ଜଗତ୍ସିଂହପୁର ଅଫିସ, ୪ା୭: ସ୍ତ୍ରୀ ଓ ଝିଅଙ୍କୁ ଶୁକ୍ରବାର ରାତିରେ ଶାବଳରେ ପିଟି ହତ୍ୟା କରିବା ପରେ ଜଣେ ବ୍ୟକ୍ତି ଆତ୍ମହତ୍ୟା କରିଛନ୍ତି। ଏଭଳି ଘଟଣା ଘଟିଛି ଜଗତ୍ସିଂହପୁର ଥାନା ଅନ୍ତର୍ଗତ ଜୋତଚଣ୍ଡପାଟଣାରେ। ମୃତକମାନେ ହେଲେ ଲୋକନାଥ ପାଳ(୫୪), ସ୍ତ୍ରୀ କଳ୍ପନା(୪୫) ଓ ଝିଅ ମଧୁସ୍ମିତା ଓରଫ ନକି(୨୧)। ଏକମାତ୍ର ପୁଅ ପ୍ରେମ ବିବାହ କରି ଚାଲିଯିବା ପରେ ମାନସିକ ଭାରସାମ୍ୟ ହରାଇ ଲୋକନାଥ ଏଭଳି କାଣ୍ଡ କରିଥିବା କୁହାଯାଉଛି। ଲୋକନାଥଙ୍କ ଭାଇ ଶଙ୍କର ପାଳଙ୍କ ଅଭିଯୋଗ କ୍ରମେ ପୋଲିସ ମାମଲା(ନଂ.୩୨୬/୨୧) ରୁଜୁ କରିବା ସହ ହତ୍ୟାରେ ବ୍ୟବହୃତ ଶାବଳ ଜବତ କରିଛି।
ପୋଲିସ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଲୋକନାଥ ରାଜମିସ୍ତ୍ରି ଭାବେ କାମ କରନ୍ତି। ତାଙ୍କର ୩ ଭାଇ ଥିଲେ ସୁଦ୍ଧା ସମସ୍ତେ ଅଲଗା ହୋଇ କିଛି ଦୂରରେ ରୁହନ୍ତି। ଲୋକନାଥଙ୍କ ପରିବାର କହିଲେ ସ୍ତ୍ରୀ, ଗୋଟିଏ ପୁଅ ଓ ଝିଅ। ସ୍ତ୍ରୀ ରୋଗାଗ୍ରସ୍ତ। ଝିଅ ନକି ଯୁକ୍ତ ୩ରେ ପଢ଼ୁଥିଲେ। ପୁଅ ପଙ୍କଜ ସ୍ନାତକ ପରେ ଜଣେ ଅନ୍ୟ ଜାତିର ଝିଅକୁ ପ୍ରେମ ବିବାହ କରି ଭୁବନେଶ୍ୱରରେ ରହୁଛନ୍ତି। ବିବାହ ପରଠୁ ସେ ଘରକୁ ଫେରିନାହାନ୍ତି। ଲୋକନାଥଙ୍କ ପରିବାରର ଆର୍ଥିକ ସ୍ଥିତି ଭଲ ନାହିଁ। ଗୋଟିଏ ବଖରା ଛାତ ଓ କିଛି ଦୂରରେ ୨ ବଖରା ଚାଳ (୧ ରୋଷଶାଳା ଓ ଅନ୍ୟଟିରେ ଜିନିଷ ଗଚ୍ଛିତ) ଘରେ ପୂରା ପରିବାର ରୁହନ୍ତି। ପଙ୍କଜ ଘରକୁ ନ ଆସିବା ନେଇ ପରିବାରରେ ଅଧିକାଂଶ ସମୟ ଅଶାନ୍ତି ହେଉଥିଲା। ମାନସିକ ଅବସାଦ କାରଣରୁ ପ୍ରାୟ ୩ ମାସ ହେବ ଲୋକନାଥ କାମଧନ୍ଦା କରିବାକୁ ଯାଉ ନ ଥିଲେ। ଶୁକ୍ରବାର ସକାଳେ କଳ୍ପନା ଓ ଲୋକନାଥଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା। କିନ୍ତୁ ରାତିରେ କ’ଣ ଘଟିଲା କେହି ଜାଣନ୍ତି ନାହିଁ ବୋଲି ଗ୍ରାମବାସୀ ପୋଲିସକୁ କହିଛନ୍ତି। ସବୁଦିନ ପରି ଜଣେ ବ୍ୟକ୍ତି ଲୋକନାଥଙ୍କ ଅଗଣାରୁ ଶନିବାର ସକାଳେ ଫୁଲ ତୋଳିବାକୁ ଯାଇଥିଲେ। ସେତେବେଳେ ଝରକା ଖୋଲା ଥିଲା। ସମ୍ପୃକ୍ତ ବ୍ୟକ୍ତି ଝରକା ପଟେ ଲୋକନାଥଙ୍କୁ ଫ୍ୟାନରେ ଲାଗିଥିବା ରଶିରେ ଝୁଲୁଥିବା ଦେଖିଥିଲେ। ଏଥିସହ ଘର ଭିତରୁ କିଛି ଶବ୍ଦ ଶୁଣିଥିଲେ। ଏନେଇ ସମ୍ପୃକ୍ତ ବ୍ୟକ୍ତି ଲୋକନାଥଙ୍କ ଭାଇମାନଙ୍କୁ ଜଣାଇଥିଲେ। ସେମାନେ ଘରେ ପହଞ୍ଚତ୍ କବାଟ ଖୋଲିବା ପରେ କଳ୍ପନା ଓ ନକିଙ୍କୁ ଯନ୍ତ୍ରଣାରେ ଛଟଛଟ ହେଉଥିବା ଦେଖିଥିଲେ। ସଙ୍ଗେ ସଙ୍ଗେ ଉଭୟଙ୍କୁ ୧୦୮ ଆମ୍ବୁଲାନ୍ସ ଯୋଗେ ଜିଲା ମୁଖ୍ୟ ଚିକିତ୍ସାଳୟକୁ ନିଆଯାଇଥିଲା। ସେଠାରେ ନକିଙ୍କୁ ଡାକ୍ତର ମୃତ ଘୋଷଣା କରିଥିଲେ। କଳ୍ପନାଙ୍କୁ କଟକ ବଡ଼ ଡାକ୍ତରଖାନା ସ୍ଥାନାନ୍ତର କରାଯାଇଥିଲା। ମାତ୍ର ବାଟରେ ତାଙ୍କା ମୃତ୍ୟୁ ଘଟିଥିଲା।
ଖବରପାଇ ପୋଲିସ ଓ ସାଇଣ୍ଟିଫିକ୍ ଟିମ୍ ପହଞ୍ଚତ୍ ତଦନ୍ତ କରିଛି। ଲୋକନାଥ ଓ ନକିଙ୍କ ମୃତଦେହ ପଞ୍ଚନାମା ପରେ ବ୍ୟବଚ୍ଛେଦ କରାଯାଇଛି। କଟକ ବଡ଼ ଡାକ୍ତରଖାନାରେ କଳ୍ପନାଙ୍କ ମୃତଦେହ ବ୍ୟବଚ୍ଛେଦ ହୋଇଛି। ଖବରପାଇ ପୁଅ ଜିଲା ମୁଖ୍ୟ ଚିକିତ୍ସାଳୟରେ ପହଞ୍ଚତ୍ ଏକପ୍ରକାର ମୂକ ପାଲଟି ଯାଇଛନ୍ତି। ଏ ସମ୍ପର୍କରେ ଆଇଆଇସି ପ୍ରଭାସ ଚନ୍ଦ୍ର ସାହୁ କହିଛନ୍ତି, ଆର୍ଥିକ ଅନଟନ ଓ ପୁଅର ଅନୁପସ୍ଥିତି କାରଣରୁ ଏଭଳି ଘଟଣା ଘଟିଥିବା ପ୍ରାଥମିକ ତଦନ୍ତରୁ ଜଣାପଡ଼ିଛି।
