ଭୁବନେଶ୍ୱର,୨୯ା୮(ବ୍ୟୁରୋ): ଲଗାଣ ବର୍ଷା ଫଳରେ ରାଜ୍ୟରେ ଯେଉଁ ବନ୍ୟା ପରିସ୍ଥିତି ସୃଷ୍ଟି ହୋଇଥିଲା ସେଥିରେ ସୁଧାର ଆସିବାରେ ଲାଗିଛି। ସୁବର୍ଣ୍ଣରେଖା ନଦୀରେ ରାଜଘାଟଠାରେ ବିପଦ ସଙ୍କେତ ୧୦.୩୫ମିଟର ଥିବାବେଳେ ଶୁକ୍ରବାର ଜଳସ୍ତର ୧୦.୯୫ ମିଟରକୁ ଉଠିଥିଲା। ଦ୍ୱିପ୍ରହର ୨ଟା ସୁଦ୍ଧା ଏହା କମି ୧୦.୮୮ ମିଟରରେ ପ୍ରବାହିତ ହେଉଛି। ଗାଲୁଡିହି ବ୍ୟାରେଜରୁ ଗୁରୁବାର ୭୫୦୦ କ୍ୟୁସେକ୍ ଜଳ ନିଷ୍କାସିତ ହୋଇଥିବା ବେଳେ ବର୍ତ୍ତମାନ ଏହା ୫୭୫୭ କ୍ୟୁସେକକୁ ହ୍ରାସ ପାଇଛି। ଆଉ ବର୍ଷା ହେଉ ନ ଥିବାରୁ ଜଳସ୍ତର ଆହୁରି କମିବା ସହିତ ବନ୍ୟା ସ୍ଥିତିରେ ଅନେକ ସୁଧାର ଆସିବ ବୋଲି ଆଶା କରାଯାଇଛି। ମୁଖ୍ୟ ଶାସନ ସଚିବ ଅସିତ କୁମାର ତ୍ରିପାଠୀ ଶୁକ୍ରବାର ଡିଜିଟାଲ ବ୍ୟବସ୍ଥାରେ ସମୀକ୍ଷା କରିବାପରେ ଏହି ସୂଚନା ଦେଇଛନ୍ତି।
ବୁଢାବଳଙ୍ଗ ନଦୀରେ ଏନ୍ଏଚ୍-୫ ଗୋବିନ୍ଦପୁରଠାରେ ବିପଦ ସଙ୍କେତ ୮.୧୩ ମିଟର ଥିବାବେଳେ ଦିନ ୨ଟା ବେଳକୁ ଜଳସ୍ତର ୭.୭୫ ମିଟରରେ ପ୍ରବାହିତ ହେଉଥିଲା। ଗୁରୁବାର ଏହାର ଜଳସ୍ତର ବିପଦ ସଙ୍କେତ ଟପି ୮.୪୦ମିଟରରେ ପ୍ରବାହିତ ହେଉଥିଲା। ଜଳସ୍ତର ଅନେକ କମିଛି ଏବଂ ବର୍ତ୍ତମାନ ସ୍ଥିର ଅଛି। ବୈତରଣୀ ନଦୀରେ ଆନନ୍ଦପୁରଠାରେ ବିପଦ ସଙ୍କେତ ୩୮.୩୫ ମିଟରରେ ଥିଲାବେଳେ ବର୍ତ୍ତମାନ ଜଳସ୍ତର ୩୭.୪୫ ମିଟରରେ ପ୍ରବାହିତ ହେଉଥିଲା। ଆଖୁଆପଦାଠାରେ ମଧ୍ୟ ଜଳସ୍ତର ହ୍ରାସ ପାଇ ୧୯.୨୯ ରହିଛି। ଜଳସ୍ତର କମିବା ସାଙ୍ଗକୁ ଏହି ସବୁ ସ୍ଥାନରେ ବନ୍ୟା ପରିସ୍ଥିତି ମଧ୍ୟ ଆଉ ନାହିଁ। କେନ୍ଦୁଝର, ଯାଜପୁର, ମୟୂରଭଞ୍ଜରେ ଆଉ ବର୍ଷା ହୋଇ ନ ଥିବାରୁ ବୈତରଣୀର ଜଳସ୍ତର ଆହୁରି କମିବ ବୋଲି ଆଶା କରାଯାଉଛି। ବ୍ରାହ୍ମଣୀ ନଦୀ ଅବବାହିକାରେ ପଙ୍କପାଳଠାରେ ଜଳସ୍ତର ବିପଦ ସଙ୍କେତ ଠାରୁ ଅଧିକ ରହିଛି। କେନ୍ଦ୍ରୀୟ ଜଳ ଆୟୋଗଙ୍କ କହିବାମୁତାବକ ପଙ୍କପାଳଠାରେ ୧୦,୩୩୮.୪୧ କ୍ୟୁସେକ ଜଳ ନିଷ୍କାସିତ ହେଉଛି। ମହାନଦୀରେ ଜଳଭଣ୍ଡାରର ଜଳସ୍ତର ଖଲାସ କରିବାକୁ ୩୫ଟି ଗେଟ୍ ଖୋଲାଯାଇଛି। ଜଳଭଣ୍ଡାର ମଧ୍ୟକୁ ୮ଲକ୍ଷ କ୍ୟୁସେକ ଜଳ ପ୍ରବେଶ କରିବାର ସମ୍ଭାବନା ରହିଛି। ଏହାପରେ ସର୍ବାଧିକ ୪୨ଟି ଗେଟ୍ ଖୋଲିଦିଆଯିବ ବୋଲି ଜଣାପଡିଛି। ମୁଣ୍ଡୁଳିଠାରେ ସର୍ବାଧିକ ୧୦,୦୦,୦୦୦ କ୍ୟୁସେକରୁ ୧୦,୫୦,୦୦୦ କ୍ୟୁସେକ ଜଳ ନିଷ୍କାସିତ ହେବାର ଆକଳନ କରାଯାଉଛି।
