ରସୁଲପୁର,୧୭ା୫(ଡି.ଏନ୍.ଏ.):ପ୍ରେମରେ ପ୍ରତାରଣା କରି ଜଣେ ପୋଲିସ ଅଧିକାରୀ ଅନ୍ୟଜଣେ ଯୁବତୀଙ୍କୁ ବିବାହ କଲେ। ଏହି ଖବର ପାଇ ନୂଆପଡ଼ା ଜିଲାରୁ ଯାଜପୁର ଜିଲାରେ ପହଞ୍ଚତ୍ ଯାଇଥିଲେ ପ୍ରେମିକା। ବୁଝାଶୁଝା କାମ ଦେଲାନି। ଫଳରେ ରାସ୍ତାରେ ପୋଲିସ ଅଧିକାରୀ ଓ ତାଙ୍କ ପ୍ରେମିକାଙ୍କ ମଧ୍ୟରେ ଟଣାଓଟରା ଦେଖିବାକୁ ମିଳିଛି। ଯାଜପୁର ଜିଲା ରସୁଲପୁର ବ୍ଲକର ବାରବାଟୀ ଦେଇ ଯାଇଥିବା ୧୬ନମ୍ବର ଜାତୀୟ ରାଜପଥର ଦୁର୍ଗାମନ୍ଦିର ନିକଟରେ ସୋମବାର ଅପରାହ୍ନ ସାଢ଼େ ୩ଟାରେ ଘଟିଛି ଏହି ହାଇଡ୍ରାମା।
ମିଳିଥିବା ସୂଚନା ଅନୁଯାୟୀ ସମ୍ପୃକ୍ତ ପୋଲିସ ଅଧିକାରୀଙ୍କ ଘର ଯାଜପୁର ସଦର ଥାନା ଅନ୍ତର୍ଗତ ଦେବିଲ ପଞ୍ଚାୟତରେ। ସେ ନୂଆପଡ଼ା ଜିଲାର ଏକ ଥାନାର ଆଇଆଇସି ଅଛନ୍ତି। ଭୁବନେଶ୍ୱରରେ ପାଠ ପଢ଼ୁଥିବା ନୂଆପଡ଼ା ଜିଲାର ଜଣେ ଯୁବତୀଙ୍କ ସହ ତାଙ୍କର ପ୍ରେମ ସମ୍ପର୍କ ଯୋଡ଼ି ହୋଇଯାଇଥିଲା। ହେଲେ ପ୍ରେମିକ ପୋଲିସ ଅଧିକାରୀ ଜଣକ ଇତିମଧ୍ୟରେ ପ୍ରେମିକାଙ୍କ ଅଜାଣତରେ ଅନ୍ୟତ୍ର ବିବାହ କରିନେଇଥିଲେ। ଏକଥା ଜାଣିବା ପରେ ପ୍ରେମିକା ସୋମବାର ମଧ୍ୟାହ୍ନରେ ପହଞ୍ଚତ୍ୟାଇଥିଲେ ପ୍ରତାରକ ପୋଲିସ ଅଧିକାରୀଙ୍କ ଗଁାରେ। ପୋଲିସ ଅଧିକାରୀ ଜଣକ ତାହା ଜାଣିପାରି କୌଶଳକ୍ରମେ ପ୍ରେମିକାଙ୍କୁ ବୁଝାଶୁଝା କରି ଘର ନିକଟରୁ ବାହାରକୁ ନେଇ ଆସିଥିଲେ। ତାଙ୍କୁ କାରରେ ଭୁବନେଶ୍ୱରରେ ଛାଡ଼ିବାକୁ ନେବା ବାଟରେ ଉଭୟଙ୍କ ମଧ୍ୟରେ ବଚସା ହୋଇଥିଲା। ତାଙ୍କୁ ବାହାହେବେ ଏବଂ ଭୁବନେଶ୍ୱରରେ ରଖିବେ ବୋଲି ପୋଲିସ ଅଧିକାରୀ ଜଣକ କହିଥିଲେ। କିନ୍ତୁ ବାହା ହୋଇ ପୋଲିସ ଅଧିକାରୀଙ୍କ ଘରେ ରହିବେ ବୋଲି ପ୍ରେମିକା ଜିଦ୍ ଧରିଥିଲେ। ଏପରି କି ସେ ଦୁର୍ଗାଦେବୀ ମନ୍ଦିର ସମ୍ମୁଖରେ କାର୍ରୁ ଓହ୍ଲାଇ ପଡ଼ିଥିଲେ। ସେଠି ଉଭୟଙ୍କ ମଧ୍ୟରେ ଟଣାଓଟରାକୁ ଦେଖି ସ୍ଥାନୀୟ ଲୋକେ ରୁଣ୍ଡ ହୋଇଯାଇଥିଲେ। ପୋଲିସ ଅଧିକାରୀ ଜଣକ ଉକ୍ତ ସ୍ଥାନରୁ ପଳାଇବାକୁ ଚେଷ୍ଟା କରିଥିଲେ। ମାତ୍ର ପ୍ରେମିକା ସେଠାରୁ ଯିବାକୁ ରାଜି ହୋଇ ନ ଥିଲେ। ଖବର ପାଇ ଧର୍ମଶାଳା ଥାନା ଅଧିକାରୀ ରାକେଶ ତ୍ରିପାଠୀ ଘଟଣାସ୍ଥଳରେ ପହଞ୍ଚତ୍ ଉଭୟଙ୍କୁ ଥାନାକୁ ନେଇଯାଇଥିଲେ। ଏ ନେଇ ଥାନା ଅଧିକାରୀ ତ୍ରିପାଠୀଙ୍କୁ ପଚାରିବାରୁ ସେ କହିଛନ୍ତି ଯେ, ଦୁର୍ଗାମନ୍ଦିର ନିକଟରୁ ନୂଆପଡ଼ା ଜିଲାର ଜଣେ ଯୁବତୀଙ୍କୁ ଆମେ ଉଦ୍ଧାର କରିଛୁ। ସେ ପ୍ରାପ୍ତବୟସ୍କା। ସେ ତାଙ୍କର ବ୍ୟକ୍ତିଗତ ଘଟଣା ସମ୍ପର୍କରେ ପୋଲିସ ସମ୍ମୁଖରେ କୌଣସି ସୂଚନା ଦେଉନାହାନ୍ତି। ଆମେ ତାଙ୍କ ପରିବାର ଲୋକଙ୍କୁ ଖବର ଦେଇଛୁ। ସେମାନେ ପହଞ୍ଚତ୍ଲେ ତାଙ୍କୁ ହସ୍ତାନ୍ତର କରିବୁ। ଘଟଣା ନୂଆପଡ଼ା ଜିଲା ଓ ଯାଜପୁର ସଦର ଥାନା ଅଞ୍ଚଳର, ଯାହାକିଛି ମାମଲା ହେବ ସେହି ଅଞ୍ଚଳରେ ହେବ। ଯୁବତୀଜଣକ ପୋଲିସ ସମ୍ମୁଖରେ କୌଣସି ବୟାନ ଦେଉ ନ ଥିବାରୁ ଧର୍ମଶାଳା ଥାନାରେ କୌଣସି ମାମଲା ହୋଇନାହିଁ ବୋଲି ତ୍ରିପାଠୀ କହିଛନ୍ତି।
