ପୁରୁଷୋତ୍ତମପୁର,୨୫ା୭(ଡି.ଏନ୍.ଏ.): ଗଞ୍ଜାମ ଜିଲା ପୁରୁଷୋତ୍ତମପୁର ଏନ୍ଏସିରେ ଶନିବାର ଗୋଟିଏ ଦିନରେ ୧୩ ପଜିଟିଭ୍ ଚିହ୍ନଟ ହୋଇଛନ୍ତି। ଯାହାକି ଚାଙ୍ଗୁଡ଼ିଆପଦର ସାହିରୁ ସର୍ବାଧିକ ୭ ଜଣ ଚିହ୍ନଟ ହୋଇଥିବା ବେଳେ କନକା ସାହିରୁ ୪ ଜଣ, ନନ୍ଦିକ ସାହି ଓ କାଳୀମନ୍ଦିର ଛକରୁ ଜଣେ ଲେଖାଏ ଚିହ୍ନଟ ହୋଇଛନ୍ତି। ଫଳରେ ସମୁଦାୟ ଆକ୍ରାନ୍ତଙ୍କ ସଂଖ୍ୟା ୫୦ରେ ପହଞ୍ଚିଛି। ଏଥି ମଧ୍ୟରେ ଜଣେ ପ୍ରଧାନଶିକ୍ଷକଙ୍କ ସମେତ ତାଙ୍କ ସ୍ତ୍ରୀ, ଝିଅ ଆକ୍ରାନ୍ତ ହୋଇଥିବା ବେଳେ ଜଣେ ଓକିଲ ମଧ୍ୟ ଆକ୍ରାନ୍ତ ହୋଇଛନ୍ତି। ପ୍ରଧାନଶିକ୍ଷକ ଜଣକ ପ୍ରବାସୀମାନେ ରହିଥିବା କ୍ବାରାଣ୍ଟାଇନ୍ ସେଣ୍ଟରରେ ଦାୟିତ୍ୱରେ ରହି କାର୍ଯ୍ୟ କରିଥିଲେ। ଏଭଳି ଏଠାରେ ପଜିଟିଭ୍ ସଂଖ୍ୟା ଦିନକୁ ଦିନ ବଢ଼ିବାରେ ଲାଗିଥିବା ନେଇ ଏନ୍ଏସି ପ୍ରଶାସନର ଚିନ୍ତା ବଢ଼ିଯାଇଛି। ନିର୍ବାହୀ ଅଧିକାରୀ ଶୌଯ୍ୟରଞ୍ଜନ ମିଶ୍ରଙ୍କ ତତ୍ତ୍ୱାବଧାନରେ ଡାକ୍ତର ରବିନ୍ଦ୍ର ନାଥ ଗନ୍ତାୟତଙ୍କ ସହ ସ୍ବାସ୍ଥ୍ୟ ଟିମ୍, ଅଙ୍ଗନବାଡ଼ି କର୍ମୀ, ସ୍ବଚ୍ଛସାଥୀ, କୋଭିଡ୍ ମନିଟରମାନେ ଘରକୁ ଘର ଯାଇ ଲୋକଙ୍କ ଥର୍ମାଲ ସ୍କ୍ରିନିଂ କରିବା ସହ ସ୍ବାସ୍ଥ୍ୟ ସମସ୍ୟା ବୁଝିବାରେ ଲାଗିଛନ୍ତି।
