ନୂଆଦିଲ୍ଲୀ, ୨୯।୯ : ପସମାନ୍ଦା ମୁସଲିମ ବର୍ଗ ପକ୍ଷରୁ ପପୁଲାର ଫ୍ରଣ୍ଟ ଅଫ ଇଣ୍ଡିଆ (ପିଏଫଆଇ)କୁ ନିଷିଦ୍ଧ ଘୋଷଣାକୁ ସ୍ବାଗତ କରାଯାଇଛି। ଏନେଇ ସେମାନେ ଖୁସି ବ୍ୟକ୍ତ କରିଛନ୍ତି। ଏହା ସହିତ କେନ୍ଦ୍ର ସରକାରଙ୍କ ଏହି ନିଷ୍ପତ୍ତିକୁ ଅନ୍ୟ ମୁସଲମାନ ସଂଗଠନ ମଧ୍ୟ ସ୍ବାଗତ କରିଛନ୍ତି। ବିଶେଷ କଥା ହେଉଛି ଭାରତୀୟ ଜନତା ପାର୍ଟି ପସମାନ୍ଦା ମୁସଲିମ ବର୍ଗକୁ ନେଇ ବେଶ୍ ସକ୍ରିୟ ଥିବା ଜଣାପଡିଛି। ରାଜନୈତିକ ସମୀକ୍ଷକଙ୍କ ଅନୁସାରେ ଭୋଟରଙ୍କ ସଂଖ୍ୟା ବୃଦ୍ଧି ପାଇଁ ଭାଜପା ପସମାନ୍ଦା ବର୍ଗଙ୍କ ଉପରେ ଅଧିକ ଧ୍ୟାନ ଦେଉଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଏନେଇ ସୂଚନା ପ୍ରଦାନ କରି ସାରିଛନ୍ତି।
ଅଲ ଇଣ୍ଡିଆ ପସମାନ୍ଦା ମୁସଲିମ ସଂଗଠନ ଦ୍ୱାରା ଜାରି ବିବୃତ୍ତି ଅନୁଯାୟୀ, ଭାରତର ସମ୍ବିଧାନ ବିରୁଦ୍ଧରେ ଏବଂ ଦେଶରେ ସାମାଜିକ ବିରୋଧୀ କାର୍ଯ୍ୟକଳାପରେ ପିଏଫଆଇ ଲିପ୍ତ ରହିଥିଲା। ଏଥିରୁ ସ୍ପଷ୍ଟ ହୋଇଛି ଯେ ଦେଶ ମଧ୍ୟରେ ସାମାଜିକ ସୌହାର୍ଦ୍ଦ୍ୟ ଏବଂ ଭାଇଚାରା ବିରୋଧରେ ସଂଗଠନ କାର୍ଯ୍ୟ କରୁଥିଲା। ଦେଶ ବିରୁଦ୍ଧରେ କାର୍ଯ୍ୟକଳାପରେ ଯୋଗଦେବା ସହିତ ଭାରତୀୟ ସାର୍ବଭୌମତ୍ୱକୁ ମଧ୍ୟ ଏହା ଚେତାବନୀ ଦେଇଥିଲା। ତେଣୁ ପିଏଫଆଇ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଜରୁରୀ ହୋଇପଡ଼ିଥିଲା।
ପାର୍ସୀ ଶବ୍ଦ ପସମାନ୍ଦା ଅର୍ଥ ହେଉଛି ପଛୁଆ ରହିଥିବା। ଏହା ମୁସଲମାନମାନଙ୍କ ମଧ୍ୟରେ ଥିବା ପଛୁଆ ବର୍ଗଙ୍କ ପାଇଁ ବ୍ୟବହୃତ ହୋଇଥାଏ। ପରିସଂଖ୍ୟାନ ଦର୍ଶାଏ ଯେ, ଭାରତର ସମୁଦାୟ ମୁସଲମାନ ଜନସଂଖ୍ୟାର ୮୫ ପ୍ରତିଶତ ହେଉଛନ୍ତି ପଛୁଆ ପସମାନ୍ଦା ବର୍ଗର। ସେମାନଙ୍କୁ ପୂର୍ବରୁ ରାଜନୈତିକ ଦଳମାନେ ଅଣଦେଖା କରିଥିଲେ। ତେବେ ଭାଜପା ସରକାର ବର୍ତ୍ତମାନ ପରିସ୍ଥିତିକୁ ପରିବର୍ତ୍ତନ କରୁଥିବା ଜଣାପଡିଛି।
