ଢେଙ୍କାନାଳ ଅଫିସ, ୧।୧୧: ଢେଙ୍କାନାଳ ସ୍ବୟଂଶାସିତ ମହାବିଦ୍ୟାଳୟ ୮ ନୂଆ ବିଭାଗରେ ସ୍ନାତକୋତ୍ତର (ପିଜି) ପାଠ୍ୟକ୍ରମ ଖୋଲିବ। ଉଚ୍ଚଶିକ୍ଷା ବିଭାଗ ଚିଠି ସଂଖ୍ୟାା ୪୫୨୭୪/ତା୨୯ା୧୦ା୨୨ରିଖରେ ରାଜ୍ୟ ସରକାର ଏଥିଲାଗି ଅନୁମତି ପ୍ରଦାନ କରିଥିବା ଅଧ୍ୟକ୍ଷ ପ୍ରଫେସର ରଞ୍ଜିତ ପ୍ରଧାନ ସୋମବାର ସୂଚନା ଦେଇଛନ୍ତି। ଓଡ଼ିଆ, ଇଂଲିଶ, ଅର୍ଥନୀତି, ରସାୟନ ଶାସ୍ତ୍ର, ପଦାର୍ଥ ବିଜ୍ଞାନ, ଗଣିତ, ମନସ୍ତତ୍ତ୍ୱ, ଦର୍ଶନଶାସ୍ତ୍ର ବିଭାଗରେ ପିଜି ପାଠ୍ୟକ୍ରମ ଖୋଲିବ। ପ୍ରତି ବିଭାଗରେ ୧୬ଟି ଲେଖାଏ ସିଟ୍ ଉପଲବ୍ଧ ହେବ। ୨୦୨୨-୨୩ ଶିକ୍ଷାବର୍ଷରୁ ଏଥିରେ ନାମଲେଖା ଏବଂ ପାଠପଢ଼ା ଆରମ୍ଭ ହେବ ବୋଲି ନିର୍ଦ୍ଦେଶନାମା ରହିଛି। ଅନ୍ୟପଟେ ପୂର୍ବରୁ ବାଣିଜ୍ୟ ଓ ଇତିହାସ ବିଭାଗରେ ୩୨ ଲେଖାଏ ସିଟ୍ ରହିଥିବାବେଳେ ଉଦ୍ଭିଦ ବିଜ୍ଞାନ ପିଜି ପାଠ୍ୟକ୍ରମରେ ସିଟ୍ ସଂଖ୍ୟା ୧୬ରୁ ୩୨କୁ ବୃଦ୍ଧି କରାଯାଇଛି। ଅନୁରୂପ ଭାବେ ଯୁକ୍ତ ୩ ସମ୍ମାନରେ ୪ ନୂଆ ବିଷୟ ସାମିଲ ହୋଇଛି। ସେଗୁଡିକ ହେଲା ଶିକ୍ଷା, ସମାଜଶାସ୍ତ୍ର, ହିନ୍ଦୀ ଓ ବାୟୋ ଟେକ୍ନୋଲୋଜି। ଦର୍ଶନଶାସ୍ତ୍ର, ଇଂଲିଶ, ମନସ୍ତତ୍ତ୍ୱ, ପ୍ରାଣୀ ବିଜ୍ଞାନ, ଗଣିତ ସ୍ନାତକରେ ସିଟ୍ ସଂଖ୍ୟା ୩୨କୁ ବୃଦ୍ଧି ପାଇଛି। ଏଭଳି ବହୁ ପ୍ରତୀକ୍ଷିତ ନିଷ୍ପତ୍ତି କାର୍ଯ୍ୟକାରୀ ହୋଇଥିବାରୁ ଏହାକୁ ନେଇ ଅଧ୍ୟାପିକା, ଅଧ୍ୟାପକ, ଅଭିଭାବକ ଏବଂ ଛାତ୍ରୀଛାତ୍ରଙ୍କ ମହଲରେ ଖୁସିର ଲହରି ଖେଳିଯାଇଛି।
ସୂଚନାଯୋଗ୍ୟ, ୧୯୫୯ରେ ଢେଙ୍କାନାଳ ମହାବିଦ୍ୟାଳୟ ପ୍ରତିଷ୍ଠା ହୋଇଥିଲା। ୧୯୮୧ରେ କଲେଜରେ ପ୍ରଥମେ ଇତିହାସ ପିଜି ବିଭାଗ ଖୋଲିଥିଲା। ୧୯୮୩ରେ ବାଣିଜ୍ୟ ଏବଂ ୧୯୯୫ରେ ଉଦ୍ଭିଦ ବିଜ୍ଞାନ ଏଥିରେ ଯୋଡ଼ି ହୋଇଥିଲା। ୨୦୦୨ରେ ଢେଙ୍କାନାଳ କଲେଜ ସ୍ବୟଂଶାସିତ ମହାବିଦ୍ୟାଳୟର ମାନ୍ୟତା ପାଇଥିଲା। ଇତିମଧ୍ୟରେ ଦୀର୍ଘ ୨୭ ବର୍ଷ ବିତିଯାଇଥିଲେ ହେଁ ଅନ୍ୟ କୌଣସି ବିଭାଗରେ ସ୍ନାତକୋତ୍ତର ସୁବିଧା ନ ଥିଲା। ଅଧିକ ପିଜି ବିଭାଗ ଖୋଲିବା ପାଇଁ ଆଲୁମ୍ନି ଆସୋସିଏଶନଠାରୁ ଆରମ୍ଭ କରି ବିଭିନ୍ନ ସଙ୍ଗଠନ, ଛାତ୍ର ସଂସଦ ପକ୍ଷରୁ ରାଜ୍ୟ ସରକାରଙ୍କ ପାଖରେ ଦାବି ହୋଇ ଆସୁଥିଲା। ଏକ ସାଙ୍ଗରେ ୮ ସ୍ନାତକୋତ୍ତର ବିଭାଗ ଖୋଲିବା ଲାଗି ନିର୍ଦ୍ଦେଶନାମା ଆସିବା ପରେ ଏହାକୁ ସବୁ ମହଲରେ ସ୍ବାଗତ କରାଯାଇଛି।
