ନୂଆଦିଲ୍ଲୀ, ୨୯।୩:ଭାରତରେ ସାଇବର ଆକ୍ରମଣଜନିତ ମାମଲା ଦ୍ରୁତ ଗତିରେ ବଢ଼ିଚାଲିଛି। ଏଭଳି ଆକ୍ରମଣର ମୁକାବିଲା ପାଇଁ ମାତ୍ର ୪ ପ୍ରତିଶତ ଭାରତୀୟ କମ୍ପାନୀ ସକ୍ଷମ। ଅର୍ଥାତ୍ ଅବଶିଷ୍ଟ ୯୬ ପ୍ରତିଶତ କମ୍ପାନୀ ସାଇବର ଆଟାକ୍କୁ ପ୍ରତିହତ କରିବାକୁ ସମର୍ଥ ନୁହନ୍ତି। ସିସ୍କୋର ସାଇବର ସିକ୍ୟୁରିଟି ରେଡିନେସ୍ ଇଣ୍ଡେକ୍ସ-୨୦୨୪ରୁ ଏହି ତଥ୍ୟ ସାମ୍ନାକୁ ଆସିଛି। ସାଇବର ଆକ୍ରମଣ ଫଳରେ ଆସନ୍ତା ୧୨ରୁ ୨୪ ମାସ ମଧ୍ୟରେ ୮୨ ପ୍ରତିଶତ ଭାରତୀୟ କମ୍ପାନୀର ବ୍ୟବସାୟରେ ବାଧା ସୃଷ୍ଟି ହେବା ନେଇ ଉକ୍ତ ରିପୋର୍ଟରେ ଆଶଙ୍କା ବ୍ୟକ୍ତ କରାଯାଇଛି। ଅର୍ଥାତ୍ ଏହି ସବୁ କମ୍ପାନୀ ନିକଟରେ ସାଇବର ଆକ୍ରମଣରୁ ବର୍ତ୍ତିବା ପାଇଁ କୌଣସି ବ୍ୟବସ୍ଥା ନାହିଁ।
ସେହିପରି ୮୮% ଭାରତୀୟ କମ୍ପାନୀ ନିଜ ଭିତ୍ତିଭୂମି ସହ ସାଇବର ଆକ୍ରମଣକୁ ମୁକାବିଲା କରିବା ପାଇଁ ସକ୍ଷମ ଥିବା ନେଇ ଆଶ୍ୱସ୍ତି ପ୍ରକାଶ କରିଛନ୍ତି। ତେବେ ଏହାକୁ ନେଇ ସିସ୍କୋର ସୁରକ୍ଷା ମହା ପ୍ରବନ୍ଧକ ଜିତୁ ପଟେଲ ଆଶଙ୍କା ପ୍ରକାଶ କରିଛନ୍ତି। ବଢ଼ୁଥିବା ସାଇବର ଆକ୍ରମଣକୁ ଦୃଷ୍ଟିରେ ରଖି କମ୍ପାନୀଗୁଡିକ ଏକଜୁଟ୍ ହୋଇ ଆର୍ଟିଫିସିଆଲ୍ ଇଣ୍ଟେଲିଜେନ୍ସ(ଏଆଇ)ର ବ୍ୟବହାରରେ ଦୃଢ଼ ପ୍ଲାଟଫର୍ମ ପ୍ରସ୍ତୁତ କରିବାକୁ ସେ ପରାମର୍ଶ ଦେଇଛନ୍ତି। ବିଶ୍ୱବ୍ୟାପୀ ୯୯% କମ୍ପାନୀ ସାଇବର ସୁରକ୍ଷା କ୍ଷେତ୍ରରେ ବଜେଟ ବୃଦ୍ଧି କରିବାକୁ ବିଚାର କରୁଥିବା ସେ ସୂଚନା ଦେଇଛନ୍ତି। ସେହିପରି ୭୧ ପ୍ରତିଶତ କମ୍ପାନୀ ନିଜର ସୂଚନା ଓ ପ୍ରଯୁକ୍ତି ବିଦ୍ୟା(ଆଇଟି) କ୍ଷେତ୍ରରେ ଥିବା ଭିତ୍ତିଭୂମିକୁ ସୁଦୃଢ଼ କରିବା ଦିଗରେ ଯୋଜନା ପ୍ରସ୍ତୁତ କରୁଥିବା ଏହି ରିପୋର୍ଟରେ ଉଲ୍ଲେଖ ରହିଛି।
