ରାୟପୁର/ନୂଆଦିଲ୍ଲୀ,୧୯।୯ : କଂଗ୍ରେସ ଅଧ୍ୟକ୍ଷ ନିର୍ବାଚନ ଲାଗି ନାମାଙ୍କନପତ୍ର ଦାଖଲର ସପ୍ତାହେ ପୂର୍ବରୁ ରାହୁଲ ଗାନ୍ଧୀଙ୍କୁ ଦଳର ମୁଖ୍ୟ କରିବା ଲାଗି ଛତିଶଗଡ଼ କଂଗ୍ରେସରେ ରବିବାର ଏକ ପ୍ରସ୍ତାବ ଗୃହୀତ ହୋଇଛି। ଏଥିପାଇଁ ଅନୁଷ୍ଠିତ ଦଳୀୟ ବୈଠକରେ ପ୍ରଦେଶ କଂଗ୍ରେସ କମିଟିର ୩୧୦ ଜଣ ପ୍ରତିନିଧି ଯୋଗଦେଇଥିଲେ। ବୈଠକରେ ପ୍ରଦେଶ କଂଗ୍ରେସ ସଭାପତି ମୋହନ ମାର୍କାମ, ମୁଖ୍ୟମନ୍ତ୍ରୀ ଭୂପେଶ ବଘେଲ, ଏଆଇସିସି ସାଧାରଣ ସମ୍ପାଦକ ପି.ଏଲ୍. ପୁନିଆ ଏବଂ ବଘେଲ ସରକାରଙ୍କ ମନ୍ତ୍ରୀମାନେ ଉପସ୍ଥିତ ଥିଲେ। ରାହୁଲଙ୍କୁ କଂଗ୍ରେସ ଅଧ୍ୟକ୍ଷ ନିଯୁକ୍ତ କରିବା ଲାଗି ମୁଖ୍ୟମନ୍ତ୍ରୀ ବଘେଲ ପ୍ରସ୍ତାବ ଆଗତ କରିଥିବାବେଳେ ଏହାକୁ ସିପିସି ସଦସ୍ୟ ଓ ଅନ୍ୟମାନେ ସମର୍ଥନ ଜଣାଇଥିଲେ। ରାହୁଲଙ୍କୁ ଦଳର ମୁଖ୍ୟ ନିଯୁକ୍ତ କରିବା ଲାଗି ପୂର୍ବରୁ ରାଜସ୍ଥାନ କଂଗ୍ରେସରେ ମଧ୍ୟ ଅନୁରୂପ ପ୍ରସ୍ତାବ ଗୃହୀତ ହୋଇଥିଲା।
ଏଆଇସିସି ମୁଖ୍ୟ ନିର୍ବାଚନ ସହମତିରେ କରିବା ସପକ୍ଷରେ ବରିଷ୍ଠ କଂଗ୍ରେସ ନେତା ପି. ଚିଦାମ୍ବରମ୍ ମତ ଦେଇଛନ୍ତି। ରାହୁଲ ଅଧ୍ୟକ୍ଷ ହୁଅନ୍ତୁ ବା ନ ହୁଅନ୍ତୁ, ତାଙ୍କୁ ଦଳରେ ସବୁବେଳେ ସର୍ବୋଚ୍ଚ ସ୍ଥାନ ମିଳିବ କାରଣ ସେ ଦଳରେ ସମସ୍ତଙ୍କର ‘ସ୍ବୀକୃତ ନେତା’ ବୋଲି ଚିଦାମ୍ବରମ କହିଛନ୍ତି। ଯଦିଓ ରାହୁଲ ଏଆଇସିସି ଅଧ୍ୟକ୍ଷ ହେବା ଲାଗି ଅନାଗ୍ରହ ପ୍ରକାଶ କରିଆସିଛନ୍ତି, ତେବେ ସେ ମନ ପରିବର୍ତ୍ତନ କରିପାରନ୍ତି ବୋଲି ପୂର୍ବତନ କେନ୍ଦ୍ରମନ୍ତ୍ରୀ ତଥା କଂଗ୍ରେସ କାର୍ଯ୍ୟକାରୀ କମିଟି ସଦସ୍ୟ କହିଛନ୍ତି। ସାଂଗଠନିକ ନିର୍ବାଚନ ଲାଗି ଭୋଟର ତାଲିକା ପ୍ରକାଶ କରିବାକୁ ପୂର୍ବରୁ ଦଳର ବରିଷ୍ଠ ନେତା ଶଶୀ ଥରୁର, ମନୀଷ ତିଓ୍ବାରୀ, କାର୍ତ୍ତି ଚିଦାମ୍ବରମ୍, ପ୍ରଦ୍ୟୁତ୍ ବୋର୍ଦୋଲୋଇ, ଅବଦୁଲ ଖାଲେକ୍ ପ୍ରମୁଖ ଦାବି କରିଥିଲେ। ତେବେ ଦଳ ଅଧ୍ୟକ୍ଷ ନିର୍ବାଚନରେ ସ୍ବଚ୍ଛତାକୁ ନେଇ କୌଣସି ବିବାଦ ନ ଥିବା ଚିଦାମ୍ବରମ କହିଛନ୍ତି। ଇଲେକ୍ଟୋରାଲ କଲେଜର ଭୋଟର ତାଲିକା ପ୍ରକାଶ କରିବା ବ୍ୟବସ୍ଥା କୌଣସି ରାଜ୍ୟରେ ନାହିଁ। ତେବେ ପ୍ରଦେଶ କଂଗ୍ରେସ କମିଟି ସ୍ତରରେ ଇଲେକ୍ଟୋରାଲ ରୋଲ୍ ଏହାର ସଦସ୍ୟମାନଙ୍କ ନିମନ୍ତେ ଉପଲବ୍ଧ ହେବାକୁ ଥିବାବେଳେ ସର୍ବଭାରତୀୟ ସ୍ତରରେ ଏହି ତାଲିକା ଏଆଇସିସି କାର୍ଯ୍ୟାଳୟରେ ଦେଖିବାକୁ ମିଳିବ। ନିର୍ବାଚନରେ ଭାଗ ନେବାକୁ ଥିବା ପ୍ରତ୍ୟେକ ପ୍ରାର୍ଥୀଙ୍କୁ ତାଲିକାର କପି ପ୍ରଦାନ କରାଯିବ ବୋଲି କଂଗ୍ରେସ କେନ୍ଦ୍ରୀୟ ନିର୍ବାଚନ କର୍ତ୍ତୃପକ୍ଷର ଅଧ୍ୟକ୍ଷ ମଧୁସୂଦନ ମିସ୍ତ୍ରୀ ପୂର୍ବରୁ ସ୍ପଷ୍ଟ କରିଛନ୍ତି।
