ଢେଙ୍କାନାଳ,୧୨ା୪(ରତନ ନାୟାର): କଟକରୁ ଢେଙ୍କାନାଳ ଓ ଅନୁଗୋଳ ଦେଇ ସମ୍ବଲପୁରକୁ ଲମ୍ବିଥିବା ୫୫ନଂ. ଜାତୀୟ ରାଜପଥର ଅଧାପନ୍ତରିଆ ଅବସ୍ଥା ଏବେ ନିର୍ବାଚନୀ ପ୍ରସଙ୍ଗ ପାଲଟିଛି। ଢେଙ୍କାନାଳ, ଅନୁଗୋଳ ଓ ସମ୍ବଲପୁରର ଲାଇଫ ଲାଇନ୍ କୁହାଯାଉଥିବା ଏହି ରାଜପଥ ସମ୍ପ୍ରସାରଣ କାର୍ଯ୍ୟ ୬ ବର୍ଷ ହେଲା ଶେଷ ହୋଇପାରୁ ନ ଥିବାରୁ ଏହାକୁ ଢେଙ୍କାନାଳ-ଅନୁଗୋଳରେ ବିଜେଡି ଓ କଂଗ୍ରେସ ନେତାମାନେ ପ୍ରମୁଖ ପ୍ରସଙ୍ଗ କରି ଭାଜପାକୁ ଟାର୍ଗେଟ କରୁଥିବା ଦେଖିବାକୁ ମିଳୁଛି। ଏପରି କି ବିଜେଡିର ସମ୍ବଲପୁର ଲୋକ ସଭା ପ୍ରାର୍ଥୀ ତଥା ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ଏହାକୁ ନେଇ ତାଙ୍କ ପ୍ରତିଦ୍ୱନ୍ଦ୍ୱୀ ଭାଜପା ପ୍ରାର୍ଥୀ ତଥା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ କଡ଼ା ସମାଲୋଚନା କରୁଥିବା ଦେଖାଯାଉଛି। ତେବେ ରାଜପଥର ଏହି ଦୁରବସ୍ଥାକୁ ନେଇ ଢେଙ୍କାନାଳ ଓ ଅନୁଗୋଳ ଜିଲାବାସୀ ଅଧିକ ଅସୁବିଧାର ସମ୍ମୁଖୀନ ହେଉଥିବାରୁ ଏଭଳି ଦମ୍ଦାର ପ୍ରସଙ୍ଗକୁ ନିର୍ବାଚନରେ ଜୋର୍ଦାର କରିବେ ବୋଲି କହିଛନ୍ତି ଏହି ଦୁଇ ଜିଲାରୁ ଭୋଟ ରଣାଙ୍ଗନକୁ ଓହ୍ଲାଇଥିବା ବିଜେଡି ପ୍ରାର୍ଥୀ ଓ କଂଗ୍ରେସର ଆଶାୟୀ ପ୍ରାର୍ଥୀମାନେ। ଅନ୍ୟପକ୍ଷରେ ଭାଜପା ପ୍ରାର୍ଥୀମାନେ ମଧ୍ୟ ରାଜପଥ ସମସ୍ୟା ବିଜେଡି ସରକାରର ଅସହଯୋଗର ନମୁନା କହି ସମାଲୋଚନା କରିବାର ସୁଯୋଗ ହାତଛଡ଼ା କରୁନାହାନ୍ତି।
ଢେଙ୍କାନାଳ ଜିଲା ବିଜେଡି ସାଧାରଣ ସମ୍ପାଦକ ଦେବାଶିଷ ମିଶ୍ର କହିଛନ୍ତି, କେନ୍ଦ୍ର ସରକାରଙ୍କ ବିଭାଗୀୟ ମନ୍ତ୍ରୀଙ୍କ ନିକଟକୁ ମୁଖ୍ୟମନ୍ତ୍ରୀ ଏ ସଂକ୍ରାନ୍ତରେ ଚିଠି ଲେଖିଥିଲେ। ହେଲେ କେନ୍ଦ୍ର ସରକାର ଏହି ରାଜପଥକୁ ଗୁରୁତ୍ୱ ପ୍ରଦାନ କଲେନାହିଁ। ଏହା କେନ୍ଦ୍ର ସରକାରଙ୍କ ଆନ୍ତରିକତା ଅଭାବର ଉଦାହରଣ। ଭାଜପା ନେତୃବୃନ୍ଦ ଗ୍ୟାରେଣ୍ଟି କଥା କହୁଥିବା ବେଳେ ଜାତୀୟ ରାଜପଥ କାର୍ଯ୍ୟ ୬ବର୍ଷ ହେଲା ନ ସରିବା କିଭଳି ଗ୍ୟାରେଣ୍ଟି ତାହା ଏହି ନିର୍ବାଚନରେ ସମସ୍ତେ ଜାଣିବା ଦରକାର। ଭୋକ ବିକଳରେ ତାଟିଆ କାମୁଡ଼ିବା ଭଳି ଅଯଥାରେ ଭାଜପା ନେତୃବୃନ୍ଦ ବିଜେଡି ସରକାରଙ୍କୁ ଦାୟୀ କରୁଛନ୍ତି। ଜିଲା କଂଗ୍ରେସ ସଭାପତି ସୁନୀଲ ଦାଶ କହିଛନ୍ତି, ଏଥିପାଇଁ କେନ୍ଦ୍ର ଓ ରାଜ୍ୟ ସରକାର ଉଭୟେ ଦାୟୀ। ଦୁଇ ଦଳର ଦୁର୍ବଳ ନେତୃତ୍ୱ ଯୋଗୁ ଏହି ପ୍ରମୁଖ ସମସ୍ୟା ସମାଧାନ ହୋଇପାରୁନାହିଁ। ଏଥିପାଇଁ କଂଗ୍ରେସ ପକ୍ଷରୁ ବହୁବାର ଆନ୍ଦୋଳନ କରାଯାଇଛି। ଚଳିତ ନିର୍ବାଚନରେ ଏହା ଦଳର ମୁଖ୍ୟ ପ୍ରସଙ୍ଗ ହେବ। ଭାଜପା କୃଷକ ମୋର୍ଚ୍ଚା ନେତା ରାମଚନ୍ଦ୍ର ପାତ୍ର କହିଛନ୍ତି, ୫୩ନଂ. ଜାତୀୟ ରାଜପଥରେ ଯଦି ଠିକାଦାର ନିର୍ଦ୍ଧାରିତ ସମୟ ମଧ୍ୟରେ ତାଳଚେର-ବହ୍ଲର ପର୍ଯ୍ୟନ୍ତ କାମ ସାରିପାରିଲେ, ତେବେ କଟକ-ଢେଙ୍କାନାଳ-ଅନୁଗୋଳ ମଧ୍ୟରେ କାହିଁକି ରାସ୍ତାକାମ ବିଳମ୍ବ ହେଉଛି। ହିନ୍ଦୋଳ ବିଧାୟିକା, ଢେଙ୍କାନାଳ ଓ ଆଠଗଡ଼ ବିଧାୟକ ଠିକାଦାରଙ୍କୁ କାହିଁକି କାମ କରାଇ ଦେଉନାହାନ୍ତି। ନିର୍ବାଚନ ସମୟରେ କେବଳ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ବଦନାମ କରିବାକୁ ଏହା ବିରୋଧୀ ପ୍ରାର୍ଥୀମାନଙ୍କ ଉଦ୍ୟମ ଛଡ଼ା ଅନ୍ୟ କିଛି ନୁହେଁ ବୋଲି ରାମଚନ୍ଦ୍ର କହିଛନ୍ତି।