ବନ୍ୟା ଯୋଗୁ ଅନୁଗୋଳ, ବଲାଙ୍ଗୀର, ବାଲେଶ୍ୱର, ବୌଦ୍ଧ, କଟକ, ଯାଜପୁର, ଢେଙ୍କାନାଳ, ନୂଆପଡା, ଦେବଗଡ, ସୁବର୍ଣ୍ଣପୁର ସମେତ ୧୦ ଜିଲାର ୩୯ବ୍ଲକ ଅନ୍ତର୍ଗତ ୯୯୭ଟି ଗ୍ରାମ କ୍ଷତିଗ୍ରସ୍ତ ହୋଇଛି। ସେହିପରି କ୍ଷତିଗ୍ରସ୍ତ ହୋଇଥିବା ଲୋକସଂଖ୍ୟା ଏ ପର୍ଯ୍ୟନ୍ତ ୪,୧୩,୫୧୨ ରହିଛି। ୫୫ଟି ଗ୍ରାମର ୩,୮୨,୨୧୬ ଜଣ ଲୋକ ପାଣି ଘେରରେ ରହିଛନ୍ତି। ସମୁଦାୟ ୧୩୬୪ ଘର ମଧ୍ୟରୁ ୨୮ଟି ସମ୍ପୂର୍ଣ୍ଣ କ୍ଷତିଗ୍ରସ୍ତ ହୋଇଛି। ୧୩୩୬ଟି ଘର ଆଂଶିକ କ୍ଷତିଗ୍ରସ୍ତ ହୋଇଛି। ୭୪,୨୭୧ ହେକ୍ଟର ଜମିର ଚାଷ କ୍ଷତିଗ୍ରସ୍ତ ହୋଇଛି। ବହୁ ଲୋକଙ୍କୁ ସ୍ଥାନାନ୍ତରିତ କରାଯାଇ ୧୦୦ଟି ବାତ୍ୟା ଆଶ୍ରୟ ସ୍ଥଳିରେ ରଖାଯାଇଛି। ସମୁଦାୟ ୧,୦୫,୮୮୧ ପ୍ରାଣୀସମ୍ପଦ କ୍ଷତିଗ୍ରସ୍ତ ହୋଇଛି। ଏହି ବନ୍ୟା ପରିସ୍ଥିତିରେ ୫ଟି ସହରାଞ୍ଚଳ ମଧ୍ୟ କ୍ଷତିଗ୍ରସ୍ତ ହୋଇଛି। ବରଗଡ, ଯାଜପୁର, ବାଲେଶ୍ୱର, ନୂଆପଡା, ତଥା ଭଦ୍ରକ ଜିଲାରେ ଜଣେ ଲେକାଏ ସମୁଦାୟ ୫ଜଣ ପ୍ରାଣ ହରାଇଛନ୍ତି। ବନ୍ୟାଜନିତ ବିପଦରୁ ଉଦ୍ଧାର ତଥା ଥଇଥାନ ଲାଗି ୭ ଓଡିଆରଏଫ ଏବଂ ୭ ଏନଡିଆରଏଫ ଟିମ ବିଭିନ୍ନ ଜିଲାରେ ନିୟୋଜିତ କରାଯାଇଛି। ମୟୁରଭଞ୍ଜ ଜିଲାରେ ଗୋଟିଏ, ବାଲେଶ୍ୱରରେ ଗୋଟିଏ ଓଡିଆରଏଫ ଏବଂ ୨ ଏନଡିଆରଏଫ, ଭଦ୍ରକରେ ଗୋଟିଏ ଲେଖାଏ ଓଡିଆରଏଫ ଏବଂ ଏନଡିଆରଏଫ ମୁତୟନ ଅଛନ୍ତି। ସେହିଭଳି ଯାଜପୁରରେ ୨ ଓଡିଆରଏଫ ଏବଂ ୩ଟି ଏନଡିଆରଏଫ ତଥା କେନ୍ଦ୍ରାପଡାରେ ୨ ଓଡିଆରଏଫ ଓ ୧ଟି ଏନଡିଆରଏଫ ଟିମ୍ ନିୟୋଜିତ କରାଯାଇଛି। ସେହିପରି ଜଗତସିଂହପୁର, ପୁରୀ, ଝାରସୁଗୁଡା, ସୁନ୍ଦରଗଡ, ବଲାଙ୍ଗୀର, ବୌଦ୍ଧ ଓ ଦେବଗଡ ଜିଲାକୁ ଗୋଟିଏ ଲେଖା ଓଡିଆରଏଫ ଟିମ୍ ମୃତୟନ ଅଛନ୍ତି। ସେହିପରି ଜଗତସିଂହପୁରକୁ ଗୋଟିଏ ଏବଂ ପୁରୀକୁ ଦୁଇଟି ଏନଡିଆରଏଫ ଟିମ୍ ପଠାଯାଇଛି। ଅଗ୍ନିଶମ ସେବାର ଟିମ୍କୁ ମଧ୍ୟ ଅଧିକ ଆବଶ୍ୟକତା ଥିବା ଜିଲାକୁ ପଟାଯାଉଛି। ଏହା ମଧ୍ୟରେ ଜଗତସିଂହପୁରକୁ ୫ଟି, କେନ୍ଦ୍ରାପଡାକୁ ୨ଟି, ପୁରୀକୁ ୫ଟି ଏବଂ ଯାଜପୁରକୁ ୨ଟି ଦଳ ପଠାଯାଇଛି।
