ପୋଟେରୁ,୨୬।୪ (ଡି.ଏନ୍.ଏ.) ଅବ୍ୟବସ୍ଥାରେ ଚାଲିଛି ଏମ୍ଭି-୫୫ସ୍ଥିତ ସ୍ବାସ୍ଥ୍ୟକେନ୍ଦ୍ର। ପୋଟେରୁ ଆଖପାଖର ୪ଟି ପଞ୍ଚାୟତର ୨୦ହଜାରରୁ ଊର୍ଦ୍ଧ୍ୱ ଲୋକ ଏହି ସ୍ବାସ୍ଥ୍ୟକେନ୍ଦ୍ର ଉପରେ ନିର୍ଭରକରନ୍ତି। ଏତେ ସଂଖ୍ୟକ ଲୋକଙ୍କ ପାଇଁ ଏଠାରେ ରହିଛନ୍ତି ଜଣେ ମାତ୍ର ଡାକ୍ତର। ଏଠାରେ ଆମ୍ବୁଲାନ୍ସ ନାହିଁ କି ନାହାନ୍ତି ଆବଶ୍ୟକ ସଂଖ୍ୟକ କର୍ମଚାରୀ। କାଲିମେଳା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧୀନରେ ଏହି ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ଉପରେ ଚିତ୍ରାଙ୍ଗପଲ୍ଲି, ବଦିଲି, ଗୁମୁକା ଓ ଉଣ୍ଡୁରୁକୋଣ୍ଡା ପଞ୍ଚାୟତର ଲୋକେ ନିର୍ଭର କରନ୍ତି। ବିଭିନ୍ନ ସମୟରେ ଆହତ ରୋଗୀ ଆସିଲେ ତାଙ୍କ ପଟି ବାନ୍ଧିବା କାମ ମଧ୍ୟ ଡାକ୍ତର ଜଣକ କରୁଥିବା ଦେଖିବାକୁ ମଳେ। ଆମ୍ବୁଲାନ୍ସ ନ ଥିବାରୁ ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଗତ ମାସରେ କାଳିପୂଜା ଭସାଣି ବେଳେ ନିଆଁ ଲାଗି ୮ ଜଣ ଗୁରୁତର ହୋଇପଡ଼ିଥିବା ବେଳେ ସେମାନଙ୍କୁ ଜିଲା ମୁଖ୍ୟ ଚିକିତ୍ସାଳୟକୁ ବିପଦପୂର୍ଣ୍ଣ ଅବସ୍ଥାରେ ସ୍ଥାନାନ୍ତର କରିବାକୁ ପଡ଼ିଥିଲା। ପ୍ରତି ମାସରେ ୧୫ରୁ ଊଦ୍ଧର୍ବ ଗର୍ଭବତୀ ଓ ପ୍ରସୂତି ମା’ ଏହି ସ୍ବାସ୍ଥ୍ୟକେନ୍ଦ୍ରରୁ ସେବା ପାଉଥିବା ବେଳେ ଗର୍ଭବତୀଙ୍କୁ ଅନ୍ୟତ୍ର ସ୍ଥାନାନ୍ତର ପାଇଁ କୌଣସି ସୁବିଧା ନାହିଁ। ମା’ଗୃହର ମଧ୍ୟ ବ୍ୟବସ୍ଥା ନାହିଁ ବୋଲି ଗ୍ରାମବାସୀ କହିଛନ୍ତି । ଏ ନେଇ ଗ୍ରାମବାସୀ ବିଭିନ୍ନ ସରକାରୀ ଅଧିକାରୀଙ୍କୁ ଜଣାଉଥିଲେ ମଧ୍ୟ କେହି ଦୃଷ୍ଟି ଦେଉନାହାନ୍ତି। ଏ ନେଇ କାଲିମେଳା ଗୋଷ୍ଠୀ ସ୍ବାସ୍ଥ୍ୟ ଅଧିକାରୀ ଡ. ଆବିଦ ହୁସେନଙ୍କୁ ପଚାରିବାରୁ ସେ କହିଲେ, ଏହି ସ୍ବାସ୍ଥ୍ୟକେନ୍ଦ୍ରକୁ ଆବଶ୍ୟକ ମୁତାବକ କର୍ମଚାରୀ ଓ ଆମ୍ବୁଲାନ୍ସ ଯୋଗାଇଦେବାକୁ ସେ ଜିଲାସ୍ତରୀୟ ଅଧିକାରୀଙ୍କ ଦୃଷ୍ଟି ଆକର୍ଷଣ କରିଛନ୍ତି। ତୁରନ୍ତ ଏହି ସ୍ବାସ୍ଥ୍ୟକେନ୍ଦ୍ରକୁ ଆବଶ୍ୟକ ସଂଖ୍ୟକ କର୍ମଚାରୀ, ଆମ୍ବୁଲାନ୍ସ ଓ ମା’ ଗୃହର ବ୍ୟବସ୍ଥା କରିବାକୁ ଗ୍ରାମର ରଞ୍ଜନ ମଣ୍ଡଳ, ରତନ ମଜୁମଦାର, ଦେବାଶିଷ ବଛାଡ, ପଙ୍କଜ ବୈରାଗୀ, ରଞ୍ଜିତ ମଣ୍ଡଳଙ୍କ ସହ ଗ୍ରାମବାସୀ ଦାବି କରିଛନ୍ତି।
