ବେଙ୍ଗାଲୁରୁ, ୧୦।୨ : ହିଜାବ୍ ବିବାଦ ନେଇ ଦେଶର ରାଜନୈତିକ ସ୍ଥିତି ସରଗରମ ହେବାରେ ଲାଗିଛି। ଏପରିସ୍ଥଳେ ଅଲ୍ଲା-ହୁ-ଆକବର କହିଥିବା ମୁସକାନ୍ଙ୍କୁ ରାଷ୍ଟ୍ରୀୟ ସ୍ବୟଂସେବକ ସଂଘ (ଆର୍ଏସ୍ଏସ୍)ର ମୁସଲିମ୍ ଶାଖା ଏମ୍ଆର୍ଏମ୍ ପକ୍ଷରୁ ସମର୍ଥନ କରାଯାଇଛି।
ଫଳରେ ହିଜାବ ପ୍ରସଙ୍ଗରେ ଏକ ନୂଆ ମୋଡ଼ ଆସିଛି। ସଂଘ କହିଛନ୍ତି ଯେ ହିଜାବ ବା ଆବରଣ ଭାରତୀୟ ସଂସ୍କୃତିର ଏକ ଅଂଶ। ଆରଏସ୍ଏସ୍ର ମୁସଲିମ ଶାଖା, ମୁସଲିମ ରାଷ୍ଟ୍ରୀୟ ମଞ୍ଚ, ବିବି ମୁସକାନ୍ଙ୍କ ହିଜାବ ପିନ୍ଧିବା ଆବେଦନକୁ ସମର୍ଥନ କରିଛନ୍ତିି। ଗଣମାଧ୍ୟମ ପ୍ରତିନିଧିଙ୍କ ସହ କଥାବାର୍ତ୍ତା କରି ମୁସଲିମ ରାଷ୍ଟ୍ରିୟ ମଞ୍ଚର ଅୱଧ ପ୍ରାନ୍ତର ସଞ୍ଚାଳକ ଅନୀଲ ସିଂ କହିଛନ୍ତି ଯେ ସେ ଆମର ଝିଅ ଏବଂ ଭଉଣୀ। ତାଙ୍କ ସଙ୍କଟ ସମୟରେ ଆମେ ତାଙ୍କ ସହିତ ଛିଡା ହୋଇଛୁ।
ମୁସଲିମ ରାଷ୍ଟ୍ରୀୟ ମଞ୍ଚ ନିଜ ବିବୃତ୍ତିରେ କହିଛି ଯେ ହିନ୍ଦୁ ସଂସ୍କୃତି ମହିଳାମାନଙ୍କୁ ସମ୍ମାନ ଦେବା ଶିଖାଏ ଏବଂ ଯେଉଁମାନେ ଜୟ ଶ୍ରୀରାମ ସ୍ଳୋଗାନ୍ ଦେଇଥିଲେ ଏବଂ ଝିଅଙ୍କୁ ଆତଙ୍କିତ କରିବାକୁ ଚେଷ୍ଟା କରିଥିଲେ ସେମାନେ ଭୁଲ ଥିଲେ।
ବିବୃତ୍ତିରେ କୁହାଯାଇଛି ଯେ ହିଜାବ ପିନ୍ଧିବା ପାଇଁ ଝିଅମାନଙ୍କର ସାମ୍ବିଧାନିକ ଅଧିକାର ରହିଛି। ଯଦି ସେ କ୍ୟାମ୍ପସ ଡ୍ରେସ କୋଡର ଉଲ୍ଲଂଘନ କରିଥାନ୍ତେ, ତା’ହେଲେ ଶିକ୍ଷାନୁଷ୍ଠାନ ପକ୍ଷରୁ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାର ଅଧିକାର ଅଛି। ଆରଏସ୍ଏସ୍ ନେତା କହିଛନ୍ତି ଯେ ଗୈରିକ ପଗଡ଼ି ପିନ୍ଧି ପୁଅମାନଙ୍କର ଜୟ ଶ୍ରୀ ରାମ ସ୍ଳୋଗାନ୍ କରିବା ଆଚରଣ ଗ୍ରହଣୀୟ ନୁହେଁ। ସେମାନେ ହିନ୍ଦୁ ସଂସ୍କୃତିକୁ ବଦନାମ କରିଛନ୍ତି।
ଅନୀଲ କହିଛନ୍ତି ଯେ ହିଜାବ କିମ୍ବା ଆବରଣ ମଧ୍ୟ ଭାରତୀୟ ସଂସ୍କୃତିର ଏକ ଅଂଶ ଏବଂ ହିନ୍ଦୁ ମହିଳାମାନେ ନିଜ ପସନ୍ଦ ଅନୁଯାୟୀ ଓଢ଼ଣା ପିନ୍ଧନ୍ତି ଏବଂ ବିବି ମୁସକାନ୍ଙ୍କ ପାଇଁ ମଧ୍ୟ ସମାନ ବ୍ୟବସ୍ଥା ପ୍ରଯୁଜ୍ୟ। ଅନୀଲ କହିଛନ୍ତି ଆମର ସରସଙ୍ଗ ଚାଳକ କହିଛନ୍ତି, ମୁସଲମାନମାନେ ଆମର ଭାଇ ଏବଂ ଉଭୟ ସମ୍ପ୍ରଦାୟର ଡିଏନ୍ଏ ସମାନ। ମୁସଲମାନମାନଙ୍କୁ ସେମାନଙ୍କର ଭାଇ ଭାବରେ ଗ୍ରହଣ କରିବାକୁ ମୁଁ ହିନ୍ଦୁ ସମ୍ପ୍ରଦାୟର ସଦସ୍ୟମାନଙ୍କୁ ନିବେଦନ କରୁଛି।
