ମସ୍କୋ,୧୪।୩ : ମଙ୍ଗଳବାର ଦିନ କ୍ରେମଲିନ କହିଛି ଯେ ପରିସ୍ଥିତିର ନୂତନ ବାସ୍ତବତାକୁ ବିଚାର ନ କରି ୟୁକ୍ରେନରେ ଏକ ଶାନ୍ତିପୂର୍ଣ୍ଣ ସମାଧାନ ସମ୍ଭବ ନୁହେଁ। କ୍ରେମଲିନ ମୁଖପାତ୍ର ଦିମିତ୍ରୀ ପେସ୍କୋଭ କହିଛନ୍ତି ଯେ ଶତ୍ରୁତା ବନ୍ଦ କରିବା ଉପରେ ରୁଷିଆର ଆଭିମୁଖ୍ୟ ସ୍ପଷ୍ଟ ହୋଇଛି।
ରୁଷିଆ ବାରମ୍ବାର କହିଛି ଯେ ୟୁକ୍ରେନକୁ ଏହାର ଚାରିଟି ଅଞ୍ଚଳ ଉପରେ ରୁଷିଆର ଦାବିକୁ ଗ୍ରହଣ କରିବାକୁ ପଡିବ। ଯାହା ଏବେ ଆଂଶିକ ଦଖଲ କରାଯାଇଛି। ତେବେ ଏହି ଦାବିକୁ ୟୁକ୍ରେନ ଏବଂ ପାଶ୍ଚାତ୍ୟ ଦେଶଗୁଡିକ ବେଆଇନ ବୋଲି କହି ଖଣ୍ଡନ କରିଛନ୍ତି।
ରୁଷିଆର ପ୍ରତିରକ୍ଷା ମନ୍ତ୍ରଣାଳୟ କହିଛି ଯେ ୟୁକ୍ରେନର ପୂର୍ବ ଡୋନେଟସ୍କ ଅଞ୍ଚଳରେ ଏହି ଆକ୍ରମଣ କାର୍ଯ୍ୟ ଜାରି ରହିବ। ମନ୍ତ୍ରଣାଳୟ ମଧ୍ୟ ୨୪ଘଣ୍ଟା ମଧ୍ୟରେ ୨୨୦ ୟୁକ୍ରେନ ସୈନିକଙ୍କୁ ହତ୍ୟା କରିଥିବା ଦାବି କରିଛି। ଏଥି ସହିତ, ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କି ଦାବି କରିଛନ୍ତି ଯେ ପୂର୍ବ ବାଖମୁଟ ନିକଟରେ ଲଢ଼େଇରେ ଏକ ସପ୍ତାହ ତଳେ ୧୧୦୦ରୁ ଅଧିକ ରୁଷିଆ ସୈନିକ ନିହତ ହୋଇଛନ୍ତି।
ଗୋଟିଏ ଦିନ ପୂର୍ବରୁ, ୟୁକ୍ରେନ ଦାବି କରିଥିଲା ଯେ ୨୪ଘଣ୍ଟା ମଧ୍ୟରେ ୫୦୦ରୁ ଅଧିକ ରୁଷିଆ ସୈନିକ ନିହତ ହୋଇଥିଲେ କିମ୍ବା ଆହତ ହୋଇଥିଲେ।
ସେପ୍ଟେମ୍ବରରେ ଭାରତରେ ହେବାକୁ ଥିବା ଜି -୨୦ ଶିଖର ସମ୍ମିଳନୀରେ ରୁଷିଆର ରାଷ୍ଟ୍ରପତି ଭ୍ଲାଦିମିର ପୁଟିନ ଅଂଶଗ୍ରହଣ କରିପାରନ୍ତି। କିନ୍ତୁ ଏ ବାବଦରେ ଏପର୍ଯ୍ୟନ୍ତ କୌଣସି ଚୂଡ଼ାନ୍ତ ନିଷ୍ପତ୍ତି ନିଆଯାଇ ନାହିଁ। ପୁଟିନଙ୍କ ମୁଖପାତ୍ର ଦିମିତ୍ରୀ ପେସ୍କୋଭ ଏହି ସୂଚନା ଦେଇଛନ୍ତି।
ପୁଟିନ ଭାରତରେ ହେବାକୁ ଥିବା ଏହି ଶିଖର ସମ୍ମିଳନୀରେ ଯୋଗ ଦେଇ ପାରିବେ କି ବୋଲି ପଚରାଯାଇଥିବା ବେଳେ ପେସ୍କୋଭ କହିଛନ୍ତି ଯେ ଏହାକୁ ଏଡ଼ାଇ ଦିଆଯାଇପାରିବ ନାହିଁ। ରୁଷିଆର ଅଫିସିଆଲ ନ୍ୟୁଜ ଏଜେନ୍ସି କହିଛି ି ଯେ ଏପର୍ଯ୍ୟନ୍ତ ଏ ସମ୍ପର୍କରେ କୌଣସି ନିଷ୍ପତ୍ତି ନିଆଯାଇ ନାହିଁ।
ପେସ୍କୋଭ କହିଛନ୍ତି ଯେ ଜି-୨୦ ଫର୍ମାଟରେ ରୁଷିଆ ସମ୍ପୂର୍ଣ୍ଣ ଅଂଶଗ୍ରହଣ ଜାରି ରଖିଛି। ଆମେ ଏହାକୁ ବଜାୟ ରଖିବାକୁ ଚାହୁଁଛୁ। ଇଣ୍ଡୋନେସିଆର ବାଲିରେ ଗତ ବର୍ଷର ଜି -୨୦ ନେତାଙ୍କ ଫୋରମରେ ବୈଦେଶିକ ମନ୍ତ୍ରୀ ସର୍ଗେଇ ଲାଭରୋଭଙ୍କ ନେତୃତ୍ୱରେ ରୁଷିଆର ପ୍ରତିନିଧୀ ଦଳ ଯୋଗ ଦେଇଥିଲେ। ଭାରତରେ ସେପ୍ଟେମ୍ବର ୯ ଏବଂ ୧୦ ରେ ନୂଆଦିଲ୍ଲୀରେ ଜି -୨୦ ସଦସ୍ୟ ଦେଶର ନେତାଙ୍କ ଶିଖର ସମ୍ମିଳନୀ ଅନୁଷ୍ଠିତ ହେବ।
