ବିଜୟଓ୍ବାଡ଼ା, ୫।୯: ଆନ୍ଧ୍ରପ୍ରଦେଶ ଚିତ୍ତୋର ଜିଲାରେ ଜଣେ ୮ ବର୍ଷର ବାଳକ ରାଜଗୋପାଳ ରେଡ୍ଡୀ ନିଜ କଅଁଳ କାନ୍ଧରେ ପରିବାରର ବୋଝ ଉଠାଉଛନ୍ତି। ସେ ଏକ ବିଦ୍ୟୁତ୍ଚାଳିତ ଅଟୋ ଚଳାଇ ତାଙ୍କ ଅନ୍ଧ ମାତାପିତା ଓ ଦୁଇ ଭାଇଙ୍କୁ ଖାଦ୍ୟ ଯୋଗାଉଛନ୍ତି। ଏଥିସହିତ ସେ ଚାଉଳ ଡାଲି ବିକ୍ରି କରୁଛନ୍ତି। ଚିତ୍ତୋର ଜିଲା ଚନ୍ଦ୍ରଗିରି ମଣ୍ଡଳ ଅନ୍ତର୍ଗତ ଗଙ୍ଗୁଡୁପାଲେ ଗ୍ରାମର ରାଜଗୋପାଳ ଅଟୋ ଚଳାଉଥିବାର ଭିଡିଓ ଭାଇରାଲ ହେବା ପରେ ଏହି ଖବର ଲୋକଲୋଚନକୁ ଆସିଛି। ତାଙ୍କ ଉପରେ ପୂରା ପରିବାରର ଦାୟିତ୍ୱ ଥିବା ସମ୍ପର୍କରେ ସେ କହୁଥିବା ଭିଡିଓରେ ଦେଖିବାକୁ ମିଳିଛି। ସେ ବିଦ୍ୟୁତ ଚାଳିତ ଅଟୋରେ ଚାଉଳ, ଡାଲି ବଜାରକୁ ନେଇଥାନ୍ତି। ମାଆବାପା ଅନ୍ଧ ହୋଇଥିବାରୁ ସେ ଅଟୋ ଚଳାଉଥିବା କହିଛନ୍ତି। ଏତେ ଛୋଟ ପିଲା ଗାଡ଼ି ଚଳାଇବା ମୋଟରଯାନ ଆଇନର ଉଲ୍ଲଂଘନ ହୋଇଥିବାବେଳେ, ଅଟୋ କାହାକୁ ଧକ୍କା ଦେଲେ କିଏ ଦାୟୀ ରହିବ ବୋଲି ପ୍ରଶ୍ନ ଉଠିଛି।
