ପ୍ରକାଶଙ୍କ ସମର୍ଥକମାନେ ପାଣିକୋଇଲିସ୍ଥିତ କଲ୍ୟାଣମଣ୍ଡପରେ ଖବରଦାତା ସମ୍ମିଳନୀ କରି ପ୍ରୀତିରଞ୍ଜନଙ୍କ ସମର୍ଥକଙ୍କୁ ଅଣ ବିଜେଡି କର୍ମୀ ବୋଲି ଦର୍ଶାଇ ଅଶୋକ ଦାସଙ୍କ କୋରେଇ ପ୍ରତି ଅତୁଳନୀୟ ଅବଦାନ ରହିଥିବା ପ୍ରକାଶ କରିଥିଲେ। ଯଦି ଅଶୋକ ଦାସଙ୍କ ପରିବାରରୁ କେହି ପ୍ରାର୍ଥୀ ହୁଅନ୍ତି, ତେବେ କୋରେଇ ବିଜେଡି ତାଙ୍କୁ ସମର୍ଥନ ଦେବ ବୋଲି ଜଣାଇଥିଲେ।
ଗୁରୁବାର କୋରେଇ ଅଞ୍ଚଳର ଶତାଧିକ ବିଜେଡି କର୍ମୀ ଝିଲିକଙ୍କୁ ତାଙ୍କ ଯାଜପୁରରୋଡ୍ ଧବଳଗିରିସ୍ଥିତ ବାସଭବନରେ ଭେଟି ଅଭିନନ୍ଦନ ଜଣାଇବା ସହିତ କୋରେଇରୁ ବିଧାୟିକା ପ୍ରାର୍ଥୀ ହେବାକୁ ଦାବି କରିଛନ୍ତି। ଝିଲିକ ମଧ୍ୟ ଏହାକୁ ସ୍ବୀକାର କରି ମୁଖ୍ୟମନ୍ତ୍ରୀ ଚାହିଁଲେ ସେ କୋରେଇ ପାଇଁ ପ୍ରତିଦ୍ବନ୍ଦ୍ୱିତା କରିବେ ବୋଲି କହିଛନ୍ତି। ଫଳରେ ଯାଜପୁର ରାଜନୀତି ସରଗରମ ହୋଇଉଠିଛି। ଅନ୍ୟପକ୍ଷରେ ଏସବୁ ବିଧାୟକ ପ୍ରୀତିରଞ୍ଜନ ଘଡ଼େଇଙ୍କ ଇଙ୍ଗିତରେ ହେଉଥିବା ଆଲୋଚନା ହେଉଛି, ଯାହାକୁ ନେଇ ଘଡ଼େଇ ଓ ଦାସ ପରିବାର ମଧ୍ୟରେ କାଦୁଅଫିଙ୍ଗା ରାଜନୀତି ଚାଲିଛି ବୋଲି ରାଜନୈତିକ ସମୀକ୍ଷକମାନେ ମତପ୍ରକାଶ କରିଛନ୍ତି। ଆଗକୁ ଦେଖିବାକୁ ବାକି ରହିଲା ବିଜେଡି କାହାକୁ କୋରେଇରୁ ପ୍ରାର୍ଥୀ କରି ରାଜନୈତିକ ମଇଦାନରେ ଅବତୀର୍ଣ୍ଣ କରାଉଛି।
